ନୂଆଦିଲ୍ଲୀ ୦୪।୦୪ : ରେଳ ମନ୍ତ୍ରୀଙ୍କ ସମୀକ୍ଷା ବୈଠକ । ନୂଆଦିଲ୍ଲୀର ରେଳ ଭବନରେ ସାରା ଦେଶର ରେଳ ଅଧିକାରୀଙ୍କ ସହ ସମୀକ୍ଷା ବୈଠକ କରିଛନ୍ତି କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ । ଏହି ବୈଠକରେ କେନ୍ଦ୍ରମନ୍ତ୍ରୀ ଗୁରୁତ୍ୱାରୋପ କରି କହିଛନ୍ତି ଯେ, ଗରିବ ଏବଂ ମଧ୍ୟମ ବର୍ଗଙ୍କୁ ଏକ ଉତ୍ତମ ଯାତ୍ରା ପ୍ରଦାନ କରିବା ଭାରତୀୟ ରେଳବାଇର ସର୍ବୋଚ୍ଚ ପ୍ରାଥମିକତା। ଏହି ଲକ୍ଷ୍ୟ ହାସଲ ଦିଗରେ ମିଳିତ ଭାବେ କାର୍ଯ୍ୟ କରିବା । ରେଳବାଇ ପରିବାରକୁ ଗତବର୍ଷ ସେମାନଙ୍କର ପ୍ରଶଂସନୀୟ ପ୍ରଦର୍ଶନ ପାଇଁ ଅଭିନନ୍ଦନ ଜଣାଇଥିଲେ । ଏହାସହିତ ରେଳ ଦୁର୍ଘଟଣାରେ ଐତିହାସିକ ହ୍ରାସ ଏବଂ ରେକର୍ଡ ସଂଖ୍ୟକ ମାଲ ପରିବହନ ଯୋଗୁଁ ସାରା ଦେଶରେ ଭାରତୀୟ ରେଳବାଇର ଭାବମୂର୍ତ୍ତିରେ ଉଲ୍ଲେଖନୀୟ ଉନ୍ନତି ଘଟିଛି। ପର୍ବପର୍ବାଣୀ ସମୟରେ ବହୁ ସଂଖ୍ୟକ ସ୍ବତନ୍ତ୍ର ଟ୍ରେନର ପ୍ରଭାବୀ ପରିଚାଳନାକୁ ମଧ୍ୟ ସେ ପ୍ରଶଂସା କରିଥିଲେ, ଯାହା ଯାତ୍ରାର ବର୍ଦ୍ଧିତ ଚାହିଦାକୁ ପୂରଣ କରିବାରେ ସହାୟକ ହୋଇଥିଲା।

ସେହିପରି ଯାତ୍ରୀଙ୍କ ଅଭିଜ୍ଞତାର ଗୁରୁତ୍ୱ ଉପରେ ଆଲୋକପାତ କରି କେନ୍ଦ୍ରମନ୍ତ୍ରୀ କହିଥିଲେ ଯେ, ରେଳ ଷ୍ଟେସନଗୁଡିକ ଜନସାଧାରଣଙ୍କ ସମ୍ମୁଖରେ ଭାରତୀୟ ରେଳବାଇର ଚେହେରା ଏବଂ ଏହାକୁ ସ୍ବଚ୍ଛ ଭାବେ ରକ୍ଷଣାବେକ୍ଷଣ କରାଯିବାର ଆବଶ୍ୟକ ରହିଛି । ସବୁ ଷ୍ଟେସନରେ ସ୍ବଚ୍ଛତା ଏବଂ ଉନ୍ନତ ଯାତ୍ରୀ ସୁବିଧା ସୁନିଶ୍ଚିତ କରିବା ପାଇଁ ଅକାରୀଙ୍କୁ ଅନୁରୋଧ କରିଥିଲେ । ଗତ ଦଶନ୍ଧି ମଧ୍ୟରେ ରେଳବାଇର ଆଧୁନିକୀକରଣ ପାଇଁ ରେକର୍ଡ ଆବଣ୍ଟନ ବିଷୟରେ ଉଲ୍ଲେଖ କରି ସେ ଗୁରୁତ୍ୱାରୋପ କରି କହିଥିଲେ, ରେଳ ଷ୍ଟେସନଗୁଡ଼ିକର ପରିବର୍ତ୍ତନ ଏବଂ ଯାତ୍ରୀ ସୁବିଧା ବୃଦ୍ଧି ପାଇଁ ଅଧିକାରୀମାନେ ପାଣ୍ଠିର ସର୍ବୋତ୍ତମ ଉପଯୋଗ ସୁନିଶ୍ଚିତ କରିବା ଆବଶ୍ୟକ ରହିଛି ।

Also Read:-ଇଷ୍ଟ କୋଷ୍ଟ ରେଳପଥ ସଙ୍କୁଚିତ ପ୍ରସଙ୍ଗ ନେଇ ରେଳ ମନ୍ତ୍ରଣାଳୟର ପ୍ରତିକ୍ରିୟା: ଓଡ଼ିଶାରୁ ଗୋଟିଏ ଇଞ୍ଚ ମଧ୍ୟ ରେଳ ପଥ ଅନ୍ୟ ରାଜ୍ୟକୁ ଯାଉନାହିଁ

ସେହିପରି ଭିଡ଼ ପରିଚାଳନା, ବିଶେଷ କରି ପର୍ବପର୍ବାଣୀ ସମୟରେ, ଏହା ସୁନିଶ୍ଚିତ କରିବା ଉଚିତ ଯେ ଯାତ୍ରୀମାନେ ଯେପରି ସୁଗମ ଭାବେ ଓ ବିନା ବାଧାରେ ପ୍ଲାଟଫର୍ମରେ ପହଞ୍ଚିପାରିବେ ଏବଂ ଟ୍ରେନରେ ଚଢିପାରିବେ। ଯାତ୍ରୀଙ୍କ ସୁବିଧା ଏବଂ ସୁଗମ୍ୟତାରେ ଉନ୍ନତି ଆଣିବା ପାଇଁ ଆବଣ୍ଟିତ ପାଣ୍ଠିର ଉପଯୋଗକୁ ପ୍ରାଥମିକତା ଦେବାକୁ ସେ ଅକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଘୋଷଣା ହୋଇଥିବା ରେଳ ପ୍ରକଳ୍ପ ପାଇଁ ବିଚାରାଧୀନ ଜମି ଅଧିଗ୍ରହଣ ପ୍ରସଙ୍ଗ ଉପରେ ମଧ୍ୟ ଆଲୋଚନା ହୋଇଥିଲା I ଶ୍ରୀ ବୈଷ୍ଣବ ଏହି ପ୍ରକ୍ରିୟାକୁ ତ୍ୱରାନ୍ଵିତ କରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଯଦି ଆବଶ୍ୟକ ହୁଏ, ତେବେ ପ୍ରତିବନ୍ଧକକୁ ଦୂର କରିବା ପାଇଁ ରାଜ୍ୟ ରାଜସ୍ବ ଏବଂ ଜଙ୍ଗଲ ବିଭାଗର ଅଭିଜ୍ଞ ଅବସରପ୍ରାପ୍ତ ଅଧିକାରୀଙ୍କ ଠାରୁ ମତାମତ ଗ୍ରହଣ କରନ୍ତୁ I

ରେଳ ଟ୍ରାକ୍ ନିକଟରେ ରହୁଥିବା ଲୋକଙ୍କ ସମ୍ବେଦନଶୀଳ ନେଇ କେନ୍ଦ୍ର ମନ୍ତ୍ରୀ କହିଥିଲେ ଯେ, ଜୀବିକା ଉପରେ ପ୍ରତିକୂଳ ପ୍ରଭାବ ପକାଇବା ଉଚିତ ନୁହେଁ, ରାଜ୍ୟ ସରକାରଙ୍କ ସହ ସମନ୍ଵୟ ରକ୍ଷା କରି ଏଭଳି ସମସ୍ୟାର ସମାଧାନ କରାଯାଉ । ଅନେକ ସହରାଞ୍ଚଳରେ ଏହା ଏକ ଗୁରୁତ୍ବପୂର୍ଣ ପ୍ରସଙ୍ଗ ଏବଂ ଏହାର ସମୟୋଚିତ ଏବଂ ସହାନୁଭୂତିଶୀଳ ସମାଧାନର ଆବଶ୍ୟକତା ରହିଛି I

