ଦୁବାଇ, ୦୯ /୦୩: ମଧ୍ୟପ୍ରାଚ୍ୟରେ ଅସମ୍ଭାଳ ସ୍ଥିତି । ଘନ ଘନ ଆକ୍ରମଣ କରୁଛି ଇରାନ । ସାଉଦି, କତାର, କୁଏତ, ୟୁଏଇ, ବାହାରିନ ଆଦି ଦେଶରେ ମିସାଇଲ୍ ବର୍ଷା କରୁଛି । ଏହି ସବୁ ଦେଶରେ ଥିବା ଆମେରିକାର ବେସ୍ କ୍ୟାମ୍ପକୁ ଟାର୍ଗେଟ୍ କରାଯାଉଛି । ଯେଉଁଥିରେ ଶହଶହ ଜୀବନ ଗଲାଣି । ଏହା ଭିତରେ ଇରାନ ମିସାଇଲର ଜବାବ ଦେଉଛି ୟୁଏଇ । କିପରି ଭାବେ ମିସାଇଲକୁ ଆକାଶରେ ଧ୍ୱଂସ କରାଯାଉଛି ତାହାର ଭିଡିଓ ରିଲିଜ୍ କରିଛି ।

ରିପୋର୍ଚ ଅନୁସାରେ, ରବିବାର ୟୁଏଇ ୧୬ଟି ବାଲିଷ୍ଟିକ୍ ମିସାଇଲ ଏବଂ ୧୧୩ ଡ୍ରୋନ୍ କୁ ଅକାମୀ କରିଦେଇଛି । ନିଜର ଏୟାର ଡିଫେନ୍ସ ସିଷ୍ଟମରେ ୧୬ଟି ମିସାଇଲକୁ ସମୁଦ୍ରରେ ଖସାଇ ଦିଆଯାଇଛି । ୧୧୭ ଡ୍ରୋନରୁ ୧୧୩ଟିକୁ ଇଣ୍ଟରସେପ୍ଟ୍ କରାଯାଇଛି ।

ୟୁଏଇର ପ୍ରତିରକ୍ଷା ମନ୍ତ୍ରାଳୟ ଏକ ୪୦ ସେକେଣ୍ଡର ଭିଡିଓ ପୋଷ୍ଟ୍ କରିଛି । ଏଥିରେ ଦେଖିବାକୁ ମିଳିଛି ଯେ, ୟୁଏଇ ଏୟାର ଡିଫେନ୍ସ ଇରାନ ଡ୍ରୋନକୁ ଇଣ୍ଟରସେପ୍ଟ୍ କରୁଛି । ଏବେସୁଦ୍ଧା ଇରାନ ୟୁଏଇ ଉପରେ ୨୩୮ଟି ବାଲିଷ୍ଟିକ୍ ମିସାଇଲ୍ ମାଡ କରିଛି । ଏହାମଧ୍ୟରୁ ୨୨୧କୁ ଧ୍ୱଂସ କରାଯାଇଛି । ୧୫ଟି ସମୁଦ୍ରରେ ପଡିଛି । ଦୁଇଟି ଦେଶର ବିଭିନ୍ନ ଜାଗାରେ ପଡିଛି ।

ସେହିପରି ୧୪୨୨ଟି ଇରାନର ଡ୍ରୋନକୁ ଠାବ କରାଯାଇଛି । ଏହା ଭିତରୁ ୧୩୪୨ଟି ଇଣ୍ଟରସେପ୍ଟ୍ କରାଯାଇଛି । ୮୦ଟି ଦେଶର ବିଭିନ୍ନ ସ୍ଥାନରେ ମାଡ ହୋଇଛି । ଏପରିକି ୮ଟି କ୍ରୁଜ୍ ମିସାଇଲ୍ ମଧ୍ୟ ଇଣ୍ଟରସେପ୍ଟ୍ କରାଯାଇଥିବା ୟୁଏଇ ଦାବି କରିଛି ।

ଏହି ଖବରଟି ପଢନ୍ତୁ... ପଲିଟିକ୍ସରୁ ବଲିଉଡ୍, ସବୁଠି ଟି-୨୦ କ୍ରେଜ୍ : ଶୁଭେଚ୍ଛା ଜଣାଇଲେ ରାଷ୍ଟ୍ରପତି, କେନ୍ଦ୍ରମନ୍ତ୍ରୀଙ୍କ ସମେତ ବିଶିଷ୍ଟ ବ୍ୟକ୍ତି

ଆହୁରି ମଧ୍ୟ ଇରାନର ଆକ୍ରମଣରେ ୪ ଜଣ ସାଧାରଣ ନାଗରିକ ପ୍ରାଣ ହରାଇଛନ୍ତି । ୧୧୨ ଜଣ ସାମାନ୍ୟ ଆହତ ହୋଇଛନ୍ତି । ଆହତଙ୍କ ମଧ୍ୟରେ ଭାରତ ସମେତ ୟୁଏଇ, ଇଜିପ୍ଟ, ବାଂଲାଦେଶ, ପାକିସ୍ତାନ,ଶ୍ରୀଲଙ୍କା, ୟେମେନ, ଉଗାଣ୍ଡା, ଲେବାନନ, ଆଫଗାନିସ୍ତାନ ଏବଂ ତୁର୍କୀର ନାଗରିକ ରହିଛନ୍ତି ।