ନୂଆଦିଲ୍ଲୀ: ପଶ୍ଚିମ ଏସିଆରେ ଚାଲିଥିବା ବିବାଦ ଭିତରେ ଚୀନ୍ ବୈଦେଶିକ ମନ୍ତ୍ରୀ ୱାଙ୍ଗ ୟି ଭାରତ ଏବଂ ଚୀନ୍ ମଧ୍ୟରେ ସୁଧାର ସମ୍ପର୍କରେ ଏକ ବଡ଼ ବିବୃତ୍ତି ଦେଇଛନ୍ତି। ବେଜିଂରେ ୧୪ତମ ଜାତୀୟ ପିପୁଲ୍ସ କଂଗ୍ରେସ ଅଧିବେଶନ ସମୟରେ ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଉଭୟ ଦେଶ ପରସ୍ପରକୁ ପ୍ରତିଦ୍ୱନ୍ଦ୍ୱୀ ନୁହେଁ ବରଂ ସହଯୋଗୀ ଭାବରେ ଏବଂ ବିପଦ ନୁହେଁ ବରଂ ସୁଯୋଗ ଭାବରେ ଦେଖିବା ଉଚିତ। ୱାଙ୍ଗ ୟି କହିଛନ୍ତି ଯେ, ଚୀନ୍ ଏବଂ ଭାରତ ଗୁରୁତ୍ୱପୂର୍ଣ୍ଣ ପଡ଼ୋଶୀ ଏବଂ ଉଭୟ ଗ୍ଲୋବାଲ୍ ସାଉଥ୍‌ର ସଦସ୍ୟ ଭାବରେ ଗଭୀର ସାଂସ୍କୃତିକ ଏବଂ ସମାନ ସ୍ୱାର୍ଥ ବହନ କରନ୍ତି।

ଜିନହୁଆ ନ୍ୟୁଜ୍ ଏଜେନ୍ସି ଅନୁଯାୟୀ, ୱାଙ୍ଗ ୟି ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ ଚୀନର ବୈଦେଶିକ ନୀତି ଏବଂ ବାହ୍ୟ ସମ୍ପର୍କ ଉପରେ ବିସ୍ତୃତ ଭାବରେ ଆଲୋଚନା କରିଛନ୍ତି। ଜଣେ ଭାରତୀୟ ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ ସେ କହିଛନ୍ତି, "ଚୀନ୍‌ ଏବଂ ଭାରତ ଗୁରୁତ୍ୱପୂର୍ଣ୍ଣ ପଡ଼ୋଶୀ, ଉଭୟ ଗ୍ଲୋବାଲ୍ ସାଉଥ୍‌ର, ଗଭୀର ସାଂସ୍କୃତିକ ସମ୍ପର୍କ ଏବଂ ବ୍ୟାପକ ସମାନ ସ୍ୱାର୍ଥ ସହିତ। ଚୀନ୍‌ ଏବଂ ଭାରତ ମଧ୍ୟରେ ପାରସ୍ପରିକ ବିଶ୍ୱାସ ଏବଂ ସହଯୋଗ ସହଭାଗୀ ବିକାଶ ପାଇଁ ଅତ୍ୟନ୍ତ ସହାୟକ। ବିଭାଜନ ଏବଂ ସଂଘର୍ଷ ଏସିଆର ପୁନଃରୁତ୍ଥାନ ପାଇଁ ସହାୟକ ନୁହେଁ।" ସେ ସ୍ପଷ୍ଟ କରିଛନ୍ତି ଯେ ଦୁଇ ଦେଶ ମଧ୍ୟରେ ସମ୍ପର୍କ ଏବେ ସ୍ୱାଭାବିକ ହୋଇଛି। ତେଣୁ, ଉଭୟ ଦେଶ ପାରସ୍ପରିକ ସହଯୋଗକୁ ନୂଆ ଉଚ୍ଚତାକୁ ନେଇଯିବା ପାଇଁ ପ୍ରତିବଦ୍ଧ।

ୱାଙ୍ଗ ୟି ଆହୁରି କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ରାଷ୍ଟ୍ରପତି ସି ଜିନପିଙ୍ଗ ଗତ ବର୍ଷ ଅଗଷ୍ଟରେ ତିଆନଜିନରେ ସାକ୍ଷାତ କରିଥିଲେ। କାଜାନ ପରେ ଏହି ବୈଠକ ଭାରତ- ଚୀନ୍ ସମ୍ପର୍କକୁ ଆହୁରି ମଜଭୁତ କରିଥିଲା। ଦୁଇ ନେତାଙ୍କ ମଧ୍ୟରେ ହୋଇଥିବା ସହମତିକୁ କାର୍ଯ୍ୟକାରୀ କରାଯାଉଛି। ବିଭିନ୍ନ ସ୍ତରରେ ଯୋଗାଯୋଗ ବୃଦ୍ଧି ପାଇଛି ଏବଂ ଦ୍ୱିପାକ୍ଷିକ ବାଣିଜ୍ୟ ଏକ ନୂତନ ସର୍ବକାଳୀନ ଶୀର୍ଷରେ ପହଞ୍ଚିଛି। ଚୀନ୍ ବୈଦେଶିକ ମନ୍ତ୍ରୀଙ୍କ ଅନୁଯାୟୀ, ସକ୍ରିୟ ଲୋକ- ସମ୍ପର୍କ ଉଭୟ ଦେଶର ଲୋକଙ୍କୁ ଲାଭ ଦେଇଛି।

ସୀମାରେ ଶାନ୍ତିକୁ ପ୍ରାଥମିକତା

ୱାଙ୍ଗ ୟି ସମ୍ପର୍କକୁ ସୁଦୃଢ଼ କରିବା ପାଇଁ ଚାରୋଟି ପ୍ରମୁଖ ବିନ୍ଦୁ ମଧ୍ୟ ବାଣ୍ଟିଥିଲେ। ସେ କହିଥିଲେ ଯେ ଉଭୟ ଦେଶ ପରସ୍ପରକୁ ପ୍ରତିଦ୍ୱନ୍ଦ୍ୱୀ ନୁହେଁ ବରଂ ଅଂଶୀଦାର ଭାବରେ ଏବଂ ବିପଦ ନୁହେଁ ବରଂ ସୁଯୋଗ ଭାବରେ ଦେଖିବା ଉଚିତ। ୱାଙ୍ଗ ୟି ସୀମାବର୍ତ୍ତୀ ଅଞ୍ଚଳରେ ଶାନ୍ତି ଏବଂ ସ୍ଥିରତା ବଜାୟ ରଖିବା ଏବଂ ଭଲ ପଡ଼ୋଶୀର କର୍ତ୍ତବ୍ୟ ବଜାୟ ରଖିବା ଉପରେ ଗୁରୁତ୍ୱାରୋପ କରିଥିଲେ।

ସେ ବିକାଶକୁ "ସବୁଠାରୁ ବଡ଼ ସାଧାରଣ ଭୂମି" ଭାବରେ ବର୍ଣ୍ଣନା କରିଥିଲେ, ଫଳାଫଳ ପ୍ରଦର୍ଶନ କରିବା ପାଇଁ ବ୍ୟବହାରିକ ସହଯୋଗ ପାଇଁ ଆହ୍ୱାନ କରିଥିଲେ। ପାରସ୍ପରିକ ବିଶ୍ୱାସ ହେଉଛି ଏସିଆର ପୁନରୁଦ୍ଧାରର ଚାବିକାଠି,  କିନ୍ତୁ ବିଭାଜନ ଏସିଆକୁ କ୍ଷତି ପହଞ୍ଚାଇବ।

ବିଶ୍ୱ ଦକ୍ଷିଣ ପ୍ରତି ଦାୟିତ୍ୱ

ସେ ଗୁରୁତ୍ୱାରୋପ କରିଥିଲେ ଯେ, ଭାରତ ଏବଂ ଚୀନ୍ ଚଳିତ ବର୍ଷ ଏବଂ ପରବର୍ତ୍ତୀ ବର୍ଷ BRICSର ବିକଳ୍ପ ସଭାପତିତ୍ୱରେ ପରସ୍ପରକୁ ସମର୍ଥନ କରିବା ଉଚିତ। ଭାରତ ଏହି ବର୍ଷ ଅଧ୍ୟକ୍ଷତା କରୁଛି ଏବଂ ଚୀନ୍ ଆସନ୍ତା ବର୍ଷ ଏହି ପଦବୀରେ ରହିବ।

ସେ କହିଥିଲେ ଯେ, BRICS ମାଧ୍ୟମରେ ସହଯୋଗ ବୃଦ୍ଧି କରି ଗ୍ଲୋବାଲ ସାଉଥର ଦେଶଗୁଡ଼ିକୁ ନୂତନ ଆଶା ଦିଆଯାଇପାରିବ। ଉଭୟ ଦେଶ ପରସ୍ପର ଆଡ଼କୁ ଆଗକୁ ବଢ଼ିବା ଉଚିତ ଏବଂ ଆନ୍ତର୍ଜାତିକ ସ୍ତରରେ ଦାୟିତ୍ୱ ପ୍ରଦର୍ଶନ କରି ପ୍ରତିବନ୍ଧକଗୁଡ଼ିକୁ ଦୂର କରିବା ଉଚିତ।

ସୂଚନାଥାଉକି, ଗତ କିଛି ବର୍ଷ ଧରି ଆମେରିକା ଚୀନକୁ ଆର୍ଥିକ ଏବଂ ରଣନୈତିକ ଭାବରେ ଘେରିବାକୁ ଚେଷ୍ଟା କରିଆସୁଛି। ପ୍ରଥମେ ଆମେରିକା, ଚୀନର ସବୁଠାରୁ ବଡ଼ ନିବେଶ ଗନ୍ତବ୍ୟସ୍ଥଳ ଭେନେଜୁଏଲା ଉପରେ ଆକ୍ରମଣ କରିଥିଲା। ଫଳରେ ଚୀନକୁ ଆର୍ଥିକ କ୍ଷତି ପହଞ୍ଚିଥିଳା ଏବଂ ଏବେ ଇରାନ ଉପରେ ଆକ୍ରମଣ କରି ଚୀନକୁ ପଛକୁ ଠେଲି ଦେଇଛି।

ଏହି ପରିସ୍ଥିତିରେ ଚୀନ୍ ଏହାର ପଡ଼ୋଶୀ ଭାରତ ଏବଂ ରୁଷକୁ ନିଜ ପାଖରେ ରଖିବାକୁ ଚେଷ୍ଟା କରୁଛି ଯାହା ଦ୍ୱାରା ସେ ଆମେରିକା ପାଇଁ ରଣନୈତିକ ଭାବରେ ଦୁର୍ବଳ ନହୁଏ। ଏହି କାରଣରୁ ସେ ଏବେ ଭାରତ ସହିତ ବନ୍ଧୁତା ଏବଂ ଭ୍ରାତୃତ୍ୱ ପାଇଁ ଯୁକ୍ତି କରୁଛି।