ନୂଆଦିଲ୍ଲୀ: ହର୍ମୁଜ ସଂକଟ ଭାରତର ତୈଳ ଓ ଗ୍ୟାସ୍ ଆମଦାନୀ ଖର୍ଚ୍ଚ ବଢାଇ ଦେଇଛି। ମାର୍ଚ୍ଚ-ଅଗଷ୍ଟ ୨୦୨୬ରେ ଭାରତ ହର୍ମୁଜ ରାସ୍ତାରେ ଆଣିଥିବା ଅଶୋଧିତ ତୈଳ, ଏଲଏନଜି ଓ ଏଲପିଜି ପାଇଁ ପାଖାପାଖି ୨୨ ବିଲିୟନ ଡଲାର ଅର୍ଥାତ ୧.୮ ଲକ୍ଷ କୋଟି ଟଙ୍କା ଅତିରିକ୍ତ ବ୍ୟୟ କରିଛି। ସିଆରଇଏ ରିପୋର୍ଟ ଅନୁସାରେ ଚୀନ୍ ପରେ କୌଣସି ଦେଶର ଏହା ଦ୍ୱିତୀୟ ସର୍ବାଧିକ ଅତିରିକ୍ତ ଆମଦାନୀ ଖର୍ଚ୍ଚ। ସିଆରଇଏ ଅନୁସାରେ ସବୁ ଜୀବାସ୍ମ ଇନ୍ଧନକୁ ମିଶାଇ ଭାରତର ନିଟ୍ ଏକ୍ସଟ୍ରା ଖର୍ଚ୍ଚ ୧୪.୪ ବିଲିୟନ ଡଲାରକୁ ପହଞ୍ଚିଛି।

ଏହା ଦେଶର ମୋଟ ଜିଡିପିର ୦.୩୮% ଅର୍ଥାତ ୧.୪ ଦିନର ଜାତୀୟ ଆୟ ସହ ସମାନ। ଏଥିରେ କେବଳ ଅଶୋଧିତ ତୈଳର ନେଟ୍ ଏକ୍ସଟ୍ରା ଖର୍ଚ୍ଚ ୨୦.୫ ବିଲିୟନ ଡଲାର ଥିଲା। ତେବେ କେବଳ ଭାରତ ନୁହେଁ ହର୍ମୁଜ ସଂକଟ ପରେ ୬ ମାସରେ ବିଶ୍ୱର ଜୀବାସ୍ମ ତୈଳ କ୍ରେତାମାନେ ମୋଟ ୩୩୦ ବିଲିୟନ ଡଲାର ଅତିରିକ୍ତ ବ୍ୟୟ କରିଛନ୍ତି। ଏଥିରେ ଅଶୋଧିତ ତୈଳ ବାବଦକୁ ୧୬୪.୧ ବିଲିୟନ ଡଲାର ଖର୍ଚ୍ଚ ହୋଇଛି। ଏହି ସଂକଟ ପରେ ବ୍ରେଣ୍ଟ କ୍ରୁଡ ମୂଲ୍ୟ ବଜାରର ପୁରୁଣା ଅନୁମାନ ତୁଳନାରେ ହାରାହାରି ୩୫% ଅଧିକ ରହିଛି। ମାର୍ଚ୍ଚରୁ ଅଗଷ୍ଟ ମଧ୍ୟରେ ବ୍ରେଣ୍ଟର ହାରାହାରି ଦର ପ୍ରତି ବ୍ୟାରଲ ୯୩ ଡଲାର ରହିଥିଲା, ଯାହା ଜୁଲାଇ ୨୩ତାରିଖରେ ବ୍ୟାରଲ ପିଛା ୧୦୫ ଡଲାରକୁ ପହଞ୍ଚି ଯାଇଥିଲା।

ସେହିପରି ଭାରତ ମାର୍ଚ୍ଚରୁ ଅଗଷ୍ଟ ମଧ୍ୟରେ ବାହାରୁ ଆମଦାନୀ କରୁଥିବା ଏଲପିଜି ପାଇଁ ପୁରୁଣା ଦରରୁ ୨୯% ଅଧିକ ପୈଠ କରିଛି। ଏହି ସମୟରେ ଏଲପିଜି ଆମଦାନୀ ପରିମାଣ ୨୬% କମ୍ ଥିଲା। ଏହି ୬ ମାସରେ କେବଳ ଏଲପିଜି ଆମଦାନୀ ବିଲ୍ ୪.୭ ବିଲିୟନ ଡଲାରକୁ ପହଞ୍ଚିଥିଲା। ଏଥିରେ ଏଲପିଜି ପାଇଁ ପୈଠ ହୋଇଥିବା ଅତିରିକ୍ତ ୧.୧ ବିଲିୟନ ଡଲାର ଚିନ୍ତାର କାରଣ ପାଲଟିଥିଲା। ମାର୍ଚ୍ଚରେ ଭାରତର ଏଲପିଜି ଆମଦାନୀ ପିଛିଲା ୨ ବର୍ଷ ତୁଳନାରେ ୪୯% ହ୍ରାସ ହୋଇଥିଲା। ସେହିପରି ଆମେରିକୀୟ ଏଲପିଜି ଆମଦାନୀ ଫେବୃଆରୀର ୮%ରୁ ବଢି ୩୨ %କୁ ପହଞ୍ଚିଥିଲା।