ନୂଆଦିଲ୍ଲୀ, ନଭେମ୍ବର ୨୦: ଆମେରିକା, ଚୀନ୍ ଓ ରୁଷିଆର ରାଷ୍ଟ୍ରମୁଖ୍ୟଙ୍କ ଏକ ଗୁରୁତ୍ୱପୂର୍ଣ୍ଣ ବୈଠକକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ୍ କରିଛନ୍ତି ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ। ଏହାକୁ ନେଇ ବିଜେପି ଓ କଂଗ୍ରେସ ମଧ୍ୟରେ ଆରମ୍ଭ ହୋଇଛି ରାଜନୈତିକ ଝଡ଼ । 

ଶୁକ୍ରବାର ରାହୁଲ ଗାନ୍ଧୀ ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ଚୀନ୍ର ରାଷ୍ଟ୍ରପତି ସି ଜିନ୍ପିଙ୍ଗ୍ ଏବଂ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ୍ଙ୍କ ଏକାଠି ବୈଠକର ଫଟୋ ପୋଷ୍ଟ କରିଥିଲେ।ଏହି ଫଟୋ ସହ ସେ ଲେଖିଥିଲେ, "କଂଗ୍ରେସ କ୍ଷମତାରେ ଥିଲେ ଭାରତର ପ୍ରଧାନମନ୍ତ୍ରୀ ମଧ୍ୟ ଏହି ଟେବୁଲରେ ବସିଥାନ୍ତେ। ସାଲିସ୍ କରିଥିବା ଜଣେ ପ୍ରଧାନମନ୍ତ୍ରୀ କେବେ ଏହି ଟେବୁଲରେ ବସିପାରିବେ ନାହିଁ।" ଏହି ମନ୍ତବ୍ୟ ଜରିଆରେ ରାହୁଲ ମୋଦୀଙ୍କ ବୈଦେଶିକ ନୀତି ଓ ଅନ୍ତର୍ଜାତୀୟ ସ୍ତରରେ ଭାରତର ଭୂମିକାକୁ ପ୍ରଶ୍ନ କରିଛନ୍ତି।

ରାହୁଲଙ୍କ ଏହି ପୋଷ୍ଟ ପରେ ବିଜେପି ନେତାମାନେ କଂଗ୍ରେସକୁ ପାଲଟା ଆକ୍ରମଣ କରିଛନ୍ତି। କଂଗ୍ରେସ ଶାସନ ସମୟରେ ଦେଶର ସ୍ୱାର୍ଥ ସହ ସାଲିସ୍ କରାଯାଇଥିବା ବିଜେପି ଅଭିଯୋଗ କରିଛି। ବିଜେପି ମୁଖପାତ୍ର ତୁହିନ ସିହ୍ନା କହିଛନ୍ତି, ଇନ୍ଦିରା ଗାନ୍ଧୀଙ୍କ ସରକାର ସମୟରେ ଶିମଲା ଚୁକ୍ତି ପରେ ପାକିସ୍ତାନୀ ଯୁଦ୍ଧବନ୍ଦୀମାନଙ୍କୁ ମୁକ୍ତ କରାଯାଇଥିଲା। ଏହାପରେ ପାକିସ୍ତାନ ଭାରତ ବିରୋଧରେ ଆତଙ୍କବାଦକୁ ପ୍ରୋତ୍ସାହନ ଦେଇଥିବା ସେ ଅଭିଯୋଗ କରିଛନ୍ତି। ତୁହିନ ସିହ୍ନା ଆହୁରି ଅଭିଯୋଗ କରିଛନ୍ତି ଯେ, କଂଗ୍ରେସ ଶାସନ ସମୟରେ ଚୀନ୍ର କମ୍ୟୁନିଷ୍ଟ ପାର୍ଟି ସହ ୨୦୦୮ ଅଗଷ୍ଟ ୭ରେ ବେଜିଂଠାରେ ଏକ ଗୁପ୍ତ ବୁଝାମଣା ହୋଇଥିଲା। ଏହାପରେ ଚୀନ୍ର ଅନୁପ୍ରବେଶ ବଢ଼ିଥିବା ସହ ରାଜୀବ ଗାନ୍ଧୀ ଫାଉଣ୍ଡେସନ୍କୁ ଚୀନ୍ ପକ୍ଷରୁ ଅନୁଦାନ ମିଳିଥିବା ସେ ଦାବି କରିଛନ୍ତି।

ସେ ଏହା ମଧ୍ୟ କହିଛନ୍ତି ଯେ, ୨୦୦୪ରୁ ୨୦୧୪ ମଧ୍ୟରେ ଥିବା ୟୁପିଏ ସରକାରଠାରୁ ଅଧିକ ସାଲିସ୍ କରିଥିବା ସରକାର ଭାରତ ଦେଖିନାହିଁ। ଏହା ବିଜେପି ନେତାଙ୍କ ରାଜନୈତିକ ଅଭିଯୋଗ। ଅନ୍ୟ ଜଣେ ବିଜେପି ମୁଖପାତ୍ର ଆର୍ପି ସିଂହ କହିଛନ୍ତି, ରାହୁଲ ଗାନ୍ଧୀ ସବୁବେଳେ ଭାରତ ବିଷୟରେ ନକାରାତ୍ମକ ଚିତ୍ର ଉପସ୍ଥାପନ କରୁଛନ୍ତି। ତାଙ୍କ ମତରେ, ବିଶ୍ୱର ବିଭିନ୍ନ ଦେଶର ନେତାଙ୍କ ସହ ପ୍ରଧାନମନ୍ତ୍ରୀ ମୋଦୀଙ୍କର ଭଲ ସମ୍ପର୍କ ରହିଛି ଏବଂ ଆଜି ବିଶ୍ୱ ମଞ୍ଚରେ ଭାରତର ଗୁରୁତ୍ୱ ବଢ଼ିଛି।

ଏହା ପୂର୍ବରୁ ଆମେରିକାର ଚିକାଗୋ ବିଶ୍ୱବିଦ୍ୟାଳୟରେ ଏକ କାର୍ଯ୍ୟକ୍ରମରେ ଯୋଗଦେଇ ରାହୁଲ ଗାନ୍ଧୀ ଭାରତର ବୈଦେଶିକ ନୀତିକୁ ନେଇ ପ୍ରଶ୍ନ ଉଠାଇଥିଲେ। ସେ କହିଥିଲେ, ପୂର୍ବରୁ ଭାରତ ବିଶ୍ୱର ବିଭିନ୍ନ ଦେଶ ସହ ସମ୍ପର୍କ ରଖିବା ସହ ନିଜସ୍ୱ ସ୍ୱାଧୀନ ବିଦେଶ ନୀତି ଅନୁସରଣ କରୁଥିଲା। ଅନ୍ତର୍ଜାତୀୟ ପ୍ରସଙ୍ଗରେ ଭାରତର ନିଜସ୍ୱ ମତ ଓ ଗୁରୁତ୍ୱ ଥିଲା। କିନ୍ତୁ ବର୍ତ୍ତମାନ ଭାରତ ଅନ୍ତର୍ଜାତୀୟ ରାଜନୀତିରେ ନିଜର ପ୍ରଭାବ ହରାଉଛି ଏବଂ ଗୁରୁତ୍ୱପୂର୍ଣ୍ଣ ଆଲୋଚନାରୁ ଦୂରେଇ ରହୁଛି। ଏହି ପ୍ରସଙ୍ଗରେ ରାହୁଲ କହିଥିଲେ, "ଭାରତର ଆକାର ଓ ଶକ୍ତି ଅନୁସାରେ ବିଶ୍ୱରେ ଏହାର ଏକ ବଡ଼ ଭୂମିକା ରହିବା ଉଚିତ। କିନ୍ତୁ ଦୁର୍ଭାଗ୍ୟବଶତଃ ଭାରତ ଏବେ ଜଣେ ଗୌଣ ଖେଳାଳି ଭଳି ହୋଇଯାଇଛି। ଅନ୍ୟପଟେ ପାକିସ୍ତାନ ଆମେରିକା ଓ ଇରାନ ସହ ଆଲୋଚନା କରୁଛି।"

also read- ଆଉ ନାହାଁନ୍ତି ଯୋଗୀ ଆଦିତ୍ୟନାଥଙ୍କ ମାଆ, ୯୧ ବର୍ଷ ବୟସରେ ଦେହାନ୍ତ

ରାହୁଲଙ୍କ ଏହି ମନ୍ତବ୍ୟ ପରେ ବିଜେପି ତାଙ୍କୁ କଡ଼ା ସମାଲୋଚନା କରିଥିଲା। ବିଜେପି ମୁଖପାତ୍ର ପ୍ରଦୀପ ଭଣ୍ଡାରୀ ରାହୁଲଙ୍କୁ 'ପାକିସ୍ତାନ ଫ୍ୟାନ୍ବୟ' ବୋଲି କହିଥିଲେ। ସେ ପ୍ରଶ୍ନ କରିଥିଲେ, ରାହୁଲ ଗାନ୍ଧୀ ପାକିସ୍ତାନକୁ ନେଇ ଏତେ ଆଗ୍ରହୀ କାହିଁକି? ଅନ୍ତର୍ଜାତୀୟ ମଞ୍ଚରେ ସେ ସବୁବେଳେ ପାକିସ୍ତାନକୁ ଏକ ଆଦର୍ଶ ଭାବେ ଉପସ୍ଥାପନ କରୁଥିବା ଭଳି ମନେ ହେଉଛି ବୋଲି ସେ ଅଭିଯୋଗ କରିଥିଲେ। ମୋଟାମୋଟି ଭାବେ, ଆନ୍ତର୍ଜାତୀୟ ମଞ୍ଚରେ ଭାରତର ସ୍ଥାନ ଓ ପ୍ରଧାନମନ୍ତ୍ରୀଙ୍କ ବୈଦେଶିକ ନୀତିକୁ ନେଇ ରାହୁଲ ଗାନ୍ଧୀଙ୍କ ମନ୍ତବ୍ୟ ପରେ ବିଜେପି ଓ କଂଗ୍ରେସ ମଧ୍ୟରେ ରାଜନୈତିକ ବିବାଦ ତୀବ୍ର ହୋଇଛି।