ମୁମ୍ବାଇ, ୨୩।୦୭ : ମହାରାଷ୍ଟ୍ରରେ ରାଜନୀତି ଜୋର୍ ଧରିଛି । ଏଠାରେ ଘଡିକେ ଘୋଡା ଛୁଟୁଛି । ବୁଧବାର ମହାରାଷ୍ଟ୍ର ରାଜନୀତିର ଚାଣକ୍ୟ ଶରଦ ପାଓ୍ୱାର ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିଥିଲେ । ଏବେ ଏମଏନଏସ ମୁଖ୍ୟ ରାଜ ଠାକରେଙ୍କ ବୟାନ ଚର୍ଚ୍ଚାକୁ ଆସିଛି । ରାଜ୍ୟର ଅସମାଜିକ ତତ୍ତ୍ୱଙ୍କୁ ନେଇ ସେ ବଡ ବୟାନ ଦେଇଛନ୍ତି ।

ରାଜ ଠାକରେ କହିଛନ୍ତି ଯେ, ଯିଏ ବି ଉପଦ୍ରବ କରିବ ତାକୁ ସେମାନେ ମାଟିରେ ମିଶାଇଦେବେ । ତେବେ ରାଜଙ୍କ ଏହି ବୟାନ ଶିବସେନା ୟୁବିଟି ସହ ଛାତ୍ରଙ୍କ ସମର୍ଥନରେ ମିଳିତ ଶୋଭାଯାତ୍ରା ଆୟୋଜନର ଘୋଷଣା ପରେ ସାମ୍ନାକୁ ଆସିଛି । ଯେଉଁ ଶୋଭାଯାତ୍ରା ଜୁଲାଇ ୨୬ ତାରିଖରେ ଅନୁଷ୍ଠିତ ହେବ । ଏକ ସାମ୍ବାଦିକ ସମ୍ମିଳନୀରେ ରାଜ ଠାକରେ କହିଛନ୍ତି ଯେ, କେନ୍ଦ୍ର ସରକାର ଛାଚ୍ରଛାତ୍ରୀଙ୍କୁ ଅମାନବୀୟ ଭାବେ ଆକ୍ରମଣ କରିଛନ୍ତି । ଛାତ୍ରମାନେ ଶାନ୍ତିପୂର୍ଣ୍ଣ ଆନ୍ଦୋଳନ କରୁଥିଲେ । ବିଜେପି ଯେବେ ବିରୋଧୀ ଦଳରେ ଥିଲା ସେମାନେ ଆନ୍ଦୋଳନ କରି ମନ୍ତ୍ରୀଙ୍କ ଇସ୍ତଫା ଦାବି କରୁଥିଲେ ।

ସେ ଆହୁରି କହିଛନ୍ତି ଯେ, ଜୁଲାଇ ୨୬ରେ ଛାତ୍ରଙ୍କ ସମର୍ଥନରେ ସେମାନେ ଶୋଭାଯାତ୍ରା କରିବେ । ଯଦି ଏଥିରେ କିଛି ଅଘଟଣ ହେଲା ତାହାଲେ ଅଘଟଣ ଘଟାଇଥିବା ବ୍ୟକ୍ତିଙ୍କୁ ମାଡ ମରାଯିବ । ଦିଲ୍ଲୀରେ ସେମାନେ ଯେପରି କଲେ ମହାରାଷ୍ଟ୍ରରେ ବି କରିବେ । ତେଣୁ ଏପରି ଅଘଟଣ ଘଟାଉଥିବା ବ୍ୟକ୍ତି ପ୍ରଦର୍ଶନରୁ ଦୂରରେ ରହିବା ଦରକାର । ଦିନକୁ ଦିନ ଛାତ୍ରଙ୍କ ପ୍ରତି ସମର୍ଥନ ବଢୁଛି । ସରକାର ଭୟରେ ଅଛନ୍ତି । ଏହାସହ ପୋଲିସକୁ ମଧ୍ୟ ସଠିକ୍ ଭାବେ କାର୍ଯ୍ୟ କରିବାକୁ ସେ କହିଛନ୍ତି ।

Also Read :- ଜେଲଦଣ୍ଡରୁ ବର୍ତ୍ତିବାକୁ ନିଜ କବର ଖୋଳି ମୃତ୍ୟୁର ନାଟକ !

ସୂଚନାଯୋଗ୍ୟ, ଗତ କିଛି ଦିନ ତଳେ ମୁମ୍ବାଇରେ ଛାଚ୍ରଙ୍କ ସମର୍ଥନରେ ଆନ୍ଦୋଳନ ହୋଇଥିଲା । ଯନ୍ତରମନ୍ତରରେ ଘଟିଥିବା ପ୍ରସଙ୍ଗକୁ ନେଇ ରାଜ୍ୟରେ ମଧ୍ୟ ଆନ୍ଦୋଳନ କରାଯାଇଥିଲା ।