ପୁରୀ ୨୮।୮: ନେପାଳରେ ଘଟିଥିବା ଭୟଙ୍କର ଜଳପ୍ରଳୟରେ ଏବେ ସୁଦ୍ଧା ମୃତ୍ୟୁ ସଂଖ୍ୟା ୪୭୨ ଛୁଇଁଛି । ୧୬ ଶହରୁ ଅଧିକ ଲୋକ ନିଖୋଜ ହୋଇଛନ୍ତି । ଯାହା ଭିତରେ ଅଛନ୍ତି ୨୯୦ରୁ ଅଧିକ ଭାରତୀୟ । ନିଖୋଜଙ୍କ ଭିତରେ ଅଛନ୍ତି ୩୦ ଦେଶର ନାରଗିକ । ଆମେରିକାର ୬୩ ଜଣ ଓ କାନାଡ଼ାର ୨୫ ଜଣ ପର୍ଯ୍ୟଟକ ନିଖୋଜ ଅଛନ୍ତି । ବିଭିନ୍ନ ସ୍ଥାନରୁ ମୃତଦେହ ମିଳିବାରେ ଲାଗିଛି । ଅନେକ ଲୋକ ନିଖେଳ ଥିବାରୁ ମୃତ୍ୟୁସଂଖ୍ୟା ବଢ଼ିବାର ସମ୍ଭାବନା ରହିଛି ।

ତେବେ ନେପାଳ ପ୍ରଳୟଙ୍କାରୀ ବନ୍ୟାକୁ ନେଇ ପ୍ରତିକ୍ରିୟା ରଖିଛନ୍ତି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ । ମନ୍ତ୍ରୀ କହିଛନ୍ତି, ଏବେବି ଓଡ଼ିଶାରୁ ୫ ଜଣ ନିଖୋଜ ଅଛନ୍ତି । ସେମାନଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ପାଇଁ ରାଜ୍ୟ ସରକାର, କେନ୍ଦ୍ର ସରକାର ଓ ନେପାଳ ଦୂତାବାସ ସହ ଯୋଗାଯୋଗରେ ଅଛନ୍ତି । ହେଲ୍ପ ଲାଇନ୍ ନମ୍ବର ମଧ୍ୟ ଜାରି କରାଯାଇଛି । ସମସ୍ତେ ସୁରକ୍ଷିତ ଭାବେ କିଭଳି ଉଦ୍ଧାର ହେବେ ସେ ନେଇ ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ପ୍ରାର୍ଥନା କରୁଛୁ ବୋଲି ମନ୍ତ୍ରୀ କହିଛନ୍ତି ।

ପ୍ରଳୟଙ୍କରୀ ବନ୍ୟାରେ ନେପାଳର ୪ ଜିଲ୍ଲା ସମ୍ପୂର୍ଣ୍ଣ ଛାରଖାର ହୋଇଯାଇଛି । ଅନେକ ସହର, ଗାଁ, ଘର, ରାସ୍ତାଘାଟ ଓ ପୋଲ ଭାସିଯାଇଛି । ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି ୧୩ ହଜାର ଯବାନ । ନିଖୋଜ ଲୋକମାନଙ୍କ ତଲାସୀ ଜାରି ରହିଛି । ନେପାଳ ସେନା, ପୋଲିସ ଓ ଅନ୍ୟ ଅର୍ଦ୍ଧସାମରିକ ବାହିନୀର ଯବାନ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ପ୍ରଭାବିତ ଅଞ୍ଚଳରେ ଲୋକଙ୍କୁ ହେଲିକପ୍ଟରରୁ ଖାଦ୍ୟ ପ୍ୟାକେଟ, ଟେଣ୍ଟ ଓ ଅନ୍ୟ ଅତ୍ୟାବଶ୍ୟକ ସାମଗ୍ରୀ ପକାଯାଉଛି। ବିଭିନ୍ନ ସ୍ଥାନରୁ ପାଣି କାଦୁଅ ଭିତରୁ ମୃତଦେହ ବାହାରିବାରେ ଲାଗିଛି। ପାଣି କାଦୁଅ ଭିତରେ ସୁରକ୍ଷିତ ଥିବା ଜୀବନ ବଞ୍ଚାଇବାକୁ ପ୍ରୟାସ ଜାରି ରହିଛି ।

Also Read:- ପ୍ରଳୟଙ୍କରୀ ବନ୍ୟାରେ ନେପାଳ ଛାରଖାର, ନିଖୋଜ ତାଲିକାରେ ୩ ଓଡ଼ିଆ

ବନ୍ୟା ଯୋଗୁ ଭିତ୍ତିଭୂମିକୁ ସର୍ବାଧିକ କ୍ଷତି ପହଞ୍ଚିଛି । ଏଥିରେ ୧୩ଟି ଜଳବିଦ୍ୟୁତ ପ୍ରକଳ୍ପ କ୍ଷତିଗ୍ରସ୍ତ ହୋଇଛି । ଅନେକ ଅଞ୍ଚଳରେ ପରିବହନ ଯୋଗାଯୋଗ ବ୍ୟବସ୍ଥା ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି । ପ୍ରାୟ ୪୦ କିଲୋମିଟରର ରାସ୍ତା ସମ୍ପୂର୍ଣ୍ଣ ଧୋଇଯାଇଛି । ସରକାରୀ ତଥ୍ୟ ଅନୁସାରେ ୩୫ ବ୍ରିଜ୍ ଓ ୪୫ ସସ୍ପେନ୍ ସନ ବ୍ରିଜକୁ ବନ୍ୟାର ପ୍ରଖର ସ୍ରୋତ ଭସାଇ ନେଇଛି । ରାସ୍ତାଘାଟ ଓ ବ୍ରିଜ ଭାସିଯାଇଥିବାରୁ ଅନେକ ଅଞ୍ଚଳକୁ ଯାତାୟାତ ସମ୍ଭବ ହୋଇପାରି ନାହିଁ । ସେଠାରେ ଉଦ୍ଧାରକାରୀ ଦଳ ପହଞ୍ଚିବା କଷ୍ଟକର ହୋଇଛି । କାଠମାଣ୍ଡୁରେ ଥିବା ଭାରତୀୟ ଦୂତାବାସ ପକ୍ଷରୁ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଖୋଲାଯିବା ସହ ହେଲ୍ପଲାଇନ ନମ୍ବର ମଧ୍ୟ ଜାରି କରାଯାଇଛି ।

Watch Video: