କଟକ ୩୦।୧୧: ଆସନ୍ତା ଡ଼ିସେମ୍ବର ୯ ତାରିଖରେ ଆନ୍ତର୍ଜାତୀୟ ବାରବାଟୀ ଷ୍ଟାଡିୟମରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବ ପ୍ରଥମ ଟି-ଟ୍ୱେଣ୍ଟି ମ୍ୟାଚ୍ । ଏହି ମ୍ୟାଚ୍‌କୁ ନେଇ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ବାରବାଟୀର ପିଚ୍ ଉଭୟ ରେଡ୍ ଓ ବ୍ଲାକ୍ ସଏଲରେ ପ୍ରସ୍ତୁତ କରାଯାଉଛି ।

ସୋମବାର ଅର୍ଥାତ ଡିସେମ୍ବର ୧ ତାରିଖରେ ଅନଲାଇନରେ ଆରମ୍ଭ ହେବ ଟିକେଟ ବିକ୍ରି । ଏ ନେଇ ସୂଚନା ଦେଲେ ଓସିଏ ସମ୍ପାଦକ ସଞ୍ଜୟ ବେହେରା । ଚଳିତ ମ୍ୟାଚ୍‌ରେ ଅନଲାଇନରେ କେବଳ ୨ ହଜାର ଟିକେଟ୍ ବିକ୍ରି କରାଯିବ । ପୂର୍ବ ମ୍ୟାଚ୍‌ରେ ଅନଲାଇନ୍‌ରେ ୪ ହଜାର ଟିକେଟ୍ ଥିଲା । District by Zomato ଆପ୍‌ରେ ଉପଲବ୍ଧ ହେବ ଅନଲାଇନ୍ ଟିକେଟ୍ । ଯେଉଁମାନେ ଅନଲାଇନ ଟିକେଟ୍ କିଣିବେ ଆସନ୍ତା ଡ଼ିସେମ୍ବର ୮ ଓ ୯ରେ କେମ୍ବ୍ରିଜ୍ ସ୍କୁଲ୍‌ରୁ ସେମାନଙ୍କ ଟିକେଟ୍ ସଂଗ୍ରହ କରିବେ ।

ଏଥିପାଇଁ District by zomato ଆପ୍‌ରେ ଆବେଦନ କରିବେ ଦର୍ଶକ । ଚଳିତ ବର୍ଷ ଟିକେଟ୍ ସଂଖ୍ୟା କମିଥିବା ବେଳେ ଅନଲାଇନରେ ୨ ହଜାର ଟିକେଟ୍ ବିକ୍ରି ପାଇଁ ନିଷ୍ପତ୍ତି ନିଆଯାଇଛି । ଗ୍ୟାଲେରୀ ନଂ ୧ ଓ ୩ର ଟିକେଟ୍ ମୂଲ୍ୟ ୧୧୦୦ ଥିବାବେଳେ ଗ୍ୟାଲେରୀ ନଂ ୨ ଓ ୪ର ୯୦୦ ଟଙ୍କା, ଗ୍ୟାଲେରୀ ନଂ ୫ର ୧୨୦୦ ଟଙ୍କା, ଗ୍ୟାଲେରୀ ନଂ ୭ର ୭୦୦ଟଙ୍କା, ସ୍ପେଶିଆଲ ଏନକ୍ଲୋକରର ୬୦୦୦ଟଙ୍କା, ଏସି ବକ୍ସର ୮୦୦୦ଟଙ୍କା, ନ୍ୟୁ ପ୍ୟାଭିଲିୟନ ୧୦,୦୦୦ଟଙ୍କା, କର୍ପୋରେଟ ବକ୍ସ ଟିକେଟ୍‌ର ଦାମ୍ ୨୦,୦୦୦ଟଙ୍କା ରହିଛି ।

ସେହିଭଳି ପୂର୍ବ ମ୍ୟାଚରେ ୪୪ ହଜାର ୫୦୦ ଟିକେଟ ବିକ୍ରି ହୋଇଥିବା ବେଳେ ଚଳିତ ମ୍ୟାଚରେ ୪୨ ହଜାର ଟିକେଟ ବିକ୍ରି କରାଯିବ । ଗ୍ୟାଲେରୀର ସିଟ୍‌କୁ ୧୯ ଇଞ୍ଚ୍ ବଦଳରେ ୨୨ ଇଞ୍ଚ୍ କରାଯାଇଛି । ୧୮ ହଜାର ୪୦୦ କମ୍ପ୍ଲିମେଣ୍ଟାରୀ ଟିକେଟ୍ ରହିଥିବା ବେଳେ ଚଳିତ ବର୍ଷ ଉଭୟ ଅନଲାଇନ ଓ  ଅଫଲାଇନରୁ ୩୦୮୦ ଟିକେଟ୍ ସାଧାରଣ ଦର୍ଶକଙ୍କ କଟିଥିବା ବେଳେ କମ୍ପ୍ଲିମେଣ୍ଟାରୀରୁ ୫୬୦ ଟିକେଟ୍ କଟିଛି । ଚଳିତ ମ୍ୟାଚ୍ ପାଇଁ ଆସନ୍ତା ଡିସେମ୍ବର ୫ରେ ଅଫଲାଇନ ଟିକେଟ ବିକ୍ରି କରାଯିବ । ଡିସେମ୍ବର ୩ ତାରିଖ ଓ ୪ ତାରିଖରେ ଅନୁବନ୍ଧିତ କ୍ଲବ୍ ମାନଙ୍କୁ ଟିକେଟ୍ ବିକ୍ରି କରାଯିବ ।

ମ୍ୟାଚ୍ ଦିନ ୪ଟା ବେଳକୁ ଦର୍ଶକ ମାନେ ଷ୍ଟାଡିୟମ୍ ପରିସରକୁ ପ୍ରବେଶ କରିପାରିବେ । ଏହାସହ ମ୍ୟାଚ୍ ଆରମ୍ଭ ହେବା ପୂର୍ବରୁ ଦର୍ଶକ ମାନେ ଲାଇଟ୍ ଶୋ’ର ମଜା ମଧ୍ୟ ନେଇପାରିବେ ।