ନୂଆଦିଲ୍ଲୀ ,୧୯ /୧୧ -; ଗୋଟିଏ ପରିବାରର ଦୁଇଟି ପ୍ରେମ କାହାଣୀର ସ୍ମୃତି ଯୋଡି ହୋଇ ରହିଛି ଗୋଟିଏ ରେଷ୍ଟୁରାଣ୍ଟ ସହିତ । ସେହି ରେଷ୍ଟୁରାଣ୍ଟରେ ହିଁ ପ୍ରଥମ ଥର ପାଇଁ ଭେଟ ହୋଇଥିଲେ ରାଜୀବ ଗାନ୍ଧୀ ଓ ସୋନିଆ ଗାନ୍ଧୀ। ଆଉ ଏହି ସ୍ଥାନକୁ ନିଜ ଆଖିରେ ଦେଖିବାକୁ ଦିନେ ନିଜ ଗର୍ଲଫ୍ରେଣ୍ଡଙ୍କୁ ନେଇ ଯାଇଥିଲେ ରାହୁଲ ଗାନ୍ଧୀ। ହେଲେ ଯେଉଁ ରେଷ୍ଟୁରାଣ୍ଟର ଖାଦ୍ୟକୁ ତାଙ୍କ ବାପା ଓ ମାଆ ଖୁବ୍ ପ୍ରଶଂସା କରୁଥିଲେ, ସେଠାକାର ଖାଦ୍ୟ ରାହୁଲଙ୍କୁ ଆଦୌ ପସନ୍ଦ ଆସିନଥିଲା। ମାଆ ସୋନିଆ ଗାନ୍ଧୀଙ୍କ ସ୍ମୃତି ପୁସ୍ତକ 'Belonging'ର ଉନ୍ମୋଚନ ଅବସରରେ ଏହି ମଜାଦାର ଅନୁଭୂତି ସେୟାର କରିଛନ୍ତି ରାହୁଲ।

କେମ୍ବ୍ରିଜ୍ରେ ପଢ଼ୁଥିବା ସମୟର ଏହି ଘଟଣାକୁ ମନେ ପକାଇ ରାହୁଲ କହିଛନ୍ତି, ସେତେବେଳେ ସେ ନିଜ ଗର୍ଲଫ୍ରେଣ୍ଡଙ୍କୁ କେମ୍ବ୍ରିଜ୍ର ଷ୍ଟ୍ରିଟ୍ ଆଣ୍ଡ୍ରୁଜ୍ ଷ୍ଟ୍ରିଟ୍ରେ ଥିବା 'ଭର୍ସିଟି ରେଷ୍ଟୁରାଣ୍ଟ'କୁ ନେଇ ଯାଇଥିଲେ। କାରଣ ଏହି ରେଷ୍ଟୁରାଣ୍ଟରେ ହିଁ ତାଙ୍କ ବାପା ରାଜୀବ ଗାନ୍ଧୀ ଓ ମାଆ ସୋନିଆ ଗାନ୍ଧୀ ପ୍ରଥମ ଥର ପାଇଁ ସାକ୍ଷାତ କରିଥିଲେ। ନିଜ ବାପା-ମାଆଙ୍କ ପ୍ରେମ କାହାଣୀ ସହ ଜଡ଼ିତ ଏହି ସ୍ଥାନକୁ ନିଜେ ଦେଖିବାକୁ ଚାହୁଁଥିଲେ ରାହୁଲ।

ରେଷ୍ଟୁରାଣ୍ଟରେ ପହଞ୍ଚିବା ପରେ ରାହୁଲ ଓ ତାଙ୍କ ଗର୍ଲଫ୍ରେଣ୍ଡ ୱେଟରଙ୍କୁ ସେଠାକାର ସ୍ୱତନ୍ତ୍ର ଖାଦ୍ୟ ବିଷୟରେ ପଚାରିଥିଲେ। ୱେଟର୍ ସେମାନଙ୍କୁ 'ଚିକେନ୍ ଚାସର୍' ଖାଇବାକୁ ପରାମର୍ଶ ଦେଇଥିଲେ। ଏହାପରେ ଦୁହେଁ ସେହି ଖାଦ୍ୟ ଅର୍ଡର କରିଥିଲେ।

କିନ୍ତୁ ଏଠାରେ ଥିଲା ଏକ ମଜାଦାର ମୋଡ଼। ରାହୁଲଙ୍କ କହିବା ଅନୁସାରେ, ତାଙ୍କ ବାପା ଓ ମାଆ ସବୁବେଳେ ଏହି ରେଷ୍ଟୁରାଣ୍ଟର ଖାଦ୍ୟର ଖୁବ୍ ପ୍ରଶଂସା କରୁଥିଲେ। ହେଲେ ନିଜ ଅନୁଭୂତିରେ ସେଠାକାର ଖାଦ୍ୟ ତାଙ୍କୁ ଆଦୌ ଭଲ ଲାଗିନଥିଲା। ଏପରିକି ସେ ଖାଦ୍ୟକୁ ଖୁବ୍ ଖରାପ ବୋଲି କହିଥିଲେ।

ନିଜ କଥାକୁ ଆହୁରି ମଜାଦାର କରି ରାହୁଲ କହିଥିଲେ, "ଯଦି ଆପଣ ପ୍ରେମରେ ପଡ଼ିବାକୁ ଚାହୁଁଛନ୍ତି, ତେବେ ଭର୍ସିଟି ରେଷ୍ଟୁରାଣ୍ଟକୁ ଯାଆନ୍ତୁ। କିନ୍ତୁ ସେଠାରେ କେବେ ବି ଚିକେନ୍ ଚାସର୍ ଖାଆନ୍ତୁ ନାହିଁ।" ରାହୁଲଙ୍କ ଏହି ମଜାଦାର କଥା ଶୁଣି ସଭାରେ ହସର ମାହୋଲ ସୃଷ୍ଟି ହୋଇଥିଲା।

କ'ଣ ଥିଲା ଏହି ରେଷ୍ଟୁରାଣ୍ଟର ବିଶେଷତ୍ୱ?

କେମ୍ବ୍ରିଜ୍ର ଷ୍ଟ୍ରିଟ୍ ଆଣ୍ଡ୍ରୁଜ୍ ଷ୍ଟ୍ରିଟ୍ରେ ଥିବା ଭର୍ସିଟି ରେଷ୍ଟୁରାଣ୍ଟ ଏକଦା ଲୋକପ୍ରିୟ ଖାଇବା ସ୍ଥାନ ଥିଲା। ଏଠାରେ ବ୍ରିଟିଶ୍, ଫ୍ରେଞ୍ଚ ଓ କେପ୍ ଅଞ୍ଚଳର ଖାଦ୍ୟ ସହ ଘରୋଇ ଶୈଳୀରେ ପ୍ରସ୍ତୁତ ଖାଦ୍ୟ ମିଳୁଥିଲା। କିନ୍ତୁ ବର୍ତ୍ତମାନ ଏହି ରେଷ୍ଟୁରାଣ୍ଟ ବନ୍ଦ ହୋଇଯାଇଥିବା ଜଣାପଡ଼ିଛି।

ସେହି ସମୟରେ ଇଂଲଣ୍ଡରେ ରହୁଥିବା ସୋନିଆ ଗାନ୍ଧୀଙ୍କ ପାଇଁ ନିଜ ଦେଶ ଇଟାଲୀର ଖାଦ୍ୟ ଖୋଜିବା ସହଜ ନଥିଲା। ସେ ଇଟାଲୀୟ ଖାଦ୍ୟ ଖାଇବାରେ ଅଭ୍ୟସ୍ତ ଥିଲେ। ତେଣୁ ନିଜ ଘରର ଖାଦ୍ୟ ଭଳି ସ୍ୱାଦ ଥିବା ଖାଦ୍ୟ ଖୋଜୁଥିଲେ। ସୋନିଆଙ୍କ ସ୍ମୃତି ଅନୁସାରେ, ସେହି ସ୍ଥାନଟି ଏକ ଛୋଟ ଗ୍ରୀକ୍ ରେଷ୍ଟୁରାଣ୍ଟ ଥିଲା। ସୋନିଆ ଗାନ୍ଧୀ ନିଜ ସ୍ମୃତିରେ ରାଜୀବ ଗାନ୍ଧୀଙ୍କ ସହ ପ୍ରଥମ ସାକ୍ଷାତକୁ ମନେ ପକାଇ ଲେଖିଛନ୍ତି, "ମୋର ପ୍ରେମ ଯାତ୍ରା ସେହିଠାରୁ ଆରମ୍ଭ ହୋଇଥିଲା।"

also read- ଭିଆଇପିଙ୍କ ପାଇଁ ରାସ୍ତା ସଫା କରୁଛ, ସାଧାରଣ ଲୋକଙ୍କ ପାଇଁ କାହିଁକି ନୁହେଁ ? ପ୍ରଶ୍ନ କଲେ ମୁମ୍ବାଇ ହାଇକୋର୍ଟ

ଏକ ଛୋଟ ରେଷ୍ଟୁରାଣ୍ଟରେ ଆରମ୍ଭ ହୋଇଥିବା ଏହି ପ୍ରେମ କାହାଣୀ ପରବର୍ତ୍ତୀ ସମୟରେ ଏକ ପରିବାରର ସୁନ୍ଦର ସ୍ମୃତି ହୋଇ ରହିଗଲା। ଆଉ ସେହି ସ୍ମୃତି ସହ ଜଡ଼ିତ ରେଷ୍ଟୁରାଣ୍ଟକୁ ନେଇ ରାହୁଲଙ୍କ ଏହି ମଜାଦାର ଅନୁଭୂତି ଏବେ ଚର୍ଚ୍ଚାରେ।