ନୂଆଦିଲ୍ଲୀ ୧୯।୧୧: ମନୋରଞ୍ଜନ ଦୁନିଆର ଚାକଚକ୍ୟ ପଛରେ ଲୁଚି ରହିଛି ଅନେକ ଅକୁହା କାହାଣୀ। କ୍ୟାମେରା ଆଗରେ ହସ, ମଜା ଓ ମନୋରଞ୍ଜନର ମାହୋଲ ଥିବାବେଳେ କ୍ୟାମେରା ପଛରେ କେବେ କେବେ ଘଟିଥାଏ ଅଭାବନୀୟ ଘଟଣା। ଏଭଳି କିଛି ତିକ୍ତ ଅନୁଭୂତିକୁ ସାମ୍ନାକୁ ଆଣିଛନ୍ତି ଅଭିନେତ୍ରୀ ଉପାସନା ସିଂ। ସୁଟିଂ ସେଟରେ ଜଣେ ଲାଇଟମ୍ୟାନଙ୍କ ମୃତ୍ୟୁ ପରେ ମଧ୍ୟ ସୁଟିଂ ଜାରି ରହିଥିବା ଘଟଣାକୁ ମନେ ପକାଇ ସେ ଇଣ୍ଡଷ୍ଟ୍ରିର ମାନବିକତା ଉପରେ ପ୍ରଶ୍ନ ଉଠାଇଛନ୍ତି। ଉପାସନା ସିଂ ହେଉଛନ୍ତି ଟେଲିଭିଜନ ଓ ସିନେମା ଜଗତର ଜଣେ ପରିଚିତ ଚେହେରା।

ବିଶେଷକରି ଲୋକପ୍ରିୟ କମେଡି ଶୋ' 'କମେଡି ନାଇଟ୍ସ ୱିଥ୍ କପିଲ'ରେ ପିଙ୍କି ବୁଆ ଚରିତ୍ର ପାଇଁ ସେ ଦର୍ଶକଙ୍କ ମଧ୍ୟରେ ବେଶ୍ ପରିଚିତ। ନିଜର କାର୍ଯ୍ୟଜୀବନର ଏକ ତିକ୍ତ ଅନୁଭୂତି ସେ ବଖାଣିଛନ୍ତି, ଗୋଟିଏ ସୁଟିଂ ସେଟରେ ଜଣେ ଲାଇଟମ୍ୟାନଙ୍କ ମୃତ୍ୟୁ ହୋଇଥିଲା। କିନ୍ତୁ ଏହି ଦୁଃଖଦ ଘଟଣା ପରେ ମଧ୍ୟ ପ୍ରଯୋଜକମାନେ ସୁଟିଂ ବନ୍ଦ କରିନଥିଲେ। ବରଂ କାମ ଜାରି ରହିଥିଲା। ଏହି ଘଟଣା ତାଙ୍କୁ ଗଭୀର ଭାବେ ଆଘାତ ଦେଇଥିଲା।

କେବଳ ଏତିକି ନୁହେଁ, ଏକ କମେଡି ରିୟାଲିଟି ଶୋ'ରେ ଘଟିଥିବା ଆଉ ଏକ ଘଟଣା ବିଷୟରେ ମଧ୍ୟ ସେ କହିଛନ୍ତି। ଶୋ'ରେ ଜଣେ ପ୍ରତିଯୋଗୀ ହଠାତ୍ ବେହୋସ୍ ହୋଇଯାଇଥିଲେ। ଏଭଳି ପରିସ୍ଥିତିରେ ତାଙ୍କୁ ତୁରନ୍ତ ଡାକ୍ତରୀ ସହାୟତା ଯୋଗାଇବା ପରିବର୍ତ୍ତେ ପ୍ରଯୋଜକ ତାଙ୍କ ଯନ୍ତ୍ରଣାକୁ କ୍ୟାମେରାରେ କଏଦ କରିବାକୁ ଚାହୁଁଥିଲେ। ଅର୍ଥାତ୍ ଜଣେ ବ୍ୟକ୍ତିଙ୍କ ସ୍ୱାସ୍ଥ୍ୟଠାରୁ ଟେଲିଭିଜନରେ ଦେଖାଇବା ପାଇଁ ଦୃଶ୍ୟ ରେକର୍ଡ କରିବାକୁ ଅଧିକ ଗୁରୁତ୍ୱ ଦିଆଯାଉଥିଲା।

ଏହି ଘଟଣାକୁ ନେଇ ଉପାସନା ନିଜର ଅସନ୍ତୋଷ ପ୍ରକାଶ କରିବା ସହ ପ୍ରଶ୍ନ କରିଛନ୍ତି, ମାନବିକତା କୁଆଡ଼େ ଗଲା? ଜଣେ ବ୍ୟକ୍ତି ଅସୁସ୍ଥ ହୋଇପଡ଼ିଥିବା ସମୟରେ ତାଙ୍କୁ ସହାୟତା କରିବା ବଦଳରେ ତାଙ୍କ ଯନ୍ତ୍ରଣାକୁ କ୍ୟାମେରାରେ ରେକର୍ଡ କରିବା କେତେଦୂର ଠିକ୍? ଉପାସନାଙ୍କ ଏହି ଖୁଲାସା ପୁଣିଥରେ ମନୋରଞ୍ଜନ ଦୁନିଆର କାର୍ଯ୍ୟଶୈଳୀ ଓ ସୁଟିଂ ସେଟ୍ରେ କାମ କରୁଥିବା କର୍ମଚାରୀଙ୍କ ସୁରକ୍ଷାକୁ ନେଇ ଆଲୋଚନା ଆରମ୍ଭ କରିଛି। ଗୋଟିଏ ଶୋ'କୁ ସଫଳ କରିବା ପାଇଁ କଳାକାରଙ୍କଠାରୁ ଆରମ୍ଭ କରି ଲାଇଟମ୍ୟାନ୍, କ୍ୟାମେରାମ୍ୟାନ୍ ଓ ଅନ୍ୟ କର୍ମଚାରୀମାନେ ଦିନରାତି ପରିଶ୍ରମ କରନ୍ତି। କିନ୍ତୁ ସେମାନଙ୍କ ଜୀବନ ଓ ସୁରକ୍ଷାକୁ ଯଦି ଗୁରୁତ୍ୱ ନ ଦିଆଯାଏ , ତେବେ ଏହା ନିଶ୍ଚିତ ଭାବେ ଚିନ୍ତାର ବିଷୟ। ମନୋରଞ୍ଜନ ଅପେକ୍ଷା ମଣିଷର ଜୀବନ ସବୁବେଳେ ଅଧିକ ମୂଲ୍ୟବାନ। ଉପାସନା ସିଂଙ୍କ ଏହି ଅନୁଭୂତି ମନୋରଞ୍ଜନ ଦୁନିଆର ଲୋକଙ୍କ ମାନବିକତା ଓ କର୍ମଚାରୀଙ୍କ ସୁରକ୍ଷା କେତେ ଗୁରୁତ୍ୱପୂର୍ଣ୍ଣ, ସେନେଇ ପୁଣିଥରେ ପ୍ରଶ୍ନ ଛିଡ଼ା କରିଛି।