ଭୁବନେଶ୍ୱର ୦୧।୦୯ : ଇଫକୋର ରାଜ୍ୟ ପରାମର୍ଶଦାତା କମିଟି ବୈଠକ । ଇଣ୍ଡିଆନ୍ ଫାର୍ମର୍ସ ଫର୍ଟିଲାଇଜର କୋଅପରେଟିଭ୍ ଲିମିଟେଡ୍ (ଇଫକୋ), ଭୁବନେଶ୍ୱର ବିପଣନ ବିଭାଗ ପକ୍ଷରୁ ଅନୁଷ୍ଠିତ ହୋଇଯାଇଛି ବୈଠକ । ହୋଟେଲ ନୋଭୋଟେଲ୍ ଠାରେ ରବିବାର ରାଜ୍ୟ ପରାମର୍ଶଦାତା କମିଟି (ଷ୍ଟେଟ୍ ଆଡଭାଇଜରୀ କମିଟି) ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ରାଜ୍ୟରେ ସାର ବଣ୍ଟନ, ଡିବିଟି (DBT) ବ୍ୟବସ୍ଥାର ସୁପରିଚାଳନା ଏବଂ ନାନୋ ସାରର ବ୍ୟାପକ ବ୍ୟବହାର ସମ୍ପର୍କରେ ରଣନୀତି ପ୍ରସ୍ତୁତ କରାଯାଇଛି।

ଏହି ଉଚ୍ଚସ୍ତରୀୟ ବୈଠକରେ ଓଡ଼ିଶା ସରକାରଙ୍କ କୃଷି ବିଭାଗର ବରିଷ୍ଠ ଅଧିକାରୀ, ଓୟୁଏଟି (OUAT) ଏବଂ ଆଇସିଏଆର-ଏନଆରଆରଆଇ (ICAR-NRRI) ର ବିଶିଷ୍ଟ ମୃତ୍ତିକା ବିଜ୍ଞାନୀ, ଆରଜିବି (RGB) ସଦସ୍ୟ ଏବଂ ଇଫକୋର ବରିଷ୍ଠ କର୍ମକର୍ତ୍ତାମାନେ ଯୋଗ ଦେଇଥିଲେ। ଇଫକୋର ବରିଷ୍ଠ କ୍ଷେତ୍ର ଅଧିକାରୀ ଶ୍ରୀ ସୁବାଷ ଚନ୍ଦ୍ର ଜେନା ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ରାଜ୍ୟ ବିପଣନ ପରିଚାଳକ ଡ. ସୌମିକ ମଣ୍ଡଳ ଉଦଘାଟନୀ ଅଭିଭାଷଣରେ ରାଜ୍ୟରେ ଇଫକୋର ବ୍ୟବସାୟିକ ପ୍ରଦର୍ଶନ ଏବଂ ଯୋଗାଣ ବ୍ୟବସ୍ଥାର ବିବରଣୀ ଉପସ୍ଥାପନ କରିଥିଲେ।

ସେହିପରି ଓଡ଼ିଶା ସରକାରଙ୍କ କୃଷି ବିଭାଗର ଉପ-ନିର୍ଦ୍ଦେଶକ (ସାର) ଶ୍ରୀ ଶାରଦା ପ୍ରସନ୍ନ କର ସାରର ସୁଷମ ବଣ୍ଟନ ଏବଂ ଡିବିଟି ସମ୍ପର୍କିତ ସମସ୍ୟାର ସମାଧାନ ଉପରେ ଆଲୋକପାତ କରିଥିଲେ। କୃଷି ବିଭାଗର ଯୁଗ୍ମ ନିର୍ଦ୍ଦେଶକ (ଗୁଣବତ୍ତା ନିୟନ୍ତ୍ରଣ ଏବଂ ପ୍ରବର୍ତ୍ତନ) ଶ୍ରୀ ଶୁଭେନ୍ଦୁ କର ସାର ନିୟନ୍ତ୍ରଣ ଆଦେଶ (FCO) ଅଧୀନରେ ଆବଶ୍ୟକୀୟ ନିୟମ ଏବଂ ଗୁଣବତ୍ତା ପରୀକ୍ଷଣ ପଦ୍ଧତି ଉପରେ ସୂଚନା ପ୍ରଦାନ କରିଥିଲେ। ଡ. ରବୀନ୍ଦ୍ର କୁମାର ନାୟକ (ପୂର୍ବତନ ପ୍ରଫେସର, ଇଫକୋ ଚେୟାର) ଏବଂ ଡ. ରାଘବାନନ୍ଦ ନାୟକ (ପ୍ରଫେସର, ଇଫକୋ ଚେୟାର, OUAT) ନାନୋ ସାରର କାର୍ଯ୍ୟକାରିତା ଏବଂ କୃଷି କ୍ଷେତ୍ରରେ ଏହାର ଉପଯୋଗିତା ଉପରେ ତଥ୍ୟ ଉପସ୍ଥାପନ କରିଥିଲେ।

ଡ. ପ୍ରତାପ ଭଟ୍ଟାଚାର୍ଯ୍ୟ (ପ୍ରମୁଖ ବୈଜ୍ଞାନିକ ଏବଂ ବିଭାଗୀୟ ମୁଖ୍ୟ, କ୍ରପ୍ ପ୍ରଡକ୍ସନ୍) ଏବଂ ଡ. ରୁବିନା ଖାନମ୍ (ବୈଜ୍ଞାନିକ, CRRI/NRRI) ମୃତ୍ତିକା ସଂସ୍କାର ତଥା ଫସଲ ଉତ୍ପାଦନରେ ଭ୍ୟାଲୁ-ଆଡେଡ୍ ଫସଫୋଜିପସମର ଗୁରୁତ୍ୱ ସମ୍ପର୍କରେ ଆଲୋଚନା କରିଥିଲେ।  ନୂଆଦିଲ୍ଲୀ ଇଫକୋର ମାର୍କେଟିଂ ନିର୍ଦ୍ଦେଶକ ଡ. ଯୋଗେନ୍ଦ୍ର କୁମାର ଚାଷୀଙ୍କ ଆୟ ବୃଦ୍ଧିରେ ନାନୋ ୟୁରିଆ, ନାନୋ ଡିଏପି ଏବଂ ଅନ୍ୟାନ୍ୟ ଅଭିନବ ସାରର ଭୂମିକା ସମ୍ପର୍କରେ ମତ ରଖିଥିଲେ। ଇଫକୋର ଅନ୍ୟତମ ନିର୍ଦ୍ଦେଶକ ଶ୍ରୀ ଶୁଭ୍ରଜିତ୍ ପାଢ଼ୀ ଓଡ଼ିଶାର କୃଷି କ୍ଷେତ୍ରରେ ସମବାୟ ବ୍ୟବସ୍ଥାକୁ ସୁଦୃଢ଼ କରିବାରେ ଇଫକୋର ସହଯୋଗିତା ଉପରେ ଗୁରୁତ୍ୱାରୋପ କରିଥିଲେ।

ଏହି ଅବସରରେ ବିଭିନ୍ନ ଜିଲ୍ଲାରେ ନାନୋ ସାର ବିକ୍ରୟ ଏବଂ ଚାଷୀ ସଚେତନତା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଶ୍ରେଷ୍ଠ କ୍ଷେତ୍ର କର୍ମଚାରୀ ଓ ବିକ୍ରେତାମାନଙ୍କୁ ସମ୍ବର୍ଦ୍ଧିତ କରାଯାଇଥିଲା। ଆରଜିବି ସଦସ୍ୟଙ୍କ ସହିତ ପ୍ରଶ୍ନୋତ୍ତର କାର୍ଯ୍ୟକ୍ରମ ପରେ ଇଫକୋର ଉପ-କ୍ଷେତ୍ର ପରିଚାଳକ ଶ୍ରୀ ବିକ୍ରମ କେଶରୀ ପାତ୍ର ଧନ୍ୟବାଦ ଅର୍ପଣ କରିଥିଲେ।