ନୂଆଦିଲ୍ଲୀ ୩୦/୧୧:  ଖୁବ ଶୀଘ୍ର ପାକିସ୍ତାନରେ ଦୂତାବାସ ବନ୍ଦ କରିବ ଫିନଲ୍ୟାଣ୍ଡ।  ଆଫଗାନିସ୍ତାନ ଓ ମିଆଁମାରରେ ବି ତାଲା ପଡିବ। ଏନେଇ ଆରମ୍ଭ ହୋଇଯାଇଛି ପ୍ରକ୍ରିୟା । ୨୦୨୬ ସୁଦ୍ଧା ଲାଗୁ କରାଯିବା ନେଇ ସୂଚନା ଦେଇଛନ୍ତି ଫିନଲ୍ୟାଣ୍ଡର ବୈଦେଶିକ ମନ୍ତ୍ରୀ ଏଲିନା ଭାଲଟୋନେନ୍‌ ।  । ତେବେ  ଦୁନିଆର ସବୁଠାରୁ ସୁଖୀ ଦେଶ କୁହାଯାଉଥିବା ଫିନଲ୍ୟାଣ୍ଡ କାହିଁକି ଭାରତର ଏହି ୩ ପଡୋଶୀ ଦେଶ ସହ ନେଉଛି କୂଟନେତିକ ବିରତି । ଏପରି ନିଷ୍ପତ୍ତି ପଛର କାରଣ କଣ ?

ପୁରା ବିଶ୍ବରେ ବଦଳୁଥିବା ରାଜନୈତିକ ଚିତ୍ର ମଧ୍ୟରେ ଏକ ବଡ ଘୋଷଣା କରିଛି  ଫିନଲ୍ୟାଣ୍ଡ ।  ପାକିସ୍ତାନର ଇସଲାମବାଦ, ଆଫଗାନିସ୍ତାନର କାବୁଲ ଏବଂ ମିଆଁମାରେ ଥିବା ୟାଙ୍ଗନରେ ନିଜର ଦୂତାବାସ ବନ୍ଦ କରିବ ।ଏକ ବିବୃତ୍ତିରେ ଫିନଲ୍ୟାଣ୍ଡର ବୈଦେଶିକ ମନ୍ତ୍ରାଳୟ ଏପରି ନିଷ୍ପତ୍ତି ନେଇଥିବା ସୂଚନା ଦେଇଛି । ଏହି ଦେଶଗୁଡିକରେ ପରିବର୍ତ୍ତନ ହେଉଥିବା ରାଜନୈତିକ ପରିସ୍ଥିତିକୁ ସେମାନଙ୍କ ନିଷ୍ପତ୍ତିର ଏକ ପ୍ରାଥମିକ କାରଣ ଭାବରେ ଉଲ୍ଲେଖ କରାଯାଇଛି । ବିବୃତ୍ତିରେ ଏହା ମଧ୍ୟ କୁହାଯାଇଛି  ଫିନଲ୍ୟାଣ୍ଡର  ଏହି ଦେଶଗୁଡିକ ସହିତ ସୀମିତ ବାଣିଜ୍ୟିକ  ଓ ଅର୍ଥନୈତିକ ସଂପର୍କ ରହିଛି । ସେ ଆହୁରି କହିଛନ୍ତି ଏହି ନିଷ୍ପତ୍ତି ଏମିତି ସମୟରେ ଆସିଛି  ଯେତେବେଳେ ପାକିସ୍ତାନ ସେନା ମୁଖ୍ୟ ଅସୀମ ମୁନିରଙ୍କ  ନିୟନ୍ତ୍ରଣକୁ ସୁଦୃଢ କରିବା ସହ ବିଶାଳ ଆଭ୍ୟନ୍ତରୀଣ କ୍ଷମତା ସଂଘର୍ଷରେ ଫସି ରହିଛି । ସେହିପରି ଜେଲ୍‌ରେ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ବିରୋଧରେ ହେଉଥିବା ଅତ୍ୟାଚାର ବନ୍ଦ କରିବାକୁ ଦାବି କରି ପାକିସ୍ତାନରେ ବ୍ୟାପକ ବିରୋଧ ପ୍ରଦର୍ଶନ ମଧ୍ୟ  ରହିଛି । ଇମ୍ରାନ ଖାନଙ୍କ ଭଉଣୀ,ପୁଅ ଓ ତାଙ୍କ ଦଳ ପାକିସ୍ତାନ ତେହେରିକ୍‌-ଏ-ଇନସାଫ୍‌(PTI) ନେତାମାନେ ପୂର୍ବତନ ପ୍ରଧାନମନ୍ତ୍ରୀଙ୍କ ସହ ସାକ୍ଷାତ କରିବାକୁ ଅନୁମତି ଦେବାକୁ ଦାବି କରି ଆସୁଛନ୍ତି ।

​​​​​​​

ପୂର୍ବରୁ ପାକିସ୍ତାନରେ ଦୂତାବାସ ବନ୍ଦ କରିସାରିଛି ଫିନଲ୍ୟାଣ୍ଡ

ଫିନଲ୍ୟାଣ୍ଡର ଏ ନିଷ୍ପତ୍ତି ପ୍ରଥମ ନୁହେଁ । ପୂର୍ବରୁ ମଧ୍ୟ ୨୦୧୨ରେ ଫିନଲ୍ୟାଣ୍ଡ ବଜେଟ୍‌ ପ୍ରତିବନ୍ଧକ ଯୋଗୁ ଇସଲାମବାଦରେ ଡିପ୍ଲୋମାଟିକ ମିଶନ ବନ୍ଦ କରିଦେଇଥିଲା । ତେବେ ୨୦୨୨ରେ ପୁଣି ଖୋଲିଦେଇଥିଲା । ୨୦୨୩ରେ ସ୍ବିଡେନ  ମଧ୍ୟ ସୁରକ୍ଷା ପରିସ୍ଥିତିକୁ କାରଣ ଭାବରେ ଦର୍ଶାଇ ରାଜଧାନୀରେ ଥିବା ଏହାର ଦୂତାବାସକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କରିଦେଇଥିଲା ।