ମୁମ୍ଵାଇ ୧୫।୦୫; ପଞ୍ଜାବୀ ଗାୟକ ତଥା ଅଭିନେତା ଦିଲଜିତ ଦୋସାଞ୍ଜ ଏବେ ଖୁବ୍ ଚର୍ଚ୍ଚାରେ । ଗତ କିଛି ଦିନ ଧରି ସେ ତାଙ୍କର ‘ଓରା ୱାର୍ଲ୍ଡ ଟୁର୍ ୨୦୨୬’କୁ ନେଇ ସୋସିଆଲ ମିଡିଆରେ ରାଜ୍ କରୁଛନ୍ତି। ସେ ଉତ୍ତର ଆମେରିକାରେ ଅନେକ ଲାଇଭ୍ ପରଫମାନ୍ସ କରୁଛନ୍ତି । ଯାହାର ଭିଡିଓ ଗୁଡ଼ିକ ମଧ୍ୟ ବେଶ ଭାଇରାଲ ହେଉଛି। ଏସବୁ ମଧ୍ୟରେ, ତାଙ୍କ ବ୍ୟକ୍ତିଗତ ଜୀବନ ସମ୍ପର୍କିତ ଏକ ଖବର ସାମ୍ନାକୁ ଆସିଛି ଯାହା ପ୍ରଶଂସକମାନଙ୍କୁ ଆଶ୍ଚର୍ଯ୍ୟ କରିଦେଇଛି । ଯାଏ ଏବେ ସୋସିଆଲ ମିଡିଆରେ ହଇଚଇ ସୃଷ୍ଟି କରିଛି।

ଭାରତୀୟ ନୁହଁନ୍ତି ଦିଲଜିତ

ରିପୋର୍ଟ ଅନୁସାରେ, ଦିଲଜିତ ଭାରତୀୟ ନାଗରିକ ନୁହଁନ୍ତି। ସେ ୨୦୨୨ ରେ ଆମେରିକୀୟ ନାଗରିକତା ହାସଲ କରିଥିବା ଜଣାପଡ଼ିଛି । ସେହି ବର୍ଷ ସେପ୍ଟେମ୍ବରରୁ ଆମେରିକୀୟ ପାସପୋର୍ଟ ବ୍ୟବହାର କରୁଛନ୍ତି। ଦିଲଜିତ ଏବେ ଭାରତ ଯାତ୍ରା କରିବା ପାଇଁ ଇ-ଭିସା ବ୍ୟବହାର କରନ୍ତି। ରିପୋର୍ଟ ଅନୁଯାୟୀ ଦିଲଜିତଙ୍କ ଭାରତୀୟ ପାସପୋର୍ଟ ଶେଷ ଥର ପାଇଁ ୨୦୧୮ରେ ମୁମ୍ବାଇ ଏବଂ ଜାମ୍ବିଆରୁ ଜାରି କରାଯାଇଥିଲା। ଏହା ବ୍ୟତୀତ, ତାଙ୍କ ପତ୍ନୀ ସନ୍ଦୀପ କୌର ମଧ୍ୟ ଜଣେ ଆମେରିକୀୟ ନାଗରିକ ବୋଲି ଜଣାପଡିଛି।

ଆମେରିକାର ନାଗରିକତା ହାସଲ କରିବା ପରେ, ଦିଲଜିତ୍ ତାଙ୍କ ଦଲିଲରେ କାଲିଫର୍ନିଆରେ ଥିବା ଏକ ୫ ବିଏଚକେ ବିଶିଷ୍ଟ ବଙ୍ଗଳାର ଆନୁଷ୍ଠାନିକ ଭାବରେ ପଞ୍ଜୀକୃତ କରିଥିଲେ। ତେବେ ଏନେଇ ଦିଲଜିତ୍ କିମ୍ବା ତାଙ୍କ ଟିମ୍ଏ‌ହି ଖବରର ସତ୍ୟତାକୁ ନିଶ୍ଚିତ କିମ୍ବା ଅସ୍ୱୀକାର କରିବା ପାଇଁ କୌଣସି ବିବୃତ୍ତି ଜାରି କରିନାହାଁନ୍ତି।

ରାଜନୀତିକୁ ଦିଲଜିତଙ୍କ ନାଁ

ଅନ୍ୟପଟେ ଦିଲଜିତଙ୍କ ରାଜନୀତିରେ ପ୍ରବେଶ ସମ୍ପର୍କରେ ମଧ୍ୟ ତୀବ୍ର କଳ୍ପନାଜଳ୍ପନା ଜାରି ରହିଥିଲା। ପଞ୍ଜାବୀ ଟ୍ରିବ୍ୟୁନ୍ ରେ ପ୍ରକାଶିତ ଏକ ଲେଖା ଅନୁଯାୟୀ, ଅନେକ ସାମାଜିକ କର୍ମୀ ଏବଂ ଅବସରପ୍ରାପ୍ତ ସାମରିକ କର୍ମଚାରୀ ଦିଲଜିତଙ୍କୁ ରାଜନୈତିକ କ୍ଷେତ୍ରରେ ଯୋଗଦେବାକୁ ଅନୁରୋଧ କରିଥିଲେ। କିନ୍ତୁ ଦିଲଜିତ୍ ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲେ। ସେ X (ପୂର୍ବରୁ ଟ୍ୱିଟର୍) ରେ ଏକ ପୋଷ୍ଟ କରି ଲେଖିଥିଲେ: “କେବେବି ନୁହେଁ… ମୋର କାମ ମନୋରଞ୍ଜନ କରିବା। ମୁଁ ମୋ କାମରେ ବହୁତ ଖୁସି। ଧନ୍ୟବାଦ।”

ଦିଲଜିତ୍ ଙ୍କ ଆଗାମୀ ଫିଲ୍ମ

ବୃତ୍ତିଗତ କ୍ଷେତ୍ରରେ, ଦିଲଜିତ୍ ଶେଷ ଥର ପାଇଁ ‘ବର୍ଡର ୨’ ଚଳଚ୍ଚିତ୍ରରେ ନଜର ଆସିଥିଲେ। ଯେଉଁଥିରେ ସେ ସନି ଦେଓଲ, ଆହାନ୍ ସେଟ୍ଟି ଏବଂ ବରୁଣ ଧାୱନଙ୍କ ସହିତ ମୁଖ୍ୟ ଭୂମିକାରେ ଅଭିନୟ କରିଥିଲେ। ଏହା ସହିତ, ସେ ଶୀଘ୍ର ଇମତିଆଜ୍ ଅଲ୍ଲୀଙ୍କ ଫିଲ୍ମ ‘ମୈଁ ୱାପାସ୍ ଆଉଙ୍ଗା’ ରେ ନଜର ଆସିବାକୁ ଯାଉଛନ୍ତି, ଯାହା ଜୁନ୍ ୧୨ ରେ ମୁକ୍ତିଲାଭ କରିବ। 

 

Also Read-Gold Jewellery: ଭାରତର କେଉଁ ସେଲିବ୍ରିଟିଙ୍କ ପାଖରେ ଅଛି ସବୁଠୁ ଅଧିକ ସୁନା, ନାଁ ଜାଣିଲେ ହେବେ ଆଶ୍ଚର୍ଯ୍ୟ