ଭୁବନେଶ୍ୱର: ପୋଷା କୁକୁର ରଖିବାକୁ ନେଇ ଆପତ୍ତି ନାହିଁ, ହେଲେ କୁକୁର ଯୋଗୁଁ ଯଦି ଅନ୍ୟ କାହାର ଅସୁବିଧା ହୁଏ, ତେବେ ଆଇନ ଅନୁଯାୟୀ ହେବ କାର୍ଯ୍ୟାନୁଷ୍ଠାନ । ପଟିଆଲାରେ ଦମ୍ପତିଙ୍କୁ କୁକୁର କାମୁଡ଼ିବା ଘଟଣା ପରେ ଭୁବନେଶ୍ୱରର କୁକୁର ମାଲିକଙ୍କୁ ଏଭଳି ସତର୍କ କରାଇଛନ୍ତି ମେୟର । ଭୁବନେଶ୍ୱରରେ ପୋଷା କୁକୁର ମାଲିକଙ୍କୁ ମେୟର ସୁଲୋଚନା ଦାସ ଦେଇଛନ୍ତି କଡ଼ା ଚେତାବନୀ ।

ପୋଷା କୁକୁର ରଖିବା ଆପଣଙ୍କ ସଉକ ହୋଇପାରେ । ହେଲେ ଏହି ସଉକ ଯେପରି ଅନ୍ୟମାନଙ୍କ ପାଇଁ ସମସ୍ୟାର କାରଣ ନହୁଏ, ସେଥିପ୍ରତି କୁକୁର ମାଲିକମାନେ ଦାୟିତ୍ୱବାନ ହେବା ଦରକାର । ପଟିଆଲାରେ ଦମ୍ପତିଙ୍କୁ କୁକୁର କାମୁଡ଼ିବା ଘଟଣା ପରେ ଏବେ ଭୁବନେଶ୍ୱରରେ ମଧ୍ୟ ପୋଷା କୁକୁର ମାଲିକଙ୍କୁ ସତର୍କ କରାଇଛି ବିଏମ୍ସି ।

ମେୟର ସୁଲୋଚନା ଦାସ କହିଛନ୍ତି, ଘରେ କିଏ ବାଘ କିମ୍ବା ଭାଲୁ ରଖନ୍ତୁ, ସେଥିରେ ତାଙ୍କର ଆପତ୍ତି ନାହିଁ । କିନ୍ତୁ ସେହି ପଶୁ କିମ୍ବା ପୋଷା କୁକୁର ଯୋଗୁଁ ଯଦି ଅନ୍ୟ କାହାର ଅସୁବିଧା ହୁଏ, ତେବେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ହେବ ।

ପୋଷା କୁକୁର ରଖୁଥିବା ଲୋକେ ନିଜ ସଉକ ପାଇଁ ନିଜ ଦାୟିତ୍ୱରେ କୁକୁର ରଖନ୍ତୁ । ହେଲେ କୁକୁରକୁ ନିଜ ନିୟନ୍ତ୍ରଣରେ ରଖିବା ମାଲିକଙ୍କ ଦାୟିତ୍ୱ । ବାହାରେ କୁକୁରକୁ ମଳତ୍ୟାଗ କରାଇବା, ବିଏମ୍ସିର ସୌନ୍ଦର୍ଯ୍ୟକରଣକୁ ନଷ୍ଟ କରିବା କିମ୍ବା କୁକୁରକୁ ନିୟନ୍ତ୍ରଣରେ ନରଖିବା ଭଳି କାର୍ଯ୍ୟକୁ ବରଦାସ୍ତ କରାଯିବ ନାହିଁ ।

ବିଶେଷକରି କୁକୁର ଯେପରି ଅନ୍ୟ ଲୋକଙ୍କୁ ଆକ୍ରମଣ ନକରେ, ସେଥିପ୍ରତି ମାଲିକମାନେ ଯତ୍ନବାନ ହେବା ଆବଶ୍ୟକ । ଲିଫ୍ଟରେ କୁକୁରକୁ ନେବା ସମୟରେ ମଧ୍ୟ ଅନ୍ୟ ଲୋକଙ୍କ ଅସୁବିଧାକୁ ଦୃଷ୍ଟିରେ ରଖିବାକୁ ମେୟର ପରାମର୍ଶ ଦେଇଛନ୍ତି ।

କୁକୁର ପାଳିବା ଉପରେ ବିଏମ୍ସିର କୌଣସି ଆପତ୍ତି ନାହିଁ । କିନ୍ତୁ ପୋଷା କୁକୁର ଯୋଗୁଁ ସାଧାରଣ ଲୋକ ହଇରାଣ ହେଲେ କିମ୍ବା କୌଣସି ଅଘଟଣ ଘଟିଲେ ମାଲିକଙ୍କୁ ଏଥିପାଇଁ ଦାୟୀ ରହିବାକୁ ପଡ଼ିପାରେ । ତେଣୁ କୁକୁର ମାଲିକମାନେ ଦାୟିତ୍ୱବାନ ହୋଇ ପୋଷା ପ୍ରାଣୀ ରଖନ୍ତୁ ବୋଲି ମେୟର ସୁଲୋଚନା ଦାସ କହିଛନ୍ତି । ପଟିଆଲାର ଘଟଣା ପରେ ପୋଷା କୁକୁରକୁ ନେଇ ପୁଣିଥରେ ଚର୍ଚ୍ଚା ବଢ଼ିଥିବା ବେଳେ ଭୁବନେଶ୍ୱରରେ ମେୟରଙ୍କ ଏହି ଚେତାବନୀ କେତେ ପ୍ରଭାବ ପକାଉଛି, ତାହା ଉପରେ ଏବେ ନଜର ।