ନୂଆଦିଲ୍ଲୀ:ନେପାଳରେ ବୁଧବାର ସକାଳେ ହୋଇଥିବା ଭୀଷଣ ବନ୍ୟା ବ୍ୟାପକ କ୍ଷୟକ୍ଷତି କରିଛି। ଏହି ପ୍ରାକୃତିକ ବିପର୍ଯ୍ୟରେ ଏ ପର୍ଯ୍ୟନ୍ତ ୨୭୦ ଜଣଙ୍କ ମୃତ୍ୟୁ ହୋଇଥିବା ବେଳେ ୮୦୦ରୁ ଅଧିକ ଲୋକେ ନିଖୋଜ ଅଛନ୍ତି। ଏଥି ମଧ୍ୟରେ ଏକ ଖବର ସାମ୍ନାକୁ ଆସୁଛି ରକ୍ଷା ଗବେଷଣା ଓ ବିକାଶ ସଙ୍ଗଠନ (ଡିଆରଡିଓ)ର ପୂର୍ବତନ ମୁଖ୍ୟ ସତୀଶ ରେଡ୍ଡୀ ଓ ତାଙ୍କ ପତ୍ନୀ କୈଳାସ ମାନସରୋବର ଯାତ୍ରାରେ ଯାଇ ଫଶି ରହିଛନ୍ତି। ସେମାନେ ଏବେ ତୀବ୍ବଦ ସଗା କାଉଣ୍ଟିରେ ଅଛନ୍ତି ଓ ସମ୍ପୂର୍ଣ୍ଣ ସୁରକ୍ଷିତ ଥିବା ପରିବାରକୁ ସୂଚିତ କରିଛନ୍ତି।

ସେମାନେ ବୁଧବାର ସକାଳେ ବନ୍ୟା ଆସିବା ପୂର୍ବରୁ ପ୍ରଭାବିତ ଅଞ୍ଚଳ ଛାଡି ସାରିଥିଲେ। ଏଣୁ ସତୀଶ ରେଡ୍ଡୀ ଓ ତାଙ୍କ ପତ୍ନୀଙ୍କ ସମେତ ତାଙ୍କ ଦଳରେ ଥିବା ସମସ୍ତ ୩୧ ଜଣ ମାନସୋରବାର ଯାତ୍ରୀ ସୁରକ୍ଷିତ ବର୍ତ୍ତି ଯାଇଛନ୍ତି। ଏମାନେ ଏବେ ତୀବ୍ବତ-ଚୀନ ରାସ୍ତାରେ ଭାରତ ଫେରିବାକୁ ଯୋଜନା କରୁଛନ୍ତି। ତେବେ ସେମାନଙ୍କ ଫେରିବା ଚୀନ ସରକାରଙ୍କ ଉପରେ ନିର୍ଭର କରୁଛି। ଚୀନ୍-ତୀବ୍ବତ ସୀମା ଖୋଲିଲେ ସେମାନେ ଚୀନ୍ ରାସ୍ତାରେ ଭାରତ ଫେରିବେ।

ଏଥି ମଧ୍ୟରେ କାଠମାଣ୍ଡୁରେ ଅନୁଷ୍ଠିତ ଏନଟିଡିଭି ୱାର୍ଲଡ ଅନ୍ୱିକ୍ଷା ସମ୍ମିଟରେ ନେପାଳ ବିଦେଶ ମନ୍ତ୍ରୀ ଶିଶିର ଖନାଲେ କହିଛନ୍ତିଯେ କୈଳାଶ ମାନସରୋବର ଯାତ୍ରା ପାଇଁ ଅନେକ ବିଦେଶୀ ଓ ଭାରତୀୟ ଯାତ୍ରୀ ପ୍ରଭାବିତ କ୍ଷେତ୍ରରେ ଯାତ୍ରା କରୁଥିଲେ। ତେବେ ଏମାନଙ୍କ ମଧ୍ୟରୁ ୩୦୦ ଭାରତୀୟ ଯାତ୍ରୀ ନିଖୋଜ ଥିବା ସେ କହିଛନ୍ତି। ସେମାନଙ୍କ ସହ ସମ୍ପର୍କ କରିବା ପାଇଁ ଲଗାତାର ଉଦ୍ୟମ ଜାରିଥିବା ସେ ସୂଚିତ କରିଛନ୍ତି। ତେବେ ଭାରତୀୟ ବିଦେଶ ମନ୍ତ୍ରାଳୟ ଅନୁସାରେ ଏପର୍ଯ୍ୟନ୍ତ ୨୧ ଜଣ ଭାରତୀୟଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ୨୮୮ ଭାରତୀୟ ନିଖୋଜ ଥିବା ବେଳେ ସେମାନଙ୍କ ସନ୍ଧାନ ଜାରି ରହିଛି।