ନୂଆଦିଲ୍ଲୀ ୩୦।୧୧: ମଧ୍ୟପ୍ରଦେଶ ରାଜଧାନୀ ଭୋପାଲରେ ଜମିୟତ-ଉଲେମା-ଏ-ହୀନ୍ଦ ଅଧ୍ୟକ୍ଷ ମୌଲାନା ମହମୁଦ ମଦନୀଙ୍କ ବିବାଦୀୟ ବୟାନ ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି। ଏବେ ତାଙ୍କ ବୟାନର ପ୍ରତିକ୍ରିୟା ଦେଇଛନ୍ତି ଅଲ ଇଣ୍ଡିଆ ଇମାମ ଅର୍ଗାନାଇଜେସନର ଚିଫ୍ ଇମାମ ଡ. ଇମାମ ଉମର ଅହମଦ ଇଲିୟାସୀ। ଏ ନେଇ ସେ ଏକ ବୟାନ ଜାରି କରିଥିବା ବେଳେ ଏହା ଅନାବଶ୍ୟକ ଓ ଦେଶ ବିଭାଜନକାରୀ ବୋଲି କହିଛନ୍ତି। ଡ.ଇଲିୟାସୀ କହିଛନ୍ତି ଯେ ନା ମୁଁ ନିଜେ ନା ଦେଶର କୌଣସି ମୁସଲମାନ ମହମୁଦ ମଦନୀଙ୍କ ବୟାନରେ ସହମତ।

ଏପରି ବୟାନକୁ ଡ. ଇଲିୟାସୀ ଭିତ୍ତିହୀନ ଓ ଏହା ଦ୍ୱାରା ଦେଶର ପରିବେଶ ଖରାପ ହେବ ବୋଲି କହିଛନ୍ତି। ଡ. ଇଲିୟାସୀ କହିଛନ୍ତି ଯେ ମଦନୀଙ୍କର ନା ତ ସରକାରଙ୍କ ଉପରେ ଭରସା ଅଛି ନା ସୁପ୍ରିମକୋର୍ଟଙ୍କ ଉପରେ। ତେବେ ଭାଷଣରେ ମଦନୀ କେଉଁ ବାର୍ତ୍ତା ଦେବାକୁ ଚାହୁଁଛନ୍ତି ମୁଁ ବୁଝି ପାରୁ ନାହିଁ ବୋଲି ଡ. ଇଲିୟାସୀ କହିଛନ୍ତି। ତେବେ ଖାସ କରି ମଦନୀ ତାଙ୍କ ଭାଷଣରେ ମୁସଲମାନଙ୍କୁ ଉଲ୍ଲେଖ କରିଛନ୍ତି, ହେଲେ ମୁଁ କହୁଛି ଦେଶର ମୁସଲମାନ ତାଙ୍କ କଥାରେ ସହମତ ନୁହନ୍ତି। ତାଙ୍କ କାକା ମଧ୍ୟ କିଛି ସମୟ ପୂର୍ବରୁ ବିବାଦୀୟ ବୟାନ ଦେଇଥିଲେ। ସେହି ବୟାନରେ ବି ଦେଶର ପରିବେଶ ବିଗିଡିଥିଲା।

ତେବେ ଡ. ଇଲୟାସୀ କହିଛନ୍ତି ଯେ ‘ଆମକୁ ତାଙ୍କ ଭାଷଣ ପଛର ଉଦ୍ଦେଶ୍ୟକୁ ବୁଝିବାକୁ ହେବ। ଦେଶର ଶାନ୍ତି ଉପରେ ଯେପରି ପ୍ରଭାବ ନପଡେ, କାରଣ ଆଜି ଦେଶ ବିରୋଧୀ ଶକ୍ତି ସକ୍ରିୟ ଅଛନ୍ତି ଓ ଦେଶର ଶାନ୍ତି କ୍ଷୁର୍ଣ୍ଣ କରିବାକୁ ଉଦ୍ୟମ କରୁଛନ୍ତି। ତେବେ କୌଣସି ଭାରତୀୟ ମୁସଲମାନ ତାଙ୍କ କଥାରେ ସହମତ ନୁହନ୍ତି’ ବୋଲି ଡ. ଇଲିୟାସୀ କହିଛନ୍ତି। ଏଣୁ ସେ ସଫା ସଫା କୁହନ୍ତୁ ତାଙ୍କର ଉଦ୍ଦେଶ୍ୟ କ’ଣ? ଭୋପାଲରେ ଜମିୟର-ଉଲେମା-ଏ-ହୀନ୍ଦ ଅଧ୍ୟକ୍ଷ ମୌଲାନା ମହମୁଦ ମଦନୀ ଏକ ସମ୍ମିଳନୀକୁ ସମ୍ବୋଧିତ କରି ବିବାଦୀୟ ଭାଷଣ ଦେଇଛନ୍ତି।

ଏଥିରେ ସେ ବାବ୍ରି ମସଜିଦକୁ ନେଇ ସୁପ୍ରିମକୋର୍ଟଙ୍କ ରାୟ ଓ ଦେଶର ସରକାରଙ୍କ ନୀତି ନିୟମ ଉପରେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେବେବି ଅତ୍ୟାତାର ହେବ ସେବେ ଜିହାଦ ହେବ। ଏହାଛଡା ସେ ବନ୍ଦେମାତରମକୁ ନେଇ ମଧ୍ୟ ବିବାଦୀୟ ବୟାନ ଦେଇଛନ୍ତି। ତାଙ୍କର ଏହି ବୟାନ ଏବେ ଇଣ୍ଟରନେଟରେ ଭାଇରାଲ ହେଉଥିବା ବେଳେ ତାଙ୍କ ବୟାନକୁ ଅଧିକାଂଶ ଲୋକେ ସାମ୍ପ୍ରଦାୟିକତାକୁ ଉସକାଇବା ନଜରରେ ଦେଖୁଛନ୍ତି।