ମୁମ୍ବାଇ ୧୨।୪: ସଙ୍ଗୀତ ଜଗତର କିମ୍ବଦନ୍ତୀ ଗାୟିକା ତଥା ପ୍ରସିଦ୍ଧ ପ୍ଲେ-ବ୍ୟାକ୍ ସିଙ୍ଗର ଆଶା ଭୋସଲେଙ୍କ ପରଲୋକ । ପ୍ରାୟ ୮ ଦଶନ୍ଧି ଧରି ନିଜର ଯାଦୁକରୀ କଣ୍ଠସ୍ୱରରେ କୋଟି କୋଟି ଶ୍ରୋତାଙ୍କୁ ବିମୋହିତ କରିଥିଲେ ଆଶା ୯୨ ବର୍ଷ ବୟସରେ ଚିକିତ୍ସାଧିନ ଅବସ୍ଥାରେ ତାଙ୍କର ଦେହାନ୍ତ ହୋଇଛି । ତାଙ୍କ ଦେହାନ୍ତ ନେଇ ପ୍ରଥମେ ତାଙ୍କ ପୁଅ ଆନନ୍ଦ ଭୋସଲେ ସୂଚନା ଦେଇଥିଲେ । ତାଙ୍କ ପରଲୋକ ସ୍ବର ଜଗତ ପାଇଁ ଏକ ଅପୂରଣୀୟ କ୍ଷତି । ଆଶାଙ୍କ ନିଧନରେ ତାଙ୍କ ଲକ୍ଷ ଲକ୍ଷ ପ୍ରଶଂସକ ମର୍ମାହତ ହୋଇଛନ୍ତି । ସାରା ବଲିଉଡ୍ ଜଗତରେ ଶୋକର ଛାୟା ଖେଳିଯାଇଛି ।

​​​​​​​

ଆଶା ଭୋସଲେ ପ୍ରସିଦ୍ଧ ଗାୟିକା ଦିବଂଗତ ଲତା ମଙ୍ଗେସକରଙ୍କ ସାନ ଭଉଣୀ । ବଡ଼ ଭଉଣୀଙ୍କ ଭଳି ଆଶାଙ୍କ କ୍ୟାରିଅର ସହଜ ନଥିଲା । ସ୍ବର ଜଗତରେ ନିଜକୁ ପ୍ରତିଷ୍ଠିତ କରାଇବାକୁ ତାଙ୍କୁ ଅନେକ ସଂଘର୍ଷ କରିବାକୁ ପଡିଥିଲା । ପରେ ସେହି ସଂଘର୍ଷ ତାଙ୍କୁ ପ୍ରତିଷ୍ଠିତ କରାଇ ପାରିଥିଲା । ୮୦ ବର୍ଷର ସିଗିଙ୍ଗ କ୍ୟାରିଅରରେ ସେ ଅନେକ ହିଟ୍ ଗୀତ ଦେଇଥିଲେ । ଏମିତିକି ୨୦ରୁ ଅଧିକ ଭାଷାରେ ୧୨,୦୦୦ରୁ ଅଧିକ ଗୀତ ଗାଇଥିଲେ ଆଶା । ଯେଉଁଥି ପାଇଁ ସେ ଗିନିଜ୍ ବୁକ୍ ଅଫ୍ ୱାର୍ଲ୍ଡ ରେକର୍ଡର ଅଧିକାରିଣୀ ମଧ୍ୟ ହୋଇପାରିଥିଲେ ।

ଆଶା ଭୋସଲେ ନିଜ କ୍ୟାରିଅରରେ ଭେରାଇଟି ଗୀତ ଗାଇଛନ୍ତି । ପାର୍ଟିରେ ବାଜୁଥିବା ‘ପିୟା ତୁ ଅବ୍ ତୋ ଆଜା’ଠୁ ଆରମ୍ଭ କରି ‘ଦିଲ୍ ଚିଜ୍ କ୍ୟା ହୈ’ ଯାଏଁ ତାଙ୍କ ସ୍ବର । ଆଶା ଭୋସଲେଙ୍କ ପ୍ରତ୍ୟେକ ଗୀତ ଥିଲା ଅନନ୍ୟ । ୧୯୪୩ ମସିହାରେ ଆଶା ତାଙ୍କ କ୍ୟାରିଅର ଆରମ୍ଭ କରିଥିଲେ । ବାପା ଦୀନାନାଥ ମଙ୍ଗେସକରଙ୍କ ଦେହାନ୍ତ ପରେ ଭାଙ୍ଗିପଡ଼ିଥିଲା ପୂରା ପରିବାର । ଏଭଳି ସମୟରେ ପରିବାରକୁ ସହଯୋଗ କରିବାକୁ ନିର୍ଣ୍ଣୟ ନେଇଥିଲେ ଆଶା । ବଡ଼ ଭଉଣୀ ଲତା ମଙ୍ଗେସକରଙ୍କ ସହ ସେ ଗୀତ ଗାଇବାକୁ ଆରମ୍ଭ କରିଥିଲେ । ୧୯୪୩ ମସିହାରେ ଏକ ମରାଠୀ ଫିଲ୍ମରେ ଆଶା ଭୋସଲେ ପ୍ରଥମ ଗୀତ ଗାଇଥିଲେ । ସେତେବେଳେ ତାଙ୍କୁ ମାତ୍ର ୧୦ ବର୍ଷ ବୟସ ହୋଇଥିଲା । ୧୯୪୮ ମସିହାର ଫିଲ୍ମ ଚୁନାରିଆରେ ଆଶା ଭୋସଲେ ପ୍ରଥମ ବଲିଉଡ୍ ଗୀତ ଗାଇଥିଲେ । ପରେ ପରେ ସେ ଅନେକ ଫିଲ୍ମରେ ଗୀତ ଗାଇଥିଲେ ।

ଆଶାଙ୍କ ବ୍ୟକ୍ତିଗତ ଓ ବୈବାହିକ ଜୀବନ ମଧ୍ୟ ବେଶ୍ ରୋଚକ ଥିଲା । ସେ ବଡ଼ ଭଉଣୀ ଲତା ମଙ୍ଗେସକରଙ୍କ ସେକ୍ରେଟାରୀ ଗଣପତରାଓ ଭୋସଲେଙ୍କୁ ବିବାହ କରିଥିଲେ । ବିବାହ ବେଳକୁ ତାଙ୍କୁ ମାତ୍ର ମାତ୍ର ୧୬ ବର୍ଷ ବୟସ ହୋଇଥିଲା । ଆଶାଙ୍କ ଏଭଳି ନିଷ୍ପତ୍ତିରେ ପରିବାର ଲୋକ ବେଶ୍ ଅସନ୍ତୁଷ୍ଟ ଥିଲେ ।

୧୯୫୭ ମସିହାରେ ଆଶା ନିଜ କ୍ୟାରିଅରରେ ସଫଳତାର ପାହାଚ ଚଢ଼ିବା ଆରମ୍ଭ କରିଥିଲେ । ମହମ୍ମଦ ରଫିଙ୍କ ସହ ସେ ଗାଇଥିବା ଗୀତ ‘ଉଡେ ଜବ୍ ଜବ୍ ଜୁଲଫେନ୍ ତେରୀ’ ବେଶ୍ ହିଟ୍ ହୋଇଥିଲା । ଏହାପରେ ଆଶା ଆଉ ପଛକୁ ଫେରି ଚାହିଁନଥିଲେ । କିନ୍ତୁ ତାଙ୍କ ବ୍ୟକ୍ତିଗତ ଜୀବନ ଏତେ ସହଜ ନଥିଲା । ଆଶା ଭୋସଲେ ଏବଂ ତାଙ୍କ ସ୍ୱାମୀ ଗଣପତରାଓ ଭୋସଲେଙ୍କ ମଧ୍ୟରେ ସବୁକିଛି ଠିକ୍ ନଥିଲେ । ବିବାହର କିଛି ବର୍ଷ ପରେ ସେ ପିଲାମାନଙ୍କ ସହ ସ୍ୱାମୀଙ୍କ ଘରଛାଡ଼ି ଚାଲିଯାଇଥିଲେ । ୧୯୫୦ରୁ ୧୯୮୦ ଦଶକ ପର୍ଯ୍ୟନ୍ତ, ଆଶା ଭୋସଲେ ଯଥେଷ୍ଟ ଖ୍ୟାତି ଅର୍ଜନ କରିଥିଲେ । ୧୯୯୦ ଦଶକରେ ଏ.ଆର. ରହମାନ ତାଙ୍କୁ ଫିଲ୍ମ ‘ରଙ୍ଗୀଲା’ର ଟାଇଟଲ୍ ଟ୍ରାକ୍ ପାଇଁ ମନୋନୀତି କରିଥିଲେ ।

ଆଶା ଭୋସଲେ ମହମ୍ମଦ ରଫି, କିଶୋର କୁମାର ଏବଂ ମନ୍ନା ଡେଙ୍କ ଭଳି ପ୍ରସିଦ୍ଧ ଗାୟକଙ୍କ ସହିତ ଅନେକ ଗୀତ ଗାଇଥିଲେ । ସେହି ସମୟର ପ୍ରସିଦ୍ଧ ସଂଗୀତଜ୍ଞ ରୋଶନ, ଓ.ପି. ନାୟର, ଏସ.ଡି. ବର୍ମନ, ଆର.ଡି. ବର୍ମନଙ୍କ ସହ ମଧ୍ୟ ଗୀତ କରିଥିଲେ । ଆଶା ଭୋସଲେ ସଂଗୀତଜ୍ଞ ଆର.ଡି. ବର୍ମନଙ୍କୁ ଦ୍ବିତୀୟ ବିବାହ କରିଥିଲେ । ୧୯୮୦ ଦଶକ ଆରମ୍ଭରେ ଉଭୟ ଏକାଠି ହୋଇଥିଲେ, କିନ୍ତୁ ୧୯୮୦ ଦଶକର ଶେଷ ସୁଦ୍ଧା ସେମାନେ ଅଲଗା ହୋଇଗଲେ । ଆର.ଡି. ବର୍ମନଙ୍କ ନିଶା ଅଭ୍ୟାସ ଏହାର କାରଣ ବୋଲି କୁହାଯାଏ । ସେମାନଙ୍କ ବିଚ୍ଛେଦ ସତ୍ତ୍ୱେ, ସେମାନଙ୍କର ବନ୍ଧୁତା ଅତୁଟ ରହିଥିଲା ।