ନୂଆଦିଲ୍ଲୀ: ତିନି ଦିନିଆ ଭାରତ ଗସ୍ତରେ ଅଛନ୍ତି ଆର୍ଜେଣ୍ଟିନା ଫୁଟବଲ୍ କିମ୍ବଦନ୍ତୀ ଲିଓନେଲ୍ ମେସି। ତାଙ୍କର ଗସ୍ତ କୋଲକାତାରୁ ଆରମ୍ଭ ହୋଇଛି। ମେସି ହେଉଛନ୍ତି ମିଳିତ ଜାତିସଂଘ ଶିଶୁ ପାଣ୍ଠି (ୟୁନିସେଫ୍)ର ବ୍ରାଣ୍ଡ ଆମ୍ବାସାଡର। "GOAT India"ରେ ସାମିଲ ହୋଇଛନ୍ତି। ଏହି ଗସ୍ତ ସମୟରେ ସେ କୋଲକାତାର ସଲ୍ଟ ଲେକ୍ ଷ୍ଟାଡିୟମ ମଧ୍ୟ ପରିଦର୍ଶନ କରିଥିଲେ। ଏଠାରେ ପ୍ରଶଂସକମାନେ ସକାଳରୁ ଷ୍ଟାରଙ୍କ ଝଲକ ଦେଖିବା ପାଇଁ ଅପେକ୍ଷା କରିଥିଲେ। ତଥାପି ଷ୍ଟାଡିୟମରେ ଏକ ବଡ଼ ହଙ୍ଗାମା ହୋଇଥିଲା।

ସଲ୍ଟ ଲେକ୍ ଷ୍ଟାଡିୟମରେ ମେସି ଫ୍ୟାନ୍ସଙ୍କ ଭିଡ଼ ଜମିଥିଲା। ପ୍ରଶଂସକମାନେ ମେସିଙ୍କ ଝଲକ ଦେଖିବା ପାଇଁ ଷ୍ଟାଡିୟମର ବ୍ରାକେଟିଂ ଚଢ଼ିବାକୁ ଚେଷ୍ଟା କରୁଥିବା ଦେଖାଯାଇଥିଲା। ସେମାନେ ଚେୟାର ଏବଂ ପାଣି ବୋତଲ ଫିଙ୍ଗିବାକୁ ଆରମ୍ଭ କରିଥିଲେ। ବ୍ୟାରିକେଡ୍ ଭାଙ୍ଗି ପଡ଼ିଆ ଭିତରକୁ ପ୍ରବେଶ କରିଥିଲେ। ବାର୍ ପୋଷ୍ଟଗୁଡ଼ିକ ମଧ୍ୟ ଭାଙ୍ଗି ଦେଇଥିଲେ।

ରିପୋର୍ଟ ଅନୁଯାୟୀ, ସଲ୍ଟ ଲେକ୍ ଷ୍ଟାଡିୟମରେ ଖରାପ ବ୍ୟବସ୍ଥା ଯୋଗୁଁ ପ୍ରଶଂସକଙ୍କ କ୍ରୋଧ ପ୍ରକାଶ ପାଇଥିଲା। ଲିଓନେଲ୍ ମେସି ଶୀଘ୍ର ପଡ଼ିଆ ଛାଡିଯିବାରୁ କିଛି ପ୍ରଶଂସକ ବିରକ୍ତ ହୋଇଥିଲେ। ମେସିଙ୍କ ସହ ସାକ୍ଷାତ ସେଲ୍ଫି ନେବାକୁ ଅପେକ୍ଷା କରିଥିଲେ। ମାତ୍ର ୧୦ ମିନିଟ୍ ପାଇଁ ଆସିଥିଲେ ମେସି। ତାଙ୍କୁ ନେତା ଓ ମନ୍ତ୍ରୀମାନେ ଘେରିଯାଇଥିଲେ। ଏପରିକି ଆୟୋଜକ କହିଥିଲେ ବଲିଉଡ୍ ଷ୍ଟାର ଶାହରୁଖ ଖାନ୍ ଆସିବେ କିନ୍ତୁ ଆସିଲେନି। ୧୨ ହଜାର ଟଙ୍କାର ଟିକେଟ୍ ଓ ଘଣ୍ଟା ଘଣ୍ଟା ଅପେକ୍ଷାକୁ ନେଇ ହଙ୍ଗାମା ହୋଇଥିଲା।

ରିପୋର୍ଟ ଅନୁସାରେ ଷ୍ଟାଡିୟମର ପରିସ୍ଥିତି ଦ୍ରୁତ ଗତିରେ ବିଗିଡ଼ି ଯାଇଥିଲା। ଯାହା ଫଳରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା। ମେସି ଅନ୍ୟ ଭିଆଇପିଙ୍କ ସହିତ ଷ୍ଟାଡିୟମ ଛାଡିବାକୁ ନିଷ୍ପତ୍ତି ନେଇଥିଲେ। ରିପୋର୍ଟ ଅନୁସାରେ, ସେ ୧୦ ମିନିଟରୁ କମ୍ ସମୟ ପାଇଁ ଭିତରେ ରହିଥିଲେ। ଆର୍ଜେଣ୍ଟିନା କିମ୍ବଦନ୍ତୀଙ୍କୁ ଦେଖିବା ପାଇଁ ଘଣ୍ଟା ଘଣ୍ଟା ଅପେକ୍ଷା କରିଥିବା ଅନେକ ପ୍ରଶଂସକ ଗୋଟିଏ ଝଲକ ମଧ୍ୟ ନପାଇବାରୁ ନିରାଶ ହୋଇଥିଲେ। ସେମାନେ ସ୍ଥାନରେ ପହଞ୍ଚିବା ପାଇଁ ୨ ହଜାରରୁ ୧୦ ହଜାର ଟଙ୍କା ଖର୍ଚ୍ଚ କରିଥିଲେ। ଫଳରେ ବିଶୃଙ୍ଖଳା ଆହୁରି ବୃଦ୍ଧି ପାଇଥିଲା।