ପାଠପଢ଼ା ପାଇଁ ଟଙ୍କା ନଥିଲା, ଦାଦନ ଖଟିବାକୁ ଚାଲିଗଲେ ବେଙ୍ଗାଲୁରୁ, ୧୯ ବର୍ଷ ଶୁଭମଙ୍କ ସଂଘର୍ଷଯାତ୍ରା

ଭୁବନେଶ୍ୱର ୦୨/୦୯: ଚଷା ପୁଅ ହେବ ଡାକ୍ତର । ଧାନ କଟା ହାତ ଧରିବ ସିରିଞ୍ଜ, କଇଁଞ୍ଚି । ଦାଦନ ପଇସାରେ ନିଟ୍ କ୍ରାକ୍ । ଝାଟି ମାଟି ଦଦରା ଘରେ ପାଲଟିବ ଉଆସ । ବିଲରେ ଧାନ କେଣ୍ଡା ସାଉଁଟୁଥିବା ପିଲା ରୋଗ ଭଲ କରିବ । କାରଣ ଏଠି ସଂଘର୍ଷର ଅନ୍ୟନାମ ଶୁଭମ । ଅର୍ଥାଭାବରେ ବୁଡି ରହୁଥିବା ପରିବାରର ପାଦ ତଳେ ଲାଗୁନି । ଏଇ ଅଭାବୀ ଘରର ପୁଅ ନିଟ୍ କ୍ରାକ କରିଛି । ଖୋର୍ଦ୍ଧା ଜିଲ୍ଲା ମେଧାବୀ ଛାତ୍ର ୧୯ ବର୍ଷୀୟ ଶୁଭମ୍ ଶବରଙ୍କର କାହାଣୀ ସାରା ଦେଶରେ ଚର୍ଚ୍ଚିତ । ପଲ୍ଲିରୁ ଦିଲ୍ଲୀ ଶୁଭମଙ୍କ ପ୍ରଶଂସାରେ ଶତମୁଖ । ନିଜେ ଦାଦନ ଖଟି ରୋଜଗାର କରି ଉପାର୍ଜିତ ଅର୍ଥରୁ ପାଇଛନ୍ତି ସଫଳତା ।
ଦିନ ମଜୁରିଆ ଭାବେ ବେଙ୍ଗାଲୁରୁରେ କାମ କରୁଥିଲେ ଶୁଭମ । ମାସିକ ରୋଜଗାର ଥିଲା ୧୫ ହଜାର ଟଙ୍କା । ଦିନେ ଏମିତି କାମ ବ୍ୟସ୍ତ ଥିବା ବେଳେ ହଠାତ୍ ଆସିଥିଲା ଫୋନ୍ । ସେପଟୁ ଶୁଭିଥିଲା ମିଠା ଆଣି ଆସ । ତୁମର ଦୁଃଖର ଦିନ କଟିଲା, ଆଉ ଖଟିବାକୁ ପଡିବନି ଦାଦନ । କିଛି ସମୟ ପାଇଁ ବୁଝିପାରିନିଥିଲେ ଶୁଭମ । ଆଉ ବୁଝିବା ପରେ ଆଖିରୁ ବୋହିଥିଲା ଖୁସିର ଅଶ୍ରୁ । ଏବେ ସେ ବ୍ରହ୍ମପୁର ମେଡିକାଲ କଲେଜରେ ଡାକ୍ତରୀ ପାଠ ପଢ଼ିବା ପାଇଁ ମନୋନିତ । ଖୋର୍ଦ୍ଧା ଜିଲ୍ଲା ମୁଦୁଲିଢିହ ଗ୍ରାମର ପିଲା ଶୁଭମ । ବାପା ସହଦେବ ଶବର ଓ ମାଆ ରଙ୍ଗି ଶବର ପେସାରେ ଚାଷୀ । ଚାଷ କାମରୁ ଚଳେ ପରିବାର । ପରିବାରର ଅଳ୍ପ ରୋଜଗାରରେ ମୁଦୁଲିଢିହ ଗାଁ ନିକଟବର୍ତ୍ତୀ ନିଳାଦ୍ରୀପ୍ରସାଦରେ ସ୍କୁଲ ଶିକ୍ଷା ସାରିଥିଲେ ଶୁଭମ୍‌ । ପରେ ଶୁଭମ୍ ଭୁବନେଶ୍ୱର ବିଜେପି କଲେଜରେ ଯୁକ୍ତ ଦୁଇ ଶିକ୍ଷା ଗ୍ରହଣ କରିବା ପାଇଁ ନାମ ଲେଖାଇଥିଲେ । ହେଲେ ପୁଅର ପାଠପଢା ପାଇଁ ଆବଶ୍ୟକତା ରହିଥିବା ଅର୍ଥ ଖର୍ଚ୍ଚ କରିବାରେ ପରିବାର ବର୍ଗ ସକ୍ଷମ ନଥିଲେ । ତଥାପି ବହୁ କଷ୍ଟରେ ମେଧାବୀ ଶୁଭମ୍‌ +2 ଶିକ୍ଷା ଶେଷ କରିଥିଲେ ।​​​​​​​​​​​​​​

କୁହାଯାଏ ଯାହାର କେହି ନାହିଁ ତାର ଅଛନ୍ତି ଭଗବାନ । ଠିକ୍ ସେମିତି ବ୍ରହ୍ମପୁରର ଶିକ୍ଷକ ବାସୁଦେବ ମହାରଣାଙ୍କ ସହିତ ଶୁଭମ୍‌ଙ୍କର ହୋଇଥିଲା ସାକ୍ଷାତ । ଶିକ୍ଷକ ବାସୁଦେବ NEET ପ୍ରବେଶିକା ପରୀକ୍ଷା ଦେବା ପାଇଁ ଶୁଭମଙ୍କୁ ଦେଇଥିଲେ ପରାମର୍ଶ । କିନ୍ତୁ ଏଥିପାଇଁ ପରିବାର ଲୋକ ଟଙ୍କା ଖର୍ଚ୍ଚ ଦେଇପାରିବେ କି ନାହିଁ ତାକୁ ନେଇ ଦ୍ୱନ୍ଦରେ ଥିଲେ ଶୁଭମ । ଶେଷରେ ବାସୁଦେବ ସାର୍‌ଙ୍କ ପରାମର୍ଶ କ୍ରମେ NEET ପରୀକ୍ଷା ଦେଇ ନିଜ ଗାଁକୁ ଫେରିଥିଲେ । ଘରର ଆର୍ଥିକ ଅଭାବ ସାଙ୍ଗକୁ ମନରେ ପାଠ ପଢିବାର ଆଗ୍ରହ ଥିଲା ଶୁଭମଙ୍କର । ସବୁ କଥାକୁ ମନରେ ରଖି ଘର ଛାଡିଥିଲେ ଶୁଭମ୍‌ । ଶ୍ରମିକ ଭାବରେ କାର୍ଯ୍ୟ କରିବାକୁ ବେଙ୍ଗାଲୁରୁ ଚାଲିଗଲେ । ସେଠାରେ ଏକ ଘରୋଇ କମ୍ପାନୀରେ ଶ୍ରମିକ ଭାବରେ କାମ କରିବା ସହ ମାସକୁ ୧୫ ହଜାର ଟଙ୍କା ରୋଜଗାର କରୁଥିଲେ । 

ଶୁଭମଙ୍କ ସଫଳତାକୁ ନେଇ ଏବେ ସାରା ଓଡ଼ିଶା ଗର୍ବୀତ । ଅଭିନନ୍ଦନ ଜଣାଇବା ପାଇଁ ଘରକୁ ଛୁଟିଛି ଲୋକଙ୍କ ସୁଅ । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ରାଜନୈତିକ ସଚିବ ସନ୍ତୃତ ମିଶ୍ର ଜଣାଇଛନ୍ତି ଶୁଭେଚ୍ଛା । କହିଛନ୍ତି ଶୁଭମଙ୍କ ଯାତ୍ରା ପ୍ରେରଣା, ଶକ୍ତି ଓ ସଂଘର୍ଷର ଏକ ଚମତ୍କାର ଉଦାହରଣ । ସେପଟେ ବାପା-ମାଆ ସିନା ପୁଅ ସଫଳତା ନେଇ ଗର୍ବୀତ, କିନ୍ତୁ ଆର୍ଥିକ ସ୍ଥିତି ନେଇ ଚିନ୍ତିତ । ମେଧାବୀ ପୁଅର MBBS ପାଠ୍ୟକ୍ରମ ସମାପ୍ତ କରିବାରେ ସରକାର ସାହାଯ୍ୟ କରିବାକୁ ସରକାରଙ୍କୁ ନିବେଦନ କରିଛନ୍ତି ଅଭିଭାବକ ।