ହରିୟାଣା: ହରିୟାଣାର ମାନେସର ଅଞ୍ଚଳରେ ଏକ ଅତ୍ୟନ୍ତ ଚାଞ୍ଚଲ୍ୟକର ହତ୍ୟାକାଣ୍ଡ ସାମ୍ନାକୁ ଆସିଛି। ଜଣେ ବ୍ୟକ୍ତି ନିଜ ବିବାହର ମାତ୍ର ତିନି ମାସ ପରେ ନିଜ ପତ୍ନୀଙ୍କୁ ଗୁଳି କରି ହତ୍ୟା କରିଥିବା ଅଭିଯୋଗ ହୋଇଛି। ଏହି ଜଘନ୍ୟ ହତ୍ୟାକାଣ୍ଡରେ ସେ ତାଙ୍କର ଗାର୍ଲଫ୍ରେଣ୍ଡଙ୍କ ସହାୟତା ନେଇଥିଲେ। ମୃତ ୨୨ ବର୍ଷୀୟା ଯୁବତୀଙ୍କ ମାଆ ମେ ୨୨ ତାରିଖରେ ମାନେସର ଥାନାରେ ନିଜ ଝିଅ ନିଖୋଜ ଥିବା ନେଇ ଅଭିଯୋଗ କରିଥିଲେ। ଝିଅଟି ଚଳିତ ବର୍ଷ ଫେବୃଆରୀରେ ଅଙ୍କିତ ନାମକ ଜଣେ ବ୍ୟକ୍ତିଙ୍କୁ ବିବାହ କରିଥିଲା। ପରିବାର ଲୋକଙ୍କୁ ସନ୍ଦେହ ହେବାରୁ ପୋଲିସ ତଦନ୍ତ ଆରମ୍ଭ କରିଥିଲା। ତଦନ୍ତ ବେଳେ ପୋଲିସ ମାନେସରସ୍ଥିତ ଏକ କୋଠରୀରୁ ଯୁବତୀଙ୍କ ମୃତଦେହ ଉଦ୍ଧାର କରିଥିଲା। ପୋଲିସ ହତ୍ୟା ମାମଲା ରୁଜୁ କରି ଅଭିଯୁକ୍ତ ସ୍ୱାମୀ ଅଙ୍କିତ ଏବଂ ତାଙ୍କ ମହିଳା ସହଯୋଗୀ ରଜନୀ ଦେବୀଙ୍କୁ ଗିରଫ କରିଛି।

ଅଙ୍କିତ ଏବଂ ରଜନୀ ପ୍ରାୟ ତିନି ବର୍ଷ ଧରି ପ୍ରେମ ସମ୍ପର୍କରେ ଥିଲେ। ଅଙ୍କିତଙ୍କ ବିବାହ ପରେ ମଧ୍ୟ ସେମାନଙ୍କ ସମ୍ପର୍କ ଜାରି ରହିଥିଲା। ନିଜର ଦୀର୍ଘସମୟର ପ୍ରେମ ସମ୍ପର୍କକୁ ବଞ୍ଚାଇ ରଖିବା ପାଇଁ ସେମାନେ ପତ୍ନୀକୁ ହତ୍ୟା କରିବାକୁ ଯୋଜନା କଲେ। ହତ୍ୟା ପାଇଁ ବ୍ୟବହୃତ ବନ୍ଧୁକଟି ପ୍ରାୟ ଦୁଇ ମାସ ପୂର୍ବରୁ ଉତ୍ତରପ୍ରଦେଶରୁ ଅଣାଯାଇଥିଲା। ହତ୍ୟା ଦିନ ଅଙ୍କିତ ନିଜ ପତ୍ନୀଙ୍କୁ ରଜନୀଙ୍କ ଭଡ଼ା ଘରକୁ ଆଣିଥିଲେ, ଯେଉଁଠାରେ ଦୁହେଁ ମିଶି ତାଙ୍କୁ ଗୁଳି କରିଥିଲେ।

ଫେରାର ଓ ଗିରଫଦାରୀ

ହତ୍ୟାକାଣ୍ଡ ପରେ ଅଭିଯୁକ୍ତ ଦ୍ୱୟ ପ୍ରଥମେ ହରିଦ୍ୱାର ଏବଂ ପରେ ନେପାଳ ପଳାଇ ଯାଇଥିଲେ। ଜୁନ୍ ୩୦ ତାରିଖରେ ଯେତେବେଳେ ସେମାନେ ଭାରତ ଫେରିଲେ, କ୍ରାଇମବ୍ରାଞ୍ଚ ସେମାନଙ୍କୁ ମାନେସରରୁ ଗିରଫ କରିଥିଲା। କୋର୍ଟ ଅଭିଯୁକ୍ତମାନଙ୍କୁ ୫ ଦିନିଆ ପୋଲିସ ରିମାଣ୍ଡରେ ପଠାଇଛନ୍ତି। ବର୍ତ୍ତମାନ ପୋଲିସ ହତ୍ୟାରେ ବ୍ୟବହୃତ ଅସ୍ତ୍ରଶସ୍ତ୍ର ଜବତ କରିବା ଏବଂ ଅଧିକ ପ୍ରମାଣ ସଂଗ୍ରହ କରିବା ଦିଗରେ ତଦନ୍ତ ଚଳାଇଛି। ଏହି ଘଟଣା ଅଞ୍ଚଳରେ ବେଶ ଚର୍ଚ୍ଚାର ବିଷୟ ପାଲଟିଛି।