ନୂଆଦିଲ୍ଲୀ: ଆଗାମୀ ୨୦୨୭ ମସିହାରେ ହେବାକୁ ଥିବା ଉତ୍ତରପ୍ରଦେଶ ବିଧାନସଭା ନିର୍ବାଚନ ସାରା ଦେଶର ନଜର। ଏନେଇ ଏବେଠୁ ରାଜନୈତିକ ପାଣିପାଗ ସରଗରମ। ଏହି ସମୟରେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆଗାମୀ ନିର୍ବାଚନରେ ଭାରତୀୟ ଜନତା ପାର୍ଟି ଏବଂ ଏନଡିଏ ମେଣ୍ଟର ବିଜୟକୁ ନେଇ ଏକ ବଡ଼ ଦାବି କରିଛନ୍ତି। ଇଣ୍ଡିଆ ଟୁଡେର ଏକ ରିପୋର୍ଟ ଅନୁଯାୟୀ,  ସେ ତାଙ୍କର ପାରମ୍ପରିକ ୮୦-୨୦ ଫର୍ମୁଲାକୁ ଆଧାର କରି କହିଛନ୍ତି ଯେ ଏନଡିଏ ମେଣ୍ଟ ୟୁପିର ମୋଟ ଆସନର ୮୦ ପ୍ରତିଶତ ଆସନରେ ଜିତିବ।

ଉତ୍ତରପ୍ରଦେଶ ବିଧାନସଭାରେ ମୋଟ ୪୦୩ଟି ଆସନ ରହିଛି। ଯଦି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଏହି ୮୦ ପ୍ରତିଶତ ଆସନ ଅଧିକାର କରିବାର ଆକଳନ ସତ ହୁଏ, ତେବେ ଏନଡିଏ ମେଣ୍ଟ ପ୍ରାୟ ୩୨୨ଟି ଆସନରେ ଜିତିବ ବୋଲି ଆଶା କରାଯାଉଛି। ଏହାଦ୍ୱାରା ବିରୋଧୀ ଦଳଗୁଡ଼ିକ ମାତ୍ର ୮୧ଟି ଆସନରେ ସୀମିତ ରହିଯିବେ।

ଏଥିସହ, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଯୁବପିଢ଼ି ବା ‘ଜେନ୍-ଜି’ ଭୋଟରମାନେ ବିଜେପି ସହ ଅଛନ୍ତି ବୋଲି ଦୃଢ଼ ଆଶା ବ୍ୟକ୍ତ କରିଛନ୍ତି। ଡବଲ୍ ଇଞ୍ଜିନ ସରକାରର ବିକାଶମୂଳକ କାର୍ଯ୍ୟ ଓ ଉନ୍ନତ ଆଇନଶୃଙ୍ଖଳା ପରିସ୍ଥିତିକୁ ଆଧାର କରି ତୃତୀୟ ଥର ପାଇଁ ଏନଡିଏ କ୍ଷମତାକୁ ଫେରିବ ବୋଲି ସେ କହିଛନ୍ତି। ଅନ୍ୟପଟେ ବିରୋଧୀ ସମାଜବାଦୀ ପାର୍ଟି ଓ କଂଗ୍