ୱାଶିଂଟନ୍ / ତେହେରାନ୍: ଇରାନର 'ସମ୍ପୂର୍ଣ୍ଣ ସଭ୍ୟତା'କୁ ନିଶ୍ଚିହ୍ନ କରିଦେବାକୁ ଧମକ ଦେବାର ଗୋଟିଏ ଦିନ ପରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜର ଆଭିମୁଖ୍ୟ ବଦଳାଇଛନ୍ତି। ୩୮ ଦିନ ଧରି ଚାଲିଥିବା 'ଅପରେସନ୍ ଏପିକ୍ ଫ୍ୟୁରୀ(Operation Epic Fury) ' ପରେ ସେ ତେହେରାନ୍ ସହ ଅସ୍ତ୍ରବିରତି (Ceasefire) ଘୋଷଣା କରିବା ସହ ଏହାକୁ ଆମେରିକାର "ସମ୍ପୂର୍ଣ୍ଣ ଏବଂ ଚୂଡ଼ାନ୍ତ ବିଜୟ" ବୋଲି ଆଖ୍ୟା ଦେଇଛନ୍ତି।

ଅନ୍ୟପକ୍ଷରେ, ମୋଜତାବା ଖାମେନେଇଙ୍କ ନେତୃତ୍ୱାଧୀନ ଇରାନ ସରକାର ଏହାକୁ ନେଇ ଭିନ୍ନ ଦାବି କରିଛନ୍ତି। ଆମେରିକା ଇରାନର ୧୦-ସୂତ୍ରୀ ପ୍ରସ୍ତାବକୁ ଗ୍ରହଣ କରିଥିବାରୁ ଏହାକୁ ନିଜର ସାମରିକ ତଥା କୂଟନୈତିକ ସଫଳତା ଏବଂ ବିଜୟ ବୋଲି ଇରାନ କହିଛି।

'ବିଶ୍ୱ ଶାନ୍ତି ପାଇଁ ବଡ଼ ଦିନ'

  • ଇରାନ ସହ ଅସ୍ତ୍ରବିରତି ବୁଝାମଣା ହେବା ପରେ ଟ୍ରମ୍ପ ଖୁସି ବ୍ୟକ୍ତ କରି ଏହାକୁ ଏକ "ବଡ଼ ଦିନ" ବୋଲି କହିଛନ୍ତି। ଏହାଦ୍ୱାରା ହରମୁଜ୍ ଜଳପଥରେ ଉତ୍ତେଜନା ହ୍ରାସ ପାଇବା ସହ ଅର୍ଥନୈତିକ ଲାଭ ହେବ ବୋଲି ସେ ସୂଚନା ଦେଇଛନ୍ତି।
  • ନିଜ ସୋସିଆଲ ମିଡିଆ ପ୍ଲାଟଫର୍ମ 'ଟ୍ରୁଥ୍ ସୋସିଆଲ୍'ରେ ସେ ଲେଖିଛନ୍ତି: "ବିଶ୍ୱ ଶାନ୍ତି ପାଇଁ ଏକ ବଡ଼ ଦିନ! ଇରାନ ଏହା ଚାହୁଁଛି, କାରଣ ସେମାନେ ବହୁତ କିଛି ଭୋଗିସାରିଲେଣି! ଅନ୍ୟମାନଙ୍କ ଅବସ୍ଥା ମଧ୍ୟ ସମାନ। ଆମେରିକା ହରମୁଜ୍ ଜଳପଥରେ ଟ୍ରାଫିକ୍ ନିୟନ୍ତ୍ରଣ କରିବାରେ ସାହାଯ୍ୟ କରିବ। ଏବେ ବହୁତ କିଛି ସକାରାତ୍ମକ କାମ ହେବ! ବହୁତ ଅର୍ଥ ରୋଜଗାର ହେବ। ଇରାନ ପୁନଃନିର୍ମାଣ ପ୍ରକ୍ରିୟା ଆରମ୍ଭ କରିପାରିବ।"
  • ସେ ଆହୁରି ମଧ୍ୟ ଲେଖିଛନ୍ତି ଯେ, "ଆମେ ସବୁ ପ୍ରକାରର ସାମଗ୍ରୀ ପଠାଇବୁ ଏବଂ ସବୁକିଛି ଠିକ୍‌ଠାକ୍ ଚାଲିଛି କି ନାହିଁ ତାହା ନିଶ୍ଚିତ କରିବା ପାଇଁ ସେଠାରେ ଉପସ୍ଥିତ ରହିବୁ। ମୋର ଦୃଢ଼ ବିଶ୍ୱାସ ଯେ ସବୁ ଠିକ୍ ହେବ। ଆମେରିକାରେ ଆମେ ଯେପରି ଅନୁଭବ କରୁଛୁ, ଠିକ୍ ସେହିପରି ଏହା ମଧ୍ୟପ୍ରାଚ୍ୟର ସୁବର୍ଣ୍ଣ ଯୁଗ (Golden Age of the Middle East) ହୋଇପାରେ। "

Also Read: USA Iran War ସମ୍ବଦ୍ଧିତ ଟିକନିକ ଖବର ଜାଣନ୍ତୁ

ଟ୍ରମ୍ପଙ୍କ 'ସମ୍ପୂର୍ଣ୍ଣ ବିଜୟ' ଦାବି

ଅସ୍ତ୍ରବିରତି ଲାଗୁ ହେବା ପରେ ଏଏଫପି (AFP) ନ୍ୟୁଜ୍ ଏଜେନ୍ସିକୁ ପ୍ରତିକ୍ରିୟା ଦେଇ ଟ୍ରମ୍ପ କହିଛନ୍ତି, "ଏହା ୧୦୦ ପ୍ରତିଶତ ସମ୍ପୂର୍ଣ୍ଣ ଏବଂ ଚୂଡ଼ାନ୍ତ ବିଜୟ। ଏଥିରେ କୌଣସି ସନ୍ଦେହ ନାହିଁ।" ଆକ୍ରମଣ ପାଇଁ ଟ୍ରମ୍ପ ଦେଇଥିବା ଡେଡଲାଇନ୍ ଶେଷ ହେବାର ମାତ୍ର ଘଣ୍ଟାଏ ପୂର୍ବରୁ ଏହି ଚୁକ୍ତି ହୋଇଛି। "ଆମର ଏକ ୧୫-ସୂତ୍ରୀ ବୁଝାମଣା ହୋଇଛି, ଯେଉଁଥିରୁ ଅଧିକାଂଶ କଥା ଉପରେ ସହମତି ପ୍ରକାଶ ପାଇଛି" ବୋଲି ଟ୍ରମ୍ପ କହିଛନ୍ତି। କିନ୍ତୁ ଏହି ଚୁକ୍ତି କେତେ ଦିନ ତିଷ୍ଠିବ ସେନେଇ ଏବେ ବି ପ୍ରଶ୍ନବାଚୀ ରହିଛି।

ୟୁରାନିୟମ୍ ଏବଂ ହରମୁଜ୍ ଜଳପଥ ଉପରେ ନଜର

ଇରାନର ପରମାଣୁ କାର୍ଯ୍ୟକ୍ରମକୁ ନେଇ ଆମେରିକାର ଦୀର୍ଘ ଦିନର ଚିନ୍ତା ଉପରେ ଟ୍ରମ୍ପ କହିଛନ୍ତି ଯେ, ଏହାର ସମ୍ପୂର୍ଣ୍ଣ ସମାଧାନ କରାଯିବ। କିନ୍ତୁ ଇରାନର 'ଏନରିଚ୍‌ଡ୍ ୟୁରାନିୟମ୍' (enriched uranium) ସହ କ'ଣ କରାଯିବ, ସେନେଇ ସେ କୌଣସି ସ୍ପଷ୍ଟ ସୂଚନା ଦେଇନାହାଁନ୍ତି। ବିଶ୍ୱର ପ୍ରମୁଖ ତୈଳ ବାଣିଜ୍ୟ ପଥ 'ହରମୁଜ୍ ଜଳପଥ' କେବେ ଖୋଲିବ, ତାକୁ ନେଇ ମଧ୍ୟ ଅନିଶ୍ଚିତତା ଲାଗିରହିଛି।

କୂଟନୀତିରେ ଚୀନ୍ ଏବଂ ପାକିସ୍ତାନର ଭୂମିକା

ପାକିସ୍ତାନର ମଧ୍ୟସ୍ଥତା ଯୋଗୁଁ ଆମେରିକା ଏବଂ ଇସ୍ରାଏଲର ଲଗାତାର ଆକ୍ରମଣ ପରେ ଏହି ଅସ୍ତ୍ରବିରତି ସମ୍ଭବ ହୋଇଛି। ଏଥିରେ ଚୀନ୍‌ର ମଧ୍ୟ ହାତ ଥିବା ଟ୍ରମ୍ପ ସୂଚାଇଛନ୍ତି। ବେଜିଂର ଭୂମିକା ବିଷୟରେ ପଚରାଯିବାରୁ ସେ "ହଁ" ବୋଲି ଉତ୍ତର ଦେଇଛନ୍ତି।

ଅସ୍ତ୍ରବିରତିକୁ ଇସ୍ରାଏଲର ସମର୍ଥନ, କିନ୍ତୁ ରଖିଲା ସର୍ତ୍ତ

ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଆମେରିକା ନେତୃତ୍ୱାଧୀନ ଏହି ଅସ୍ତ୍ରବିରତିକୁ ସମର୍ଥନ କରିଛନ୍ତି, କିନ୍ତୁ ଲେବାନନରେ ହିଜବୁଲ୍ଲା ସହ ଚାଲିଥିବା ସଂଘର୍ଷରେ ଏହା ଲାଗୁ ହେବ ନାହିଁ ବୋଲି ସ୍ପଷ୍ଟ କରିଛନ୍ତି। ଅନ୍ୟପକ୍ଷରେ, ଲେବାନନ୍ ସମେତ ଏହା "ସବୁ ସ୍ଥାନରେ" ଲାଗୁ ହେବ ବୋଲି ପାକିସ୍ତାନ ଦାବି କରିଛି। ଯାହା ଅସ୍ତ୍ରବିରତିର ସ୍ଥାୟିତ୍ୱକୁ ନେଇ ସନ୍ଦେହ ସୃଷ୍ଟି କରିଛି।