ବରଗଡ଼ ୩୦।୧୧: ବରଗଡ଼ ସ୍ଥିତ କ୍ରିଷ୍ଣା ବିକାଶର ୨୩ତମ ବାର୍ଷିକୋତ୍ସବ ‘ଇଲେକ୍ଟ୍ରା ୨୦୨୫-୨୬’ ମହା ସମାରୋହରେ ଅନୁଷ୍ଠିତ ହୋଇଯାଇଛି । ଏହି ବାର୍ଷିକୋତ୍ସବକୁ ଅତିଥି ମାନେ ପ୍ରଥମେ ଦୀପ ପ୍ରଜ୍ଜ୍ଵଳନ କରି ଉଦ୍‌ଘାଟନ କରିଥିଲେ । ପରେ କ୍ରିଷ୍ଣା ବିକାଶର ଛାତ୍ରଛାତ୍ରୀ ମାନଙ୍କ ଦ୍ବାରା ସ୍ୱାଗତ ଭାଷଣ ତଥା ଅତିଥି ପରିଚୟ ପ୍ରଦାନ କରାଯାଇଥିଲା । ବିକାଶ ଆବାସିକ ବିଦ୍ୟାଳୟର କାର୍ଯ୍ୟକାରୀ ଅଧ୍ୟକ୍ଷ ଶିଶିର ପ୍ରସାଦ ରାଉଳ ଓ ସିନିୟର ସେକେଣ୍ଡାରୀ ଶାଖାର ଅଧ୍ୟକ୍ଷ ଚିତ୍ତରଞ୍ଜନ ପତି ବାର୍ଷିକ ବିବରଣୀ ପାଠ କରିଥିଲେ ।

ବରଗଡ଼ ସାଂସଦ ପ୍ରଦୀପ ପୁରୋହିତ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । କ୍ରିଷ୍ଣା ବିକାଶ ଶିକ୍ଷାନୁଷ୍ଠାନର ଚେୟାରମ୍ୟାନ ଦାଶରୀ ମୂରଲୀ କ୍ରିଷ୍ଣାଙ୍କ ମାର୍ଗଦର୍ଶନରେ ସର୍ବଭାରତୀୟ ସ୍ତରରେ ଏକ ଅଗ୍ରଗଣ୍ୟ ଶିକ୍ଷାନୁଷ୍ଠାନ ହୋଇପାରିଛି ବୋଲି ପ୍ରଦୀପ ପୁରୋହିତ ମତ ପ୍ରକାଶ କରିଥିଲେ । କ୍ରିଷ୍ଣା ବିକାଶ ଗ୍ରୁପର ଚେୟାରମ୍ୟାନ ନିଜ ବକ୍ତବ୍ୟରେ କହିଥିଲେ ଯେ, ଶିକ୍ଷାନୁଷ୍ଠାନ ଛାତ୍ରଛାତ୍ରୀ ମାନଙ୍କର ସମୂହ ଉନ୍ନତି ପାଇଁ ‘କିଣ୍ଡର କସ୍‌ମସ୍’ ମାଧ୍ୟମରେ ବୃତ୍ତିଗତ ଓ ସାଂସ୍କୃତିକ ଉନ୍ନତି ପାଇଁ ସତତ ଯତ୍ନଶୀଳ ରହୁଛି । ଏହା ସହିତ ମେଣ୍ଟରିକ୍ସ ପ୍ରୋଗ୍ରାମ ସାହାଯ୍ୟରେ ପ୍ରତ୍ୟେକ ଶିକ୍ଷକ କିପରି ଛାତ୍ରଛାତ୍ରୀ ମାନଙ୍କର ଅତି ନିକଟବର୍ତ୍ତୀ ହୋଇ ଏକ ଶୈକ୍ଷିକ ଦୃଢ଼ ସମ୍ପର୍କ ସ୍ଥାପନ କରୁଛନ୍ତି ସେ ନେଇ ମତବ୍ୟକ୍ତ କରିଥିଲେ । କ୍ରିଷ୍ଣା ବିକାଶ ଶିକ୍ଷାନୁଷ୍ଠାନ ସମୂହରେ ଟେକ୍ନୋ ପ୍ରୋଗ୍ରାମକୁ ପ୍ରାଧାନ୍ୟ ଦେଇ ସେମାନଙ୍କ ବୈଷୟିକ ଉନ୍ନତିରେ ଯୋଗଦାନ କରିପାରୁଥିବାରୁ ଶିକ୍ଷକ ମାନଙ୍କର ପ୍ରଶଂସା କରିଥିଲେ । ପୁଣି କ୍ରିଷ୍ଣା ବିକାଶ ଶିକ୍ଷାନୁଷ୍ଠାନ ସର୍ବଭାରତୀୟ ସ୍ତରରେ ଜେଇଇ, ନିଟ୍, ସିୟୁଇଟି ଶିକ୍ଷଣ ପ୍ରୋଗ୍ରାମକୁ ପ୍ରାଧାନ୍ୟ ଦେଇ ବିଶେଷ ସଫଳତା ପାଇପାରୁଥିବାରୁ ଉଚ୍ଚ ପ୍ରଶଂସା କରିଥିଲେ ।

​​​​​​​

କ୍ରିଷ୍ଣା ବିକାଶ ଶିକ୍ଷାନୁଷ୍ଠାନ ସବୁବେଳେ ଶିକ୍ଷା ବ୍ୟତୀତ ଖେଳ, ଯୋଗ, ସଙ୍ଗୀତ, ନୃତ୍ୟ ଉପରେ ଅଧିକ ପ୍ରାଧାନ୍ୟ ଦେଇ ଛାତ୍ରଛାତ୍ରୀଙ୍କର ସର୍ବାଙ୍ଗୀନ ଉନ୍ନତି ପଥରେ ଅଗ୍ରସର ହେଉଛି ବୋଲି ବିକାଶ ଗ୍ରୁପର ମ୍ୟାନେଜିଂ ଡାଇରେକ୍ଟର ବିବେକ ଦାଶରୀ ମତବ୍ୟକ୍ତ କରିଥିଲେ । ଶେଷରେ ଛାତ୍ରଛାତ୍ରୀଙ୍କ ଦ୍ୱାରା ଯୋଗ ନୃତ୍ୟ ଗୀତ ପରିବେଷଣ ହୋଇଥିଲା ।