ଅହମ୍ମଦାବାଦ, ୦୯ /୦୩: ତୃତୀୟ ଥର ପାଇଁ ଟି୨୦ ବିଶ୍ୱକପ୍ ଚାମ୍ପିଅନ୍ ହୋଇଛି ଭାରତ । ସୂର୍ଯ୍ୟ କୁମାର ଯାଦବଙ୍କ ନେତୃତ୍ୱରେ ଅହମ୍ମଦାବାଦରେ ଟିମ୍ ଇଣ୍ଡିଆ ଇତିହାସ ରଚିଛି । ଭାରତର ବିଜୟ ପରେ ଦେଶରେ ସବୁଠି ଉତ୍ସବର ମାହୋଲ । ଅନେକ ବିଶିଷ୍ଟ ବ୍ୟକ୍ତି ଟିମ୍ ଇଣ୍ଡିଆର ପ୍ରଦର୍ଶନକୁ ପ୍ରଶଂସା କରିବା ସହ ଶୁଭେଚ୍ଛା ଜଣାଇଛନ୍ତି ।

ରାଷ୍ଟ୍ରପତି ଦ୍ରୌପଦୀ ମୁର୍ମୁ କହିଛନ୍ତି ଯେ, ଭାରତୀୟ ଦଳକୁ ଅନେକ ଅନେକ ଶୁଭେଚ୍ଛା । ଏକମାତ୍ର ଦେଶ ଭାବେ ଭାରତ ତିନି ଥର ଚାମ୍ପିଅନ୍ ହୋଇଛି । ଏହା ଭାରତୀୟ ପ୍ରଶଂସକଙ୍କ ଫାଇଁ ଖାସ୍ ଦିନ । ଦେଶରେ କ୍ରିକେଟକୁ ନେଇ ଖୁବ୍ ପ୍ରତିଭା ରହିଛି । ଖେଳାଳିଙ୍କ ସହ ସପୋର୍ଟ ଷ୍ଟାଫ୍ ମଧ୍ୟ ବିଜୟର ଶ୍ରେୟର ହକଦାର୍ ।

ସେହିପରି କେନ୍ଦ୍ର ଗୃହମନ୍ତ୍ରୀ ଅମିତ ଶାହ କହିଛନ୍ତି ଯେ, ଏହା ହେଉଛି ଦମଦାର ବିଜୟ । ଭାରତୀୟ ଦଳ ପଡିଆରେ ଉଚ୍ଚକୋଟୀର ପ୍ରଦର୍ଶନ କରିଛି । ଟୁର୍ଣ୍ଣାମେଣ୍ଟରେ ଦଳର ପଲ୍ଲା ଭାରି ରହିଥିଲା । ଭାରତୀୟ ଦଳକୁ ଅନେକ ଅନେକ ଅଭିନନ୍ଦନ । ସେହିପରି ବିଜେପି ସଭାପତି ନୀତିନ ନବୀନ କହିଛନ୍ତି ଯେ, ଭାରତ ବଡ ବିଜୟ ହାସଲ କରିଛି । ଏହା ହେଉଛି ଦଳର ଶୃଙ୍ଖଳା ଏବଂ ଦଳଗତ ପ୍ରଦର୍ଶନର ଫଳ । ଖେଳାଳିମାନେ ଦେଶ ପାଇଁ ଗର୍ବ ଆଣିଛନ୍ତି ।

ଆଇସିସି ସଭାପତି ଜୟ ଶାହ କହିଛନ୍ତି ଯେ, ଫାଇନାଲ ମୁକାବିଲା ସବୁଠୁ ଖାସ୍ । ଭାରତୀୟ ଦଳକୁ ଅଭିନନ୍ଦନ । ପ୍ରଥମ ଟିମ୍ ଭାବେ ଭାରତ ରଗାତାର ଦୁଇଟି ଟି୨୦ ଟ୍ରଫି ହାସଲ କରିଛି । ଅନ୍ୟ ଦିଗରେ ଓଡିଶାର ବିରୋଧୀ ଦଳ ନେତା ନବୀନ ପଟ୍ଟନାୟକ କହିଛନ୍ତି ଯେ, ମେନ୍ ଇନ୍ ବ୍ଲୁ ଟ୍ରଫି ଉଠାଇଛି । ଭାରତ ସବୁବେଳେ କ୍ରିକେଟରେ ନିଜର ଦବଦବା ଜାହିର କରିଛି । ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲ ମଧ୍ୟ ଭାରତୀୟ ଦଳକୁ ଅଭିନନ୍ଦନ ଜଣାଇଛନ୍ତି ।

କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ସବୁଠୁ ବଡ ଷ୍ଟାଡିୟମରେ ଭାରତ ଐତିହାସିକ ବିଜୟ ଲାଭ କରିଛି । ସେହିପରି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଭାରତୀୟ ଦଳକୁ ବିଜୟର ଶୁଭେଚ୍ଛା ଜଣାଇଛନ୍ତି । ପ୍ରଥମ ଦଳ ଭାବେ ଭାରତ ତିନୋଟି ଆଇସିସି ଟି୨୦ ବିଶ୍ୱକପ୍ ଟ୍ରଫି ହାତେଇଥିବାରୁ ସେ ଅଭିନନ୍ଦନ ମଧ୍ୟ ଜଣାଇଛନ୍ତି ।

ସେହିପରି ଶିଳ୍ପପତି ଆନନ୍ଦ ମହିନ୍ଦ୍ରା କହିଛନ୍ତି ଯେ, ଭାରତ ଜବରଦସ୍ତ ବିଜୟ ପାଇଛି । ଦଳ ବିଜୟର ହକଦାର୍ ଥିଲା । ସଞ୍ଜୁ ସାମସନ ଏବଂ ଅଭିଷେକ ଶର୍ମା ମୁକାବିଲାରେ ବଡ ସ୍କୋର କରିଥିଲେ । ଏହା ଖୁବ୍ ପ୍ରଭାବିତ କରିଥିବା ଆନନ୍ଦ ଏକ୍ସରେ ଉଲ୍ଲେଖ କରିଛନ୍ତି । ବଲିଉଡର ମହାନ ଅଭିନେତା ଅମିତାଭ ବଚ୍ଚନ ଭାରତୀୟ ଦଳର ଉଚ୍ଚକୋଟୀର ପ୍ରଦର୍ଶନ ଏବଂ ବିଜୟ ପାଇଁ ଅଭିନନ୍ଦନ ଜଣାଇଛନ୍ତି ।