ନୂଆଦିଲ୍ଲୀ: ଇରାନ ସହ ଆମେରିକା ଓ ଇସ୍ରାଏଲର ଯୁଦ୍ଧ ଯୋଗୁ ସାରା ବିଶ୍ୱରେ ଏବେ ଇନ୍ଧନ ସଂକଟ ଦେଖା ଦେଇଛି। ଦେଶରେ ଏହି ପରିସ୍ଥିତିର ମୁକାବିଲା ନିମନ୍ତେ କେନ୍ଦ୍ର ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ସରକାର ହାଇସ୍ପିଡ ଡିଜେଲ ଉପରେ ଏକ୍ସପୋର୍ଟ ଡ୍ୟୁଟି ପ୍ରତି ଲିଟର ୨୪ ଟଙ୍କା ବଢାଇଥିବା ବେଳେ ଇନଫ୍ରାସେସ୍ ଲିଟରପିଛା ୩୬ ଟଙ୍କା ବଢାଇଛନ୍ତି। ଅର୍ଥମନ୍ତ୍ରାଳୟ ଏହି ବୃଦ୍ଧି ନେଇ ଅଧିସୂଚନା ଜାରି କରିଥିବା ବେଳେ ଶୁଳ୍କ ବୃଦ୍ଧି ତତ୍କାଳ ପ୍ରଭାବ ଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି।

ଉଲ୍ଲେଖଯୋଗ୍ୟ ଯେ ଏହା ପୂର୍ବରୁ କେନ୍ଦ୍ର ସରକାର ମାର୍ଚ୍ଚ ୨୬ ତାରିଖରେ ଡିଜେଲ ଉପରେ ପ୍ରତି ଲିଟର ୨୧ଟଙ୍କା ୫୦ ପଇସା ଓ ଏଭିଏସନ ଟର୍ବାଇନ ଫୁଏଲ(ଏଟିଏଫ) ଲିଟର ପିଛା ୨୯ଟଙ୍କା ୫ ପଇସା ଏକ୍ସପୋର୍ଟ ଡ୍ୟୁଟି ଲାଗୁ କରିଥିଲେ। ସରକାର ଶନିବାର ଘୋଷଣା କରିଛନ୍ତି ଯେ ଡିଜେଲ ଉପରେ ଏକ୍ସପୋର୍ଟ ଡ୍ୟୁଟି ଲିଟର ପିଛା ୨୧ଟଙ୍କା ୫ ପଇସାରୁ ବଢାଇ ୫୫ଟଙ୍କା ୫ ପଇସା କରିଦେଇଛନ୍ତି। ସେହିପରି ହାଇସ୍ପିଡ ଡିଜେଲ ଉପରେ ଆଡିସନାଲ ଏକ୍ସାଇଜ ଡ୍ୟୁଟି ଓ ସେସ୍ ମଧ୍ୟ ବଢାଇ ଦିଆଯାଇଛି।

ନୂଆ ବ୍ୟବସ୍ଥା ଅନୁସାରେ ହାଇସ୍ପିଡ ଡିଜେଲ ଉପରେ ସ୍ପେଶାଲ ଆଡିସନାଲ ଏକ୍ସାଇଜ ଡ୍ୟୁଟି ଲିଟରପିଛା ୨୪ ଟଙ୍କା କରି ଦିଆଯାଇଛି। ସେହିପରି ରୋଡ ଓ ଇନଫ୍ରାଷ୍ଟ୍ରକ୍ଚର ସେସ୍ ଏବେ ଲିଟର ପିଛା ୩୬ ଟଙ୍କା କରାଯାଇଛି। ଏଥିମଧ୍ୟରେ ଏଟିଏଫ ଉପର୍ ଡ୍ୟୁଟି ଲିଟରପିଛା ୨୯ଟଙ୍କା ୫ ପଇସାରୁ ବଢାଇ ୪୨ ଟଙ୍କା କରିଦିଆଯାଇଛି। ଏଥିରେ ପେଟ୍ରୋଲ କଥା କହିଲେ ଏହା ଉପରେ ଏକ୍ସପୋର୍ଟ ଡ୍ୟୁଟି ଏବେ ବି ଶୁନ ରହିଛି।

ପଶ୍ଚିମ ଏସିୟାରେ ଜାରି ଯୁଦ୍ଧ ଯୋଗୁ ଘରୋଇ ବଜାରରେ ଇନ୍ଧନ ଉପଲବ୍ଧତା ବଢାଇବା ଲାଗି ଶୁଳ୍କ ଲଗାଯାଇଥିଲା। ଏହି ଶୁଳ୍କର ଉଦ୍ଦେଶ୍ୟ ରପ୍ତାନୀକାରୀଙ୍କୁ ଅନ୍ତର୍ଜାତୀୟ ଓ ଘରୋଇ ମୂଲ୍ୟ ମଧ୍ୟରେ ପ୍ରଭେଦର ଅନୁଚିତ ଲାଭ ନେବାରୁ ରୋକିବା। କାରଣ ଯୁଦ୍ଧ ଆରମ୍ଭ ହେବା ପରେ ସାରା ବିଶ୍ୱରେ ଅଶୋଧିତ ତୈଳ ମୂଲ୍ୟ ବେଶ୍ ବଢି ଯାଇଛି। ତେବେ ଦେଶର ଫିଲିଂ ଷ୍ଟେସନ ମାନଙ୍କରେ ବିକ୍ରି ହେଉଥିବା ଡିଜେଲ ଉପରେ ଏହି ଡ୍ୟୁଟି ଓ ସେସ୍ ର ପ୍ରଭାବ ପଡିବ ନାହିଁ।