ଏହି ବୈଠକରେ ରେଳ ଅଣ୍ଡରପାସ ନିର୍ମାଣ ସଂକ୍ରାନ୍ତରେ ପୂର୍ବରୁ ନିଆଯାଇଥିବା ନିଷ୍ପତ୍ତିର ସମୀକ୍ଷା କରାଯାଇଥିଲା I ଯେଉଁଠାରେ ସମ୍ଭବ, ଷ୍ଟେସନ ପରିସର ମଧ୍ୟରେ ଏବଂ ବାହାରେ ରେଳ ଟ୍ରାକ୍ ଅତିକ୍ରମ ଲାଗି ପାଦଚଲା ଓଭରବ୍ରିଜ୍ ଉପରେ ସୁବିଧାଜନକ ଓ ସୁଗମ ଅଣ୍ଡରପାସକୁ ପ୍ରାଥମିକତା ଦିଆଯାଉ । ଅଣ୍ଡରପାସଗୁଡ଼ିକ ଅଧିକ ବ୍ୟବହାର ଅନୁକୂଳ ଏବଂ ଜନସାଧାରଣଙ୍କ ଦ୍ବାରା ଅଧିକ ଥର ବ୍ୟବହାର ହେବାର ସମ୍ଭାବନା ରହିଛି।

Also Read:-ମନ୍ଦିର ପରିସରରେ ଅସଞ୍ଜତ ଅବସ୍ଥାରେ ପ୍ରେମୀ ଯୁଗଳ, ନିଶାଡିଙ୍କ ରାଜୁତି, ପୋଲିସ କରୁଛି କଣ ?

ଏହିପରି ଅଣ୍ଡରପାସ ନିର୍ମାଣ ପାଇଁ ଦେଶର ବିଭିନ୍ନ ଭାଗରେ ପାଇଲଟ ପ୍ରକଳ୍ପ ହାତକୁ ନେବାକୁ ନିଷ୍ପତ୍ତି ନିଆଯାଇଥିଲା। କେବଳ ପଥଚାରୀଙ୍କ ପାଇଁ ନୁହେଁ, ସାଇକେଲ, ସ୍କୁଟର ଏବଂ ମୋଟର ସାଇକେଲ ପାଇଁ ମଧ୍ୟ ଯାତାୟାତକୁ ସହଜ କରିବା ଲାଗି ଏଗୁଡ଼ିକର ପରିକଳ୍ପନା କରାଯିବ ଏବଂ କେତେକ କ୍ଷେତ୍ରରେ, ବ୍ୟାପକ ଢାଞ୍ଚାର ଟ୍ରାକ୍ଟର ଏବଂ ଅନ୍ୟାନ୍ୟ ଯାନର ଗତିବିଧିକୁ ଅନୁମତି ଦେବ। ଉଭୟ ସହରାଞ୍ଚଳ ଏବଂ ଗ୍ରାମାଞ୍ଚଳର ଆବଶ୍ୟକତାକୁ ପୂରଣ କରିବା ପାଇଁ ଡିଜାଇନ୍ ପ୍ରସ୍ତୁତ କରାଯିବ।

ସମୟାନୁବର୍ତ୍ତୀ ଟ୍ରେନ୍ ଚଳାଚଳ ସୁନିଶ୍ଚିତ କରିବାରେ ଜୋନଗୁଡ଼ିକର ପ୍ରଦର୍ଶନକୁ ମଧ୍ୟ କେନ୍ଦ୍ର ରେଳ ମନ୍ତ୍ରୀ ପ୍ରଶଂସା କରିଥିଲେ । ଉଚ୍ଚସ୍ତରର ସମୟାନୁବର୍ତ୍ତୀତ ବଜାୟ ରଖୁଥିବା ଜୋନଗୁଡ଼ିକୁ ସେ ଅଭିନନ୍ଦନ ଜଣାଇଥିଲେ ଏବଂ ପରିଚାଳନାଗତ ଆହ୍ୱାନ ସତ୍ତ୍ୱେ ୮୫% ରୁ ଅଧିକ ସମୟନୁବର୍ତ୍ତିତା ସୁନିଶ୍ଚିତ କରି ସେମାନଙ୍କ ପ୍ରଦର୍ଶନରେ ଉନ୍ନତି ଆଣିଥିବା ଜୋନଗୁଡ଼ିକୁ ବିଶେଷ ଭାବେ ପ୍ରଶଂସା କରିଥିଲେ। ନିରନ୍ତର ପ୍ରୟାସ, ଦକ୍ଷ ଯୋଜନା ଏବଂ ଯାତ୍ରୀ କୈନ୍ଦ୍ରିକ ଆଭିମୁଖ୍ୟ ସହିତ ଭାରତୀୟ ରେଳବାଇ ସାରା ଦେଶରେ ଯାତ୍ରୀଙ୍କ ପାଇଁ ସୁରକ୍ଷା, ସେବାର ଗୁଣବତ୍ତା ଏବଂ ସାମଗ୍ରିକ ଯାତ୍ରା ଅଭିଜ୍ଞତାକୁ ବୃଦ୍ଧି କରିବା ଜାରି ରଖିବ।

Watch Video:-