ବେଙ୍ଗାଲୁରୁ: କର୍ଣ୍ଣାଟକ କଂଗ୍ରେସରେ ମୁଖ୍ୟମନ୍ତ୍ରୀ ପଦକୁ ନେଇ ଟଣାଓଟରା ଜାରି ରହିଛି। ମୁଖ୍ୟମନ୍ତ୍ରୀ ସିଦ୍ଧରମୈୟା ଓ ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କୁ ନେଇ ଏବେ ଅକଳରେ କଂଗ୍ରେସ ହାଇକମାଣ୍ଡ। ଏହା ମଧ୍ୟରେ ଡିକେ ଶିବକୁମାର ରବିବାର ଦିଲ୍ଲୀ ଯିବାକୁ ଇସାରା କରିଛନ୍ତି। ଆବଶ୍ୟକ ପଡ଼ିଲେ ରାଜ୍ୟର ପାର୍ଟି ନେତା ଦିଲ୍ଲୀ ଯିବେ ବୋଲି କହିଛନ୍ତି। ଡିକେ କହିଛନ୍ତି ଦିଲ୍ଲୀ ଯିବା ମନ୍ଦିର ଯିବା ସହ ସମାନ। ସିଏମ ପଦକୁ ନେଇ କର୍ଣ୍ଣାଟକର ରାଜନୀତି ମାହୋଲ ବେଶ ସରଗରମ ରହିଛି।

କଂଗ୍ରେସ ସରକାରରେ ଏକତାର ପ୍ରସ୍ତାବ ଦେଇ ଉପମୁଖ୍ୟମନ୍ତ୍ରୀ ଶିବକୁମାର କହିଛନ୍ତି, ବେଙ୍ଗାଲୁରୁରେ ପାଣିପାଗ ଯୋଗୁଁ ଯେ କେହି ବି ବେଙ୍ଗାଲୁରୁ ଆସିବାକୁ ଚାହିଁବେ। ଏହା ପୂରା ସିମଲା ପରି। ଏହି ସହରର ପାଣିପାଗ ଓ ସଂସ୍କୃତି ବହୁତ ସୁନ୍ଦର। ଏଥିପାଇଁ ସମସ୍ତେ ବେଙ୍ଗାଲୁରୁ ଆସିବାକୁ ପସନ୍ଦ କରନ୍ତି। ସେହିପରି କଂଗ୍ରେସ ପାଇଁ ଦିଲ୍ଲୀ ଯିବା ମନ୍ଦିର ଯିବା ପରି ସମାନ। ଯେବେ ଆବଶ୍ୟକ ପଡ଼େ ସେ ଦିଲ୍ଲୀ ଯାଆନ୍ତି।

ରବିବାର ସକାଳେ ଶିବକୁମାର କହିଛନ୍ତି, ରାଜ୍ୟ କଂଗ୍ରେସରେ ସବୁ କିଛି ଠିକ୍ ରହିଛି। ତାଙ୍କର ଏବଂ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ମଧ୍ୟରେ କୌଣସି ମତଭେଦ ନାହିଁ। ସାମ୍ବାଦିକ ସମ୍ମିଳନୀରେ ସେ କହିଛନ୍ତି, କର୍ଣ୍ଣାଟକ କଂଗ୍ରେସର ସଭାପତି ଭାବେ ତାଙ୍କର ସୀମା କେଉଁ ଯାଏଁ ଅଛି ସେ ବେଶ ଭଲ ଭାବେ ଜାଣିଛନ୍ତି। ତାଙ୍କ ପାର୍ଟିର ଏକମାତ୍ର ଫୋକସ ୨୦୨୮ କର୍ଣ୍ଣାଟକ ବିଧାନସଭା ଉପରେ ରହିଛି। ମୋର ଏବଂ ମୁଖ୍ୟମନ୍ତ୍ରୀଙ୍କ ମଧ୍ୟରେ କୌଣସି ଫରକ ନାହିଁ। ପାର୍ଟି ସଭାପତି ଭାବେ ମୋତେ ମୋର ଲିମିଟ୍ ଜଣା। ମୁଁ କେବେ ବି ମୁଖ୍ୟମନ୍ତ୍ରୀଙ୍କ ସହ କୌଣସି ପ୍ରତିକ୍ରିୟା କିମ୍ବା ରାୟ ଭିନ୍ନ ଦେଇନି। ଆମେ ସବୁ ମିଶି କାମ କରୁଛୁ।

ସେ ଏହା ମଧ୍ୟ କହିଛନ୍ତି, କର୍ଣ୍ଣାଟକବାସୀଙ୍କ ବହୁତ କିଛି ଆଶା ରହିଛି। ଆଉ ସେମାନଙ୍କର ଆଶା ଆକାଂକ୍ଷା ପୂରା କରିବା ପାଇଁ ଆମେ ପ୍ରତିବଦ୍ଧ। ଆମର ଉଦ୍ଦେଶ୍ୟ ୨୦୨୮ ବିଧାନସଭା ଓ ୨୦୧୯ ଲୋକସଭା ନିର୍ବାଚନ ଉପରେ ରହିଛି। ମୁଖ୍ୟମନ୍ତ୍ରୀ ଏବଂ ମୁଁ ଏକ ରଣନୀତି ପ୍ରସ୍ତୁତ କରିବୁ। ଆମେ ଭିନ୍ନ ଭିନ୍ନ ପ୍ରସଙ୍ଗରେ ସର୍ବଦଳୀୟ ବୈଠକ ଡକାଇବାକୁ ଚାହୁଁଛୁ। ଉଲ୍ଲେଖନୀୟ ନେତୃତ୍ଵକୁ ନେଇ ବଢୁଥିବା ଟଣାଓଟରା ମଧ୍ୟରେ କଂଗ୍ରେସ ସଂପ୍ରତି ଏକତା ଦେଖାଇବାକୁ ଚେଷ୍ଟା କରୁଛି।