ମୁମ୍ବାଇ: ଟ୍ରେନରେ ସିଟ୍‌କୁ ନେଇ ବିବାଦ ପରେ ରେଲୱେ ସୁରକ୍ଷା ବଳ କର୍ମଚାରୀଙ୍କୁ ହିଂସାତ୍ମକ ଆକ୍ରମଣ କରି ବନ୍ଧା ହେଲେ ଟେଲିଭିଜନ ଅଭିନେତ୍ରୀ ଓ ମଡେଲ୍‌ ଅନ୍ତରା ବାନାର୍ଜୀ। ଅଭିଯୋଗ ଅନୁସାରେ ଅଭିନେତ୍ରୀ ସ୍ଲିପର କ୍ଲାସ ଟିକେଟ ନେଇ ଏସି କୋଚ୍‌ ସିଟ୍‌ ଅକ୍ତିଆର କରିଥିଲେ। ଏଥିରେ ରେଳବାଇ ସୁରକ୍ଷା ବଳ ସହିତ ତାଙ୍କର ତର୍କ ହୋଇଥିଲା। ଏହାପରେ ୩୧ ବର୍ଷୀୟ ଅନ୍ତରା ଆରପିଏଫ୍‌ କର୍ମଚାରୀଙ୍କୁ ରେଜର ବ୍ଲେଡରେ ଆକ୍ରମଣ କରିଛନ୍ତି। ଏହା ସହ ପୁଲିସର ଅଭିଯୋଗ ଅନୁସାରେ ତାଙ୍କ ବିରୋଧରେ ଅନ୍ୟାନ୍ୟ ଅଭିଯୋଗ ଲଗାଯାଇଥିବା ଟାଇମ୍ସ ଅଫ୍ ଇଣ୍ଡିଆରେ ଖବର ପ୍ରକାଶ ପାଇଛି। ତେବେ ଗିରଫ ପରେ ତାଙ୍କୁ ଆଇନଗତ ନୋଟିସ୍‌ ଦିଆଯିବା ସହ ସେ ଜାମିନରେ ମୁକ୍ତ ହୋଇଥିବା ଜଣାପଡ଼ିଛି।

AC କୋଚର ସିଟକୁ ନେଇ ଆରମ୍ଭ ହୋଇଥିଲା ବିବାଦ

ଏହି ଘଟଣା ଅଗଷ୍ଟ ୧୨ ରାତିରେ ବାନ୍ଦ୍ରା-ଗଙ୍ଗାନଗର ଅରାବଳୀ ଏକ୍ସପ୍ରେସରେ ଘଟିଥିବା ଜଣାପଡ଼ିଛି। ଅନ୍ତରା ଏକ ଶୁଟିଂ କାମ ପାଇଁ ସୁରଟ ଯାଉଥିଲେ। ଅଭିଯୋଗ ଅନୁସାରେ, ରାତି ପ୍ରାୟ ୯ଟା ୩୦ରୁ ୧୦ଟା ୫୦ ମଧ୍ୟରେ ବୋରିଭଲି ଓ ଦହାଣୁ ମଧ୍ୟରେ ଟ୍ରେନ୍‌ ଯାଉଥିବା ସମୟରେ ଘଟଣାଟି ଘଟିଥିଲା।

ଅନ୍ତରାଙ୍କ ପାଖରେ ସ୍ଲିପର୍‌ କ୍ଲାସ୍‌ର ଟିକେଟ୍‌ ଥିବା ସତ୍ତ୍ୱେ ସେ ଏକ ଏସି କୋଚ୍‌ରେ ରିଜର୍ଭ ସିଟ୍‌ରେ ବସିଥିବା ନେଇ ଜଣେ ଯାତ୍ରୀ ଆପତ୍ତି ଉଠାଇଥିଲେ। ତାଙ୍କୁ ସିଟ୍‌ ଛାଡ଼ିବାକୁ କୁହାଯିବା ପରେ ବିବାଦ ବଢ଼ିଥିଲା। ପରିସ୍ଥିତି ନିୟନ୍ତ୍ରଣ ପାଇଁ ଟିକେଟ୍‌ ଚେକର୍‌ ହରିକେଶ ତ୍ରିପାଠୀଙ୍କ ସହ ଆରପିଏଫର ଆସିଷ୍ଟାଣ୍ଟ ସବ୍‌-ଇନ୍ସପେକ୍ଟର୍‌ (ASI) ଯମିନୀକାନ୍ତ ମିଶ୍ର ଓ କନଷ୍ଟେବଲ୍‌ ରାଜେଶ କୁମାର ପହଞ୍ଚିଥିଲେ।

Also Read- ଜନ ଗଣ ମନ ହଟାଇ ବନ୍ଦେ ମାତରମକୁ ଜାତୀୟ ସଂଗୀତ କର: ମୁକେଶ ଖାନ୍ନାଙ୍କ ବିବାଦୀୟ ଦାବିକୁ ନେଇ ଚର୍ଚ୍ଚା

ବ୍ଲେଡ୍‌ ବାହାର କରି ଆକ୍ରମଣ କରିଥିବା ଅଭିଯୋଗ

ପୋଲିସ୍‌ ଅଭିଯୋଗ ଅନୁସାରେ, କଥାବାର୍ତ୍ତା ବେଳେ ଅନ୍ତରା ଉତ୍ତେଜିତ ହୋଇ ରେଲୱେ କର୍ମଚାରୀଙ୍କୁ ଗାଳିଗୁଲଜ କରିଥିଲେ। ପରେ ସେ ଏକ ରେଜର୍‌ ବ୍ଲେଡ୍‌ ବାହାର କରି କର୍ମଚାରୀଙ୍କୁ ଦେଖାଇଥିଲେ ଏବଂ ଏଏସ୍ଆଇ ଯମିନୀକାନ୍ତ ମିଶ୍ରଙ୍କ ଉପରେ ଆକ୍ରମଣ କରିଥିବା ଅଭିଯୋଗ ରହିଛି। ଏଥିରେ ଅଧିକାରୀ ଆହତ ହୋଇଥିବା ପୋଲିସ୍‌ କହିଛି।

ଘଟଣା ସମୟରେ ଅନ୍ତରା ମଧ୍ୟ ଆହତ ହୋଇଥିବା ଏବଂ ଅଧିକାରୀଙ୍କ ୟୁନିଫର୍ମ ଓ ମୋବାଇଲ୍‌ ଫୋନ୍‌ ନଷ୍ଟ ହୋଇଥିବା ପୋଲିସ୍‌ ଅଭିଯୋଗ କରିଛି। ଆରପିଏଫ୍‌ କର୍ମଚାରୀମାନେ କୋଚ୍‌ର ଦ୍ୱାର ବନ୍ଦ କରିବା ପରେ ଅନ୍ତରା ଏସି କୋଚ୍‌ର ଝରକା ଭାଙ୍ଗି ବାହାରିବାକୁ ଚେଷ୍ଟା କରିଥିବା ମଧ୍ୟ ଅଭିଯୋଗ ହୋଇଛି। ଏହି ଘଟଣା ଯୋଗୁ ପ୍ରାୟ ଏକ ଘଣ୍ଟା ଧରି କୋଚ୍‌ରେ ଉତ୍ତେଜନା ସୃଷ୍ଟି ହୋଇଥିଲା ଏବଂ ସହଯାତ୍ରୀମାନେ ଭୟଭୀତ ହୋଇପଡ଼ିଥିଲେ।

ଦହାଣୁ ଷ୍ଟେସନ୍‌ରେ ଓହ୍ଲାଇ ଦିଆଗଲା

ପରେ ଅନ୍ତରାଙ୍କୁ ଦହାଣୁ ଷ୍ଟେସନ୍‌ରେ ଟ୍ରେନ୍‌ରୁ ଓହ୍ଲାଇ ଦିଆଯାଇ ସରକାରୀ ରେଲୱେ ପୋଲିସ୍‌ (GRP)କୁ ହସ୍ତାନ୍ତର କରାଯାଇଥିଲା। ପରବର୍ତ୍ତୀ ସକାଳେ ବୋରିଭଲି ରେଲୱେ ପୋଲିସ୍‌ ତାଙ୍କୁ ହେପାଜତରେ ନେଇଥିଲା।

ତାଙ୍କ ବିରୋଧରେ ସରକାରୀ କର୍ମଚାରୀଙ୍କୁ ଆକ୍ରମଣ, ଆଘାତ ପହଞ୍ଚାଇବା, ଯାତ୍ରୀଙ୍କ ସୁରକ୍ଷାକୁ ବିପଦରେ ପକାଇବା ଏବଂ ଜାଣିଶୁଣି ଅପମାନ କରିବା ଭଳି ବିଭିନ୍ନ ଅଭିଯୋଗରେ ମାମଲା ରୁଜୁ ହୋଇଥିବା ରିପୋର୍ଟ ହୋଇଛି। ଗିରଫ ପରେ ତାଙ୍କୁ ଜାମିନ ମିଳିଛି।

କିଏ ଅନ୍ତରା ବାନାର୍ଜୀ?

ଅନ୍ତରା ବାନାର୍ଜୀ ଜଣେ ଟେଲିଭିଜନ ଅଭିନେତ୍ରୀ, ମଡେଲ୍‌, କଥକ ନୃତ୍ୟଶିଳ୍ପୀ ଓ ଶାସ୍ତ୍ରୀୟ ସଙ୍ଗୀତରେ ପ୍ରଶିକ୍ଷିତ କଳାକାର। କୋଲକାତାରେ ବଢ଼ିଥିବା ଅନ୍ତରା ଅଭିନୟ କ୍ୟାରିୟର୍‌ ପାଇଁ ମୁମ୍ବାଇ ଯାଇଥିଲେ। ସେ ‘ଗୁମ୍ରାହ, ଏଣ୍ଡ ଅଫ ଇନୋସେନ୍ସ ଜରିଆରେ ଟେଲିଭିଜନରେ ଡେବ୍ୟୁ କରିଥିଲେ। ପରେ ‘ସାବଧାନ ଇଣ୍ଡିଆ’ ସମେତ ବିଭିନ୍ନ ଧାରାବାହିକରେ ଅଭିନୟ କରିଥିଲେ। ୨୦୧୪ର ହିନ୍ଦୀ ଫିଲ୍ମ ଦ ସୌକୀନ୍ସରେ ମଧ୍ୟ ସେ ନଜର ଆସିଥିଲେ।

Also Read- ଶର୍ମିଲା ଟାଗୋର ପିଲାଙ୍କୁ ହିନ୍ଦୁ ଧର୍ମ ଶିଖାଇ ନଥିଲେ! ସୈଫ ଅଲୀ ଖାନ୍‌ଙ୍କ ପରିବାର ଗୁମର କଥା କହିଦେଲେ ସବା ଅଲୀ ଖାନ

ଟେଲିଭିଜନରେ ‘ବୋଧୋ ବୌହୂ’ ଧାରାବାହିକରେ ପିଙ୍କି ଅହଲାୱତ୍‌ ଭୂମିକାରେ ଅଭିନୟ କରି ସେ ଅଧିକ ପରିଚିତି ହାସଲ କରିଥିଲେ। ଏହାପରେ ଲାଲ ଇସ୍କ, କସୌଟି ଜିନ୍ଦଙ୍ଗୀ କେ’, କବଚ-୨ ଓ ଦିବ୍ୟ ଦୃଷ୍ଟି ଭଳି ଟିଭି ଶୋ’ରେ ମଧ୍ୟ ସେ କାମ କରିଛନ୍ତି। ତେବେ ଟ୍ରେନ୍‌ରେ ଘଟିଥିବା ଏହି ଘଟଣାରେ ତାଙ୍କ ବିରୋଧରେ ଆସିଥିବା ସମସ୍ତ ଅଭିଯୋଗ କେବଳ ପୋଲିସ୍‌ର ଅଭିଯୋଗ ଓ ଏଫ୍‌ଆଇଆରକୁ ନେଇ କରାଯାଇଛି। ମାମଲାର ଆଇନଗତ ପ୍ରକ୍ରିୟା ଜାରି ରହିଛି।