ପୁରୀ ୨୬।୦୮ : ପୁରୀରେ ପୁଣି ଗଡ଼ିଲା ମୁଣ୍ଡ । ଜଗନ୍ନାଥ ବଲ୍ଲଭ ପାର୍କିଂରେ ହତ୍ୟାକାଣ୍ଡ। ପଥରରେ ଛେଚି ଜଣେ ବ୍ୟକ୍ତିଙ୍କୁ ଅତି ବିଭତ୍ସ ଭାବେ ହତ୍ୟା କରାଯାଇଛି। ଜଗନ୍ନାଥ ବଲ୍ଲଭ ବେଣ୍ଟ ପୋଖରୀ ନିକଟରେ ଏହି ଜଘନ୍ୟ ହତ୍ୟାକାଣ୍ଡ ଘଟିଛି। ଟାଉନ ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପୁରୀ ହସ୍ପିଟାଲ କୁ ପଠାଇଛି।

ତେବେ ବର୍ତ୍ତମାନ ସୁଦ୍ଧା ମୃତକଙ୍କ ପରିଚୟ ମିଳିପାରିନଥିବା ବେଳେ ମୃତକ ଜଣକ ମାନସିକ ବିକାର ଗ୍ରସ୍ତ ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି। ତେବେ କିଏ ଏବଂ କାହିଁକି ମାନସିକ ବିକାର ଗ୍ରସ୍ତ ବ୍ୟକ୍ତିଙ୍କୁ ପଥରରେ ଛେଚି ହତ୍ୟା କଲା ତାକୁ ନେଇ ସାଧାରଣରେ ପ୍ରଶ୍ନ ଉଠିଛି। ପୋଲିସ ପକ୍ଷରୁ ଘଟଣାର ତଦନ୍ତ ଜାରି ରହିଥିବା ବେଳେ ତଦନ୍ତ ପରେ ହତ୍ୟାକାଣ୍ଡର ପ୍ରକୃତ କାରଣ ସ୍ପଷ୍ଟ ହେବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି।

Also Read:-‘TOXIC’ ଉପରେ ଚାଲିଲା ସେନ୍ସର ବୋର୍ଡର କଇଁଚି: କଟାଗଲା ଗାଳି ଓ ହିଂସାତ୍ମକ ଦୃଶ୍ୟ, ଆଉ କେଇ ଘଣ୍ଟା ପରେ ୟଶଙ୍କ ସିନେମା ହେବ ରିଲିଜ୍

ସେହିପରି କିଛି ଦିନ ପୂର୍ବରୁ ପୁରୀ ସହରରେ ମା କୁ ପୁଅ ହତ୍ୟା କରି ରୋଷେଇ ଘରେ ସ୍ଲାବ ତଳେ ମୃତଦେହ ରଖି ପ୍ଲାଷ୍ଟର କରିଦେବା ଘଟଣା ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଛି। ଏହି ଘଟଣାରେ ମୁଖ୍ୟ ଅଭିଯୁକ୍ତ କୁହାଯାଉଥିବା ମୃତ ମହିଳାଙ୍କ ପୁଅ ମଦନ ଦଳେଇ ଏବେ ଫେରାର ଅଛି। ଅଭିଯୁକ୍ତ ମଦନକୁ ଧରିବା ପାଇଁ ପୋଲିସ ଉଦ୍ୟମ ଜାରି ରଖିଛି। ମୃତ ମହିଳାଙ୍କ ଶବ ବ୍ୟବଚ୍ଛେଦ କରାଯାଇଥିବା ବେଳେ ମହିଳାଙ୍କ ମୃତ୍ୟୁ ପଛର କାରଣ ଜାଣିବା ପାଇଁ ଫୋରେନସିକ ବିଭାଗକୁ ଦାୟିତ୍ଵ ଦିଆଯାଇଛି।