କେନ୍ଦୁଝର ୨୯।୭: ଲଗାଣ ବର୍ଷାରୁ ବନ୍ୟା ସ୍ଥିତି ଭିତରେ କେନ୍ଦୁଝରରୁ ଏକ ଦୁଃଖଦ ଏବଂ ହୃଦୟବିଦାରକ ଘଟଣା ସାମ୍ନାକୁ ଆସିଛି । ଲଗାଣ ବର୍ଷାରେ ଜଳବନ୍ଦୀ ହୋଇଥିବା ଏକ ପରିବାରକୁ ସହାୟତା କରିବାକୁ ଯାଇ ନିଜ କର୍ତ୍ତବ୍ୟ ପାଳନ ବେଳେ ଜଣେ ଅଗ୍ନିଶମ କର୍ମଚାରୀଙ୍କ ଜୀବନ ଚାଲିଯାଇଛି । ପାଣି ନିଷ୍କାସନ କରୁଥିବା ସମୟରେ ବିଦ୍ୟୁତ୍ ସଂସ୍ପର୍ଶରେ ଆସି ସେ ଗୁରୁତର ହୋଇପଡ଼ିଥିଲେ। ତୁରନ୍ତ ତାଙ୍କୁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ନିଆଯାଇଥିଲେ ମଧ୍ୟ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଜନସେବା କରୁ କରୁ ଜଣେ ସାହସୀ ଅଗ୍ନିବୀରଙ୍କ ଏଭଳି ମୃତ୍ୟୁ ସମଗ୍ର ଜିଲ୍ଲାକୁ ଶୋକାକୁଳ କରିଦେଇଛି ।

ଲଘୁଚାପଜନିତ ଲଗାଣ ବର୍ଷାରେ କେନ୍ଦୁଝର ସହରର ଗଭମେଣ୍ଟ ଗାର୍ଲସ୍ ହାଇସ୍କୁଲ ସମ୍ମୁଖରେ ଥିବା ଏକ ଘରେ ପାଣି ଜମି ରହିଥିଲା। ଖବର ପାଇଁ ଅଗ୍ନିଶମ ବାହିନୀର ଏକ ଟିମ୍ ସେଠାରେ ପହଞ୍ଚି ପମ୍ପ ସାହାଯ୍ୟରେ ପାଣି ନିଷ୍କାସନ କାମ ଆରମ୍ଭ କରିଥିଲେ । ଏହି ସମୟରେ ଘର ପରିସରରେ ଥିବା ଏକ ଲୁଗା ଶୁଖା ତାର କୌଣସି କାରଣରୁ ବିଦ୍ୟୁତ୍ ସଂସ୍ପର୍ଶରେ ଆସି ଚାର୍ଜ ହୋଇ ରହିଥିଲା । ଅଜାଣତରେ ଅଗ୍ନିଶମ କର୍ମଚାରୀ ଜଣକ ସେହି ତାର ସଂସ୍ପର୍ଶରେ ଆସି ବିଦ୍ୟୁତ ଆଘାତର ଶିକାର ହୋଇ ତଳେ ପଡି ଯାଇଥିଲେ । ସହକର୍ମୀ ମାନେ ତୁରନ୍ତ ତାଙ୍କୁ ଉଦ୍ଧାର କରି କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ହେଲେ ସେଠାରେ ସମସ୍ତ ପ୍ରୟାସ ସତ୍ତ୍ୱେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

Also Read:- ଦେବଗଡ଼ରେ ଅଘଟଣ : ଚାଷକାମ ସାରି ଫେରୁଥିଲେ ଘରକୁ, ନାଳରେ ଭାସିଗଲେ ଚାଷୀ

ଜନସାଧାରଣଙ୍କ ସୁରକ୍ଷା ପାଇଁ ନିଜ କର୍ତ୍ତବ୍ୟ ପାଳନ କରୁଥିବା ବେଳେ ଜଣେ ଅଗ୍ନିଶମ କର୍ମଚାରୀଙ୍କ ଏଭଳି ଅକାଳ ବିୟୋଗ ସମସ୍ତଙ୍କୁ ସ୍ତବ୍ଧ କରିଦେଇଛି । ଏହି ଘଟଣା ପୁଣି ଥରେ ବର୍ଷା ସମୟରେ ବିଦ୍ୟୁତ୍ ସୁରକ୍ଷା ଓ ସତର୍କତାର ଆବଶ୍ୟକତାକୁ ସାମ୍ନାକୁ ଆଣିଛି ।