ସେଉଟା: ଉତ୍ତର ମରକ୍କୋରେ ସ୍ପେନର ସେଉଟା ସହରକୁ ପାଖାପାଖି ୬୦,୦୦୦ ପ୍ରବାସୀ ପଶି ଆସିଛନ୍ତି, ଯାହାକୁ ଏବେ ବଡ଼ ସଂକଟ ଭାବେ ଦେଖା ଯାଉଛି ଓ ପୁରା ୟୁରୋପୀୟ ସଂଘ ଲାଗି ଚିନ୍ତାର କାରଣ ପାଲଟିଛି। ୮୦ ହଜାର ଜନସଂଖ୍ୟାର ସେଉଟା ସହକୁ ଏତେ ସଂଖ୍ୟକ ଲୋକେ ପଶି ଆସିବା ବାସ୍ତବିକ ଚିନ୍ତାଜନକ। ସ୍ଥାନୀୟ ଅଧ୍ୟକ୍ଷ ଜୁଆନ ଜିସସ୍ ଭିୱାଜ ଏକ ଅନୁମାନରେ ଗତ ୨ରୁ ୩ ଦିନରେ ଏତେ ସଂଖ୍ୟକ ପ୍ରବାସୀ ସ୍ପେନୀୟ କ୍ଷେତ୍ରକୁ ପ୍ରବେଶ କରିସାରିଥିବା କହିଛନ୍ତି।

ଅଚାନକ ହୋଇଥିବା ଏହି ଘଟଣା ପାଇଁ ମାଦ୍ରିଦକୁ ଏହି କ୍ଷେତ୍ର ସୁରକ୍ଷା ବଢାଇବାକୁ ବାଧ୍ୟ କରିଛି। ଲୋକଙ୍କୁ ନିୟନ୍ତ୍ରଣ କରିବା ପାଇଁ ସ୍ପେନ ସେନା ଓ ଅତିରିକ୍ତ ପୋଲିସ ମୁତୟନ କରିଛି, ଯେଉଁଥିରେ ବୁଡାଳୀଙ୍କୁ ମଧ୍ୟ ସାମିଲ କରାଯାଇଛି। ଉପୁଜିଥିବା ପରିସ୍ଥିତିରେ ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜ ଓ ଗୃହମନ୍ତ୍ରୀ ଶୁକ୍ରବାର ସେଉଟା ଗସ୍ତ କରିଛନ୍ତି। ସ୍ପେନ ସୀମାକୁ ପ୍ରବେଶ ଉଦ୍ୟମରେ ଏପର୍ଯ୍ୟନ୍ତ ୪୧ ଜଣଙ୍କ ମୃତ୍ୟୁ ହେଲାଣି। ଏମାନଙ୍କ ମଧ୍ୟରୁ ଅଧିକାଂଶ ଲୋକେ ସୀମା ଅବରୋଧ ପାର କରିବାକୁ ଯାଇ ପାଣିରେ ବୁଡି ପ୍ରାଣ ହରାଇଥିବା କୁହାଯାଇଛି। ସ୍ପେନ ଅଧିକାରୀ କ୍ଷେତ୍ରକୁ ଅଧିକ ସୈନ୍ୟ ପଠାଇଥିବା ବେଳେ ୟୁରୋପୀୟ ସଂଘ ସୀମାରେ ଶୃଙ୍ଖଳା କାୟମ କରିବା ଲାଗି ସହାୟତା କରିବାକୁ ହାତ ବଢାଇଛି।

ପ୍ରବାସୀଙ୍କ ଏପରି ଆଗମନ ପୁରା ୟୁରୋପରେ ରାଜନୈତିକ ଉତ୍ତେଜନାର କାରଣ ପାଲଟିଛି। ଇଟାଲୀ ୟୁରୋପୀୟ ସଂଘର ବାହ୍ୟ ସୀମାକୁ ନେଇ ଅସାଧାରଣ ଉପାୟର ସମ୍ଭାବନା ବ୍ୟକ୍ତ କରିଛି। ତେବେ ସ୍ପେନ ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜ ଏତେ ସଂଖ୍ୟ ପ୍ରବାସୀ ଅଚାନକ ପହଞ୍ଚିବା ଲାଗି ମାନବ ତସ୍କରଙ୍କୁ ଦାୟି କରିଛନ୍ତି। କହିଛନ୍ତି ଯେ ଏମାନେ ସ୍ପେନ ସର୍ବୋଚ୍ଚନ୍ୟାୟାଳୟଙ୍କ ସେହି ରାୟକୁ ନେଇ ଗୁଜବ ରଟାଇଛନ୍ତି ଯେଉଁଥିରେ ସମୁଦ୍ର ରାସ୍ତାରେ ଆସିଥିବା ଅବୈଧ ପ୍ରବାସୀଙ୍କୁ ତୁରନ୍ତ ଫେରସ୍ତ ପଠାଯାଇ ପାରିବନି ବୋଲି କୁହାଯାଇଥିଲା। ସାଞ୍ଜେଜ୍ କହିଛନ୍ତି ଯେ ମରକ୍କୋ ଅଧିକାରୀଙ୍କ ସହ କଥା ବାର୍ତ୍ତାରୁ ଏ କଥା ସାମ୍ନାକୁ ଆସିଛି।

ମରକ୍କୋର ମାନବ ତସ୍କରମାନେ ସ୍ପେନ ସୁପ୍ରିମକୋର୍ଟଙ୍କ ରାୟକୁ ନିଜ ଲାଭ ନିମନ୍ତେ ବ୍ୟାଖ୍ୟା କରିଛନ୍ତି। ସେମାନଙ୍କ ଏହି ବ୍ୟାଖ୍ୟା ବନାଗ୍ନି ଭଳି ବ୍ୟାପିଯାଇଛି ଓ ଲୋକେ ସେଉଟାକୁ ଧାଡି ବାନ୍ଧିଛନ୍ତି। ସ୍ପେନ ସର୍ବୋଚ୍ଚ ନ୍ୟାୟାଳୟ ଜୁଲାଇ ୮ ତାରିଖ ରାୟରେ କହିଥିଲେ ଯେ ପ୍ରଶାସନିକ ନିଷ୍କାସନ ପ୍ରକ୍ରିୟା ଆରମ୍ଭ ନ କରି କୌଣସି ପ୍ରବାସୀଙ୍କୁ ତୁରନ୍ତ ଫେରସ୍ତ ପଠାଇବା ନିୟମ ସମୁଦ୍ର ମାର୍ଗରେ ଆସିଥିବା ପ୍ରବାସୀଙ୍କ ନିମନ୍ତେ ଲାଗୁ ହେଉ ନାହିଁ।

ୟୁରୋପୀୟ ସଂଘ ମୁଖ୍ୟ ଉର୍ସୁଲା ଭନଡେର ଲେୟେନ ସୋସିଆଲ ମିଡିଆ ପୋଷ୍ଟରେ ସ୍ୟୁଟା ଘଟଣାକୁ ଅସ୍ୱୀକାର୍ଯ୍ୟ ବୋଲି କହିଛନ୍ତି। ସେ କହିଛନ୍ତି ଆମେ କାହାରିକୁ ଆମ ନିୟମ ନମାନି ଆମର ୟୁରୋପୀୟ ସଂଘକୁ ଆସିବାକୁ ଅନୁମତି ଦେଇ ପାରିବୁନି। ଏଥି ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସେଉଟା ପ୍ରବାସୀ ସଂକଟକୁ ଭୟାନକ ବୋଲି କହିଛନ୍ତି। ସେ କହିଛନ୍ତି ଯେ ଯଦି ବିରୋଧୀ ଡେମୋକ୍ରାଟିକ୍ ପାର୍ଟି ନିର୍ବାଚନ ଜିତିଥାଆନ୍ତା ତେବେ ଆମେରିକାକୁ ବି ଏବେ ଏଭଳି ପରିସ୍ଥିତି ଦେଖିବାକୁ ପଡୁଥାଆନ୍ତା।