କୁଲ୍ଲୁ: ହିମାଚଳ ପ୍ରଦେଶ କୁଲ୍ଲୁ ବ୍ୟାସର ମାର୍ଗରେ ଏକ ଯାତ୍ରୀବାହୀ ବସ୍ ବ୍ରେକ୍ ଫେଲ ହେବା ଯୋଗୁ ପାହାଡ଼ ସହ ଧକ୍କା ଲାଗିଛି। ଫଳରେ ବସ୍ ରେ ଯାତ୍ରା କରୁଥିବା ଚାଳକଦଳ ସଦସ୍ୟଙ୍କ ସମେତ ୪୦ ଯାତ୍ରୀ ଆହତ ହୋଇଛନ୍ତି। ଦୁର୍ଘଟଣାଗ୍ରସ୍ତ ବସ୍ ଟି ହିମାଚଳ ପ୍ରଦେଶ ସଡ଼କ ପରିବହନ ନିଗମର ବୋଲି ଜଣାପଡିଛି। ବସ୍ ରେ କେବଳ ମହିଳା ଯାତ୍ରୀ ଥିଲେ ଓ ରକ୍ଷା ବନ୍ଧନ ଲାଗି ମହିଳାମାନେ ବ୍ୟାସରରୁ କୁଲ୍ଲୁ ଫେରୁଥିଲେ। ବସ୍ ବ୍ରେକ୍ ଫେଲ ହୋଇ ଖାଇକୁ ମୁହାଁଇଥିଲା। ତେବେ ଚାଳକ ଉପସ୍ଥିତ ବୁଦ୍ଧି ପ୍ରୟୋଗ କରି ବସ୍ କୁ ପାହାଡ଼ ଦେହରେ ଲଗାଇ ଅଟକାଇ ଦେଇଥିଲ।

କୁହାଯାଉଛି ବସ୍ ରେ କ୍ଷମତାଠାରୁ ଅଧିକ ଯାତ୍ରୀଥିଲେ। ବସ୍ ଶୁକ୍ରବାର ସକାଳେ କୁଲ୍ଲୁରୁ ବ୍ୟାସର ଯାଇଥିଲା। ସେଠାରୁ ପୁଣି କୁଲ୍ଲୁ ଫେରିବା ରାସ୍ତାରେ ଏହି ଦୁର୍ଘଟଣା ଘଟିଛି। ଏଥିରେ ବସ୍ ଚାଳକ ଗୁରୁତର ଆହତ ହୋଇଥିବା ଜଣାପଡିଛି। ଦୁର୍ଘଟଣା ସୂଚନା ମିଳିବାମାତ୍ରେ ସ୍ଥାନୀୟ ଲୋକେ ତୁରନ୍ତ ଘଟଣାସ୍ଥଳକୁ ପହଞ୍ଚି ଉଦ୍ଧାର ଅଭିଯାନ ଆରମ୍ଭ କରିଥିଲେ। ଆହତଙ୍କୁ ଉଦ୍ଧାର ପରେ କୁଲ୍ଲୁ ହସ୍ପିଟାଲ ପହଞ୍ଚା ଯାଇଛି। ଯଦିଓ ବ୍ରେକ୍ ଫେଲ ହେବା ଯୋଗୁ ଦୁର୍ଘଟଣା ହୋଇଥିବା କୁହାଯାଉଛି ତେବେ ତାହା ସ୍ପଷ୍ଟ ହୋଇ ନାହିଁ। ପୋଲିସ ମାମଲାର ତଦନ୍ତ କରୁଛି। ପ୍ରାରମ୍ଭିକ ଯାଞ୍ଚରୁ ଚାଳକଙ୍କ ଦୁଃସାହାସ ଭୀଷଣ ଧନଜୀବନ ହାନୀକୁ ରୋକି ଦେଇଥିବା ଜଣାପଡିଛି।

ଦୁର୍ଘଟଣାଗ୍ରସ୍ତ ବସ୍ ଟି ହିମାଚଳ ପ୍ରଦେଶ ସଡ଼କ ପରିବହନ ନିଗମର ଏକ ୪୭ ସିଟର ବସ୍ ବୋଲି କୁହାଯାଉଛି। ତେବେ ଦୁର୍ଘଟଣା କାଳରେ ବସ୍ ରେ ୭୯ ଜଣ ଯାତ୍ରୀ ଥିଲେ। ଏଣୁ କ୍ଷମତାରୁ ଅଧିକ ଯାତ୍ରୀ ପରିବହନ ଯୋଗୁ ବସ୍ ଦୁର୍ଘଟଣା ଘଟିଥାଇପାରେ ବୋଲି ଆଶଙ୍କା କରାଯାଉଛି। ଆହତ ଯାତ୍ରୀଙ୍କ ମଧ୍ୟରୁ ଅନେକଙ୍କୁ ପ୍ରାଥମିକ ଚିକିତ୍ସା ପରେ ଛାଡି ଦିଆଯାଇଛି। ତେବେ ଗୁରୁତର ଆହତ ଯାତ୍ରୀଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଗୁରୁତର ଆହତଙ୍କୁ ପ୍ରବୀଣ କୁମାର ଭାବେ ଚିହ୍ନଟ କରାଯାଇଛି।