ଭୁବନେଶ୍ୱର: ବିଜୁ ଜନତା ଦଳରେ ସୁଜାତା ରାଉତ । ଭାରତୀୟ ପ୍ରାଶାସନିକ ସେବାରୁ ଅବସର ନେବାର କିଛି ମାସ ପରେ ବିଜୁ ଜନତା ଦଳର ସଦସ୍ୟତା ଗ୍ରହଣ କରିଛନ୍ତି ୨୦୦୦ ମସିହା ବ୍ୟାଚ୍ ଆଇଏଏସ୍ ଅଫିସର ଶ୍ରୀମତୀ ସୁଜାତା ରାଉତ । ସରକାରୀ ଚାକିରି କାଳରେ ନବୀନ ପଟ୍ଟନାୟକ ନେତୃତ୍ୱାଧୀନ ସରକାରଙ୍କ ଅଧିନରେ ୨୪ ବର୍ଷ ଓଡ଼ିଶାର ସେବା କରିଥିବା ସୁଜାତା ରାଉତ ଏବେ ଆରମ୍ଭ କରିଛନ୍ତି ନୂଆ ଇନିଂସ । ଆନୁଷ୍ଠାନିକ ଭାବେ ବିଜେଡିରେ ଯୋଗ ଦେବା ପରେ ସେ କହିଛନ୍ତି, ନବୀନ ପଟ୍ଟନାୟକଙ୍କ ନେତୃତ୍ୱରେ ପୁଣି ଥରେ ସେ ଓଡ଼ିଶା ଏବଂ ଓଡ଼ିଶାବାସୀଙ୍କ ସେବା କରିବାର ସୁଯୋଗ ଲାଭ କରିଛନ୍ତି ।

ତେବେ ସବୁଠୁ ବଡ଼ କଥାଟି ହେଲା ସୁଜାତା ରାଉତଙ୍କ ବିଜେଡି ଏଣ୍ଟ୍ରିର ଖବର ସୋସିଆଲ୍ ମିଡିଆରେ ଜବରଦସ୍ତ ଭାଇରାଲ୍ । ଭଳିକି ଭଳି ଥମ୍ୱ, ହେଡିଂ ଆଉ ସ୍ଲୋଗାନର ପୋଷ୍ଟ । ବୁଧବାର ୨୪ ଜୁନରୁ ହିଁ ସୋସିଆଲ୍ ମିଡିଆରେ ଭାଇରାଲ୍ ହୋଇଛି ସୁଜାତା ରାଉତଙ୍କ ଖବର । ସୋସିଆଲ୍ ମିଡିଆରେ କେବଳ ଖବର ନୁହେଁ, ଭିଡିଓ ଆଉ ସ୍ୱାଗତ-ପ୍ରଶଂସାର ମାଳ ମାଳ ପୋଷ୍ଟ ।

୨୦୨୫ରେ ଆଇଏଏସ୍ ଚାକିରିରୁ ସ୍ୱେଚ୍ଛାକୃତ ଅବସର ନେଇଥିଲେ କେନ୍ଦ୍ରାପଡ଼ା ଝିଅ ଶ୍ରୀମତୀ ସୁଜାତା ରାଉତ । ସେବେଠାରୁ ସେ ସକ୍ରିୟ ରାଜନୀତିକୁ ଆସିବେ ବୋଲି ଚର୍ଚ୍ଚା ହେଉଥିଲା । କଟକ ଏବଂ ସୁନ୍ଦରଗଡ ଜିଲ୍ଲାପାଳ ଭାବେ ବେଶ ସୁନାମ ଅର୍ଜନ କରିଥିବା ଶ୍ରୀମତୀ ସୁଜାତା ଅଧିକ ସୁଖ୍ୟାତି ଅର୍ଜନ କରିଥିଲେ ମିଶନ ଶକ୍ତିର ମୁଖ୍ୟ ଭାବେ । ରାଜ୍ୟର କୋଣ ଅନୁକୋଣର ମହିଳାଙ୍କ ସହ ଯୋଡ଼ି ହୋଇଥିଲେ ନବୀନ ପଟ୍ଟନାୟକଙ୍କ ମହିଳା ସଶକ୍ତିକରଣ ଅଭିଯାନର ମୁଖ୍ୟ ବିନ୍ଧାଣୀ ଶ୍ରୀମତୀ ସୁଜାତା । କାର୍ଯ୍ୟଦକ୍ଷତା ଓ ଅଭିଜ୍ଞତା ପାଇଁ ତାଙ୍କ ଉପରେ ଗୁରୁତ୍ୱପୂର୍ଣ୍ଣ କାର୍ଯ୍ୟ ଅର୍ପଣ କରିଥିଲେ ତତ୍କାଳୀନ ସରକାର ।

ପ୍ରାଶାସନିକ ସେବା ପରେ ଏବେ ସେ ରାଜନୀତିରେ । ଶଙ୍ଖ ଭବନରେ ଆନୁଷ୍ଠାନିକ ଭାବେ ବିଜେଡିରେ ଯୋଗଦେବା ପରେ ଶ୍ରୀମତୀ ସୁଜାତା କହିଛନ୍ତି, "ବିଜୁ ଜନତା ଦଳରେ ଯୋଗଦେବା ପରେ ମୁଁ ଓଡ଼ିଶାର ସେବା ପାଇଁ ପୁଣି ଥରେ ନବୀନ ପଟ୍ଟନାୟକଙ୍କ ନେତୃତ୍ୱରେ ସୁଯୋଗ ପାଇଛି । ମହାପ୍ରଭୁ ଜଗନ୍ନାଥଙ୍କ କୃପା, ଦଳର ନେତୃତ୍ୱ ଏବଂ ଲକ୍ଷ ଲକ୍ଷ ପାର୍ଟି କ୍ୟାଡରଙ୍କ ଆଶୀର୍ବାଦ ସହ ମୁଁ ନିଷ୍ଠାର ସହ ଉତ୍ସର୍ଗୀକୃତ ଭାବେ ଓଡ଼ିଶାର ଜନସାଧାରଣଙ୍କ ସେବା କରିବି ।"

ଶ୍ରୀମତୀ ସୁଜାତାଙ୍କ ରାଉତଙ୍କ ବିଜେଡି ଏଣ୍ଟ୍ରି କେବଳ ଗଣମାଧ୍ୟମ, ସୋସିଆଲ୍ ମିଡିଆ ନୁହଁ ବରଂ କର୍ମୀ ଓ ଦଳୀୟ ନେତାଙ୍କର ମଧ୍ୟରେ ବି ବେଶ ଆଲୋଚ୍ୟ ହୋଇଛି । ଗୁରୁବାର ଶ୍ରୀମତୀ ସୁଜାତା ଶଙ୍ଖ ଭବନରେ ପହଞ୍ଚିବା ସମୟରେ ସ୍ୱାଗତ ସମ୍ଭାଷଣରୁ ତାହା ସ୍ପଷ୍ଟ ବାରି ହୋଇଥିଲା । ବିଶେଷକରି ବିଜେଡିର ମହିଳା ନେତ୍ରୀ ଓ କର୍ମୀମାନେ ତାଙ୍କୁ ପାଛୋଟି ନେଇଥିଲେ । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ତୈଳଚିତ୍ରରେ ପୁଷ୍ପାଞ୍ଜଳି ଦେଇଥିଲେ ଶ୍ରୀମତୀ ସୁଜାତା । ଶଙ୍ଖ ଭବନରେ ଆଗଧାଡ଼ିରେ ବସିଥିଲେ । ବିଜେଡି ସୁପ୍ରିମୋ ନବୀନ ପଟ୍ଟନାୟକ ତାଙ୍କୁ ଦଳୀୟ ଉତ୍ତରୀୟ ଦେଇ ଦଳରେ ସାମିଲ କରିବା ପୂର୍ବରୁ ଶ୍ରୀମତୀ ସୁଜାତା ପ୍ରଥମେ ତାଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ ।

ଶ୍ରୀ ପଟ୍ଟନାୟକ ଦଳରେ ଶ୍ରୀମତୀ ସୁଜାତାଙ୍କୁ ସାମିଲ କରିବା ପରେ କହିଥିଲେ, "ମୁଁ ଶ୍ରୀମତୀ ସୁଜାତା ରାଉତଙ୍କୁ ବିଜେଡିକୁ ସ୍ୱାଗତ କରୁଛି । ସେ ଦଳର ଜଣେ ସାଧାରଣ ସଦସ୍ୟ ଭାବେ ଦଳରେ ଯୋଗ ଦେଉଛନ୍ତି । ସେ ଜଣେ ଆଇଏଏସ୍ ଅଫିସର ଭାବେ ଅନେକ ଗୁରୁତ୍ୱପୂର୍ଣ୍ଣ ପଦ ପଦବୀରେ କାର୍ଯ୍ୟ କରିସାରିଛନ୍ତି । ବିଶେଷ କରି ଆଇଏଏସ୍ ଭାବେ ତାଙ୍କ ଶେଷ ପଦବୀ ବେଶ ଗୁରୁତ୍ୱପୂର୍ଣ୍ଣ ଥିଲା, ଯାହାକି ଆମ ରାଜ୍ୟର ଅନେକ ମହିଳାଙ୍କ ସ୍ୱାର୍ଥ ସହ ଜଡ଼ିତ ପ୍ରସଙ୍ଗ ପ୍ରତି ଯତ୍ନବାନ ଥିଲା ।"

ଶ୍ରୀ ପଟ୍ଟନାୟକ ଆହୁରି ମଧ୍ୟ କହିଥିଲେ, ନିଶ୍ଚିତ ଯେ ସମୟକ୍ରମେ ସେ ଏବେ ତାଙ୍କ ନୂଆ ଭୂମିକା ତୁଲାଇବେ, ତାଙ୍କର ନିଷ୍ଠା ଓ ଅଭିଜ୍ଞତା ଉପଯୋଗ କରିବେ । ଜନସାଧାରଣଙ୍କ ସହାୟତା ବିଶେଷ କରି ମହିଳାମାନଙ୍କ କରିବେ ।

ଶ୍ରୀମତୀ ସୁଜାତାଙ୍କ ବିଜେଡିରେ ଏଣ୍ଟ୍ରି କିନ୍ତୁ ସୋସିଆଲ୍ ମିଡିଆ ବା ସାମାଜିକ ଗଣମାଧ୍ୟମରେ ବେଶ୍ ଟ୍ରେଣ୍ଡ୍ କରୁଛି । ବିଭିନ୍ନ ପ୍ଲାଟଫର୍ମରେ ୟୁଜର ଏବଂ ପ୍ରଶଂସକ ଭଳିକି ଭଳି ପୋଷ୍ଟ, ଲେଖା ଏବଂ କମେଣ୍ଟ ଭାଇରାଲ୍ ହେଉଛି ।