ନୂଆଦିଲ୍ଲୀ: ଲାଲ ବାହାଦୁର ଶାସ୍ତ୍ରୀ ଅନ୍ତର୍ଜାତୀୟ ବିମାନବନ୍ଦର (ବାରାଣସୀ)ରେ ଏକ ଅଭାବନୀୟ ଘଟଣା ଘଟିଛି। ମୁମ୍ବାଇ ଅଭିମୁଖେ ଯାତ୍ରା କରିବାକୁ ଥିବା ଏୟାର ଇଣ୍ଡିଆ ଏକ୍ସପ୍ରେସ୍ (ଫ୍ଲାଇଟ୍ IX-1810)ର ଜଣେ ଯାତ୍ରୀଙ୍କ ଲାଇସେନ୍ସପ୍ରାପ୍ତ ପିସ୍ତଲରୁ ହଠାତ୍ ଗୁଳି ଫୁଟିବାରୁ ଏଏଆଇ କାର୍ଗୋ ଲଜିଷ୍ଟିକ୍ସ ଆଣ୍ଡ ଆଲାଇଡ୍ ସର୍ଭିସେସ୍ କମ୍ପାନୀ ଲିମିଟେଡର ଦୁଇଜଣ ସ୍କ୍ରିନର ଆହାତ ହୋଇଛନ୍ତି।

୧୬ ଅଗଷ୍ଟ ୨୦୨୬ (ରବିବାର) ସକାଳ ପ୍ରାୟ ୯.୩୦ ମିନିଟରେ ଏହି ଘଟଣା ଘଟିଛି । ଯାତ୍ରୀଜଣକ ଆଜମଗଡ଼ର ବାସିନ୍ଦା, ସେ ନିଜ ପତ୍ନୀଙ୍କ ସହ ମୁମ୍ବାଇ ଯିବା ପାଇଁ ଏୟାରପୋର୍ଟ ଆସିଥିଲେ ।ଯାତ୍ରୀଜଣକ ବିମାନରେ ବନ୍ଧୁକ ନେବା ପାଇଁ ଆଗରୁ ଅନୁମତି ନେଇଥିଲେ ।ସେଥିପାଇଁ ସିକ୍ୟୁରିଟି ହୋଲ୍ଡ ଏରିଆରେ ତାଙ୍କର ଯାଞ୍ଚ ଚାଲିଥିଲା।

ସ୍କ୍ରିନିଂ ସମୟରେ ବନ୍ଧୁକ ଭିତରେ ଏକ ଗୁଳି ରହିଯାଇଥିବା ଜଣାପଡ଼ିଥିଲା । ଏହି ବିଷୟରେ ଯାତ୍ରୀଜଣକ ଅଜ୍ଞ ଥିବା ଦାବି କରିଥିଲେ। ବନ୍ଧୁକରୁ ଗୁଳି ବାହାର କରିବା ସମୟରେ ଫୁଟିଯାଇଥିଲା। ଗୁଳି ଜଣେ ପୁରୁଷ ସୁରକ୍ଷା କର୍ମୀଙ୍କ ହାତରେ ଏବଂ ଜଣେ ମହିଳା କର୍ମଚାରୀଙ୍କ ଗୋଡ଼ରେ ବାଜିଥିବା ଜଣାପଡ଼ିଛି । ବିମାନବନ୍ଦର ନିର୍ଦ୍ଦେଶକ ପୁନୀତ ଗୁପ୍ତାଙ୍କ ସୂଚନା ଅନୁଯାୟୀ, ଉଭୟଙ୍କୁ ତୁରନ୍ତ 'ନ୍ୟୁ ଲକ୍ଷ୍ମୀ ଟ୍ରମା ସେଣ୍ଟର'ରେ ଭର୍ତ୍ତି କରାଯାଇଛି। ବର୍ତ୍ତମାନ ଦୁଇଜଣଙ୍କ ସ୍ବାସ୍ଥ୍ୟାବସ୍ଥା ବିପଦମୁକ୍ତ ରହିଛି।

ସ୍ଥାନୀୟ ପୋଲିସକୁ ଏ ବିଷୟରେ ଅବଗତ କରାଯାଇଛି ଏବଂ ମାମଲାର ଯାଞ୍ଚ ପାଇଁ ଏକ ଏଫଆଇଆର ରୁଜୁ କରାଯାଇଛି।
ସେପଟେ AAICLAS ସ୍କ୍ରିନର ବିମାନବନ୍ଦରରେ ଯାତ୍ରୀଙ୍କ ସାମଗ୍ରୀ  ଏବଂ କାର୍ଗୋ ମାଲପରିବହନର ସୁରକ୍ଷା ଯାଞ୍ଚ କରନ୍ତି।
ସେମାନେ ଏକ୍ସ-ରେ ମେସିନ୍, ମେଟାଲ୍ ଡିଟେକ୍ଟର ଏବଂ ଆଧୁନିକ ସ୍କାନିଂ ପ୍ରଯୁକ୍ତିବିଦ୍ୟା ବ୍ୟବହାର କରି ଯାଞ୍ଚ କରନ୍ତି।
ସାମଗ୍ରୀ ଭିତରେ କୌଣସି ବେଆଇନ ଜିନିଷ, ଅସ୍ତ୍ରଶସ୍ତ୍ର କିମ୍ବା ବିପଜ୍ଜନକ ସାମଗ୍ରୀ ଥିବା ଚିହ୍ନଟ ହେଲେ, ସେମାନେ ତୁରନ୍ତ ବିମାନବନ୍ଦର ପ୍ରଶାସନ ଓ ସୁରକ୍ଷା ବାହିନୀକୁ ଖବର ଦିଅନ୍ତି।