ଭୁବନେଶ୍ୱର: ଶ୍ରୀଲିଙ୍ଗରାଜ ମନ୍ଦିରର ସଂରକ୍ଷଣ, ରକ୍ଷଣାବେକ୍ଷଣ ଓ ସୁପରିଚାଳନାକୁ ବ୍ୟବସ୍ଥିତ କରିବା ଦିଗରେ ଆଉ ଏକ ପଦକ୍ଷେପ । ଲିଙ୍ଗରାଜ ମନ୍ଦିର ସତ୍ତ୍ୱଲିପି କମିଟି ପକ୍ଷରୁ ଜଷ୍ଟିସ୍ ଡ. ଦୁର୍ଗା ପ୍ରସନ୍ନ ଚୌଧୁରୀ ରାଜ୍ୟ ସରକାରଙ୍କୁ ତୃତୀୟ ଅନ୍ତରୀଣ ରିପୋର୍ଟ ପ୍ରଦାନ କରିଛନ୍ତି । ଶୁକ୍ରବାର ବିଭାଗୀୟ ମନ୍ତ୍ରୀଙ୍କୁ ଏହି ରିପୋର୍ଟ ହସ୍ତାନ୍ତର କରାଯାଇଛି। ଆସନ୍ତା ୪ରୁ ୫ ମାସ ମଧ୍ୟରେ ଚୂଡ଼ାନ୍ତ ରିପୋର୍ଟ ଦାଖଲ ହେବ ବୋଲି ଆଶା ପ୍ରକାଶ କରାଯାଇଛି ।

ଏହି ରିପୋର୍ଟରେ ମନ୍ଦିରର ବିଭିନ୍ନ ସେବା, ପାଳି ଓ ନୀତିକାନ୍ତି ସମେତ ମନ୍ଦିରର ବର୍ତ୍ତମାନର ସ୍ଥିତି ଏବଂ ଏହାର ସୁଧାର ପାଇଁ ବିଭିନ୍ନ ପ୍ରସ୍ତାବ ଉପରେ ମତାମତ ଦିଆଯାଇଛି। ବିଶେଷକରି ମନ୍ଦିରର ଦୂରାବସ୍ଥାର ସମାଧାନ କରିବା ସହ ଗର୍ଭଗୃହ ଏବଂ ଅନ୍ୟାନ୍ୟ ଅଂଶର ସଂରକ୍ଷଣ ଓ ଉନ୍ନତିକରଣ ଉପରେ ଗୁରୁତ୍ୱ ଦିଆଯାଇଛି।

ମନ୍ଦିରର ସଂରକ୍ଷଣ ଓ ରକ୍ଷଣାବେକ୍ଷଣ ଦାୟିତ୍ୱରେ ଥିବା ଏଏସ୍ଆଇ (ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ) ଏବଂ ଅନ୍ୟ ସମ୍ପୃକ୍ତ ସଂସ୍ଥାଗୁଡ଼ିକ କିପରି ମନ୍ଦିରର ବିଭିନ୍ନ ଅଂଶର ଉନ୍ନତି ଓ ସଂରକ୍ଷଣ କାର୍ଯ୍ୟକୁ ଅଧିକ ସୂଚାରୁ ଭାବେ କରିପାରିବେ, ସେନେଇ ରିପୋର୍ଟରେ ପ୍ରସ୍ତାବ ରହିଛି। ଏହାଦ୍ୱାରା ମନ୍ଦିରର ସଂରକ୍ଷଣ, ରକ୍ଷଣାବେକ୍ଷଣ ଓ ପରିଚାଳନା ବ୍ୟବସ୍ଥାରେ ସୁଧାର ଆସିବ ବୋଲି ଆଶା କରାଯାଉଛି।

ଲିଙ୍ଗରାଜ ମନ୍ଦିର ପାଇଁ ସ୍ୱତନ୍ତ୍ର ଆଇନ ଉପରେ ଗୁରୁତ୍ୱ

ଶ୍ରୀଲିଙ୍ଗରାଜ ମନ୍ଦିରର ସୁପରିଚାଳନା ପାଇଁ ଏକ ସ୍ୱତନ୍ତ୍ର ଆଇନ ପ୍ରଣୟନ କରିବା ଆବଶ୍ୟକ ବୋଲି ଜଷ୍ଟିସ୍ ଡ. ଚୌଧୁରୀ ମତ ଦେଇଛନ୍ତି। ପୁରୀ ଶ୍ରୀଜଗନ୍ନାଥ ମନ୍ଦିର ପାଇଁ ଯେପରି ସ୍ୱତନ୍ତ୍ର ଆଇନ ରହିଛି, ସେହିପରି ଶ୍ରୀଲିଙ୍ଗରାଜ ମନ୍ଦିର ପାଇଁ ମଧ୍ୟ ଏକ ସ୍ୱତନ୍ତ୍ର ଆଇନ ଆଣିବାକୁ କମିଟି ପ୍ରଥମରୁ ହିଁ ରାଜ୍ୟ ସରକାରଙ୍କୁ ସୁପାରିସ କରିଥିବା ସେ କହିଛନ୍ତି। ଏନେଇ ରାଜ୍ୟ ସରକାର ସଚେତନ ଥିବାରୁ ଖୁବ୍ଶୀଘ୍ର ଏହି ଆଇନ ପ୍ରଣୟନ ହେବ ବୋଲି କମିଟି ଆଶା ପ୍ରକାଶ କରିଛି। ତେବେ ଆଇନ ପ୍ରଣୟନ କରିବା ସରକାରଙ୍କ ଦାୟିତ୍ୱ ବୋଲି ସେ ସ୍ପଷ୍ଟ କରିଛନ୍ତି।

ପାଳି ଓ ନୀତିକାନ୍ତିରେ ସୁଧାର ଆଶା

ମନ୍ଦିରର ପାଳି ଓ ନୀତିକାନ୍ତି ପରିଚାଳନା ସମ୍ପର୍କରେ ହେଉଥିବା ବ୍ୟବସ୍ଥା ଏବଂ ପ୍ରସ୍ତାବିତ ନୂତନ ଆଇନ ପ୍ରଣୟନ ପ୍ରକ୍ରିୟା ଭବିଷ୍ୟତରେ ମନ୍ଦିରର ପରିଚାଳନା ବ୍ୟବସ୍ଥାକୁ ଅଧିକ ସୁଦୃଢ଼ କରିବ ବୋଲି ଜଷ୍ଟିସ୍ ଡ. ଚୌଧୁରୀ ଆଶା ବ୍ୟକ୍ତ କରିଛନ୍ତି।

ଚୂଡ଼ାନ୍ତ ରିପୋର୍ଟ ଦାଖଲ ପରେ ଶ୍ରୀଲିଙ୍ଗରାଜ ମନ୍ଦିରର ସଂରକ୍ଷଣ, ସେବା ବ୍ୟବସ୍ଥା ଓ ପରିଚାଳନା କ୍ଷେତ୍ରରେ ଆହୁରି ସ୍ପଷ୍ଟ ଦିଗ୍ଦର୍ଶନ ମିଳିବା ସହ ମନ୍ଦିରର ସାମଗ୍ରିକ ଉନ୍ନତି ପାଇଁ ପଥ ପ୍ରଶସ୍ତ ହେବ ବୋଲି ଆଶା କରାଯାଉଛି।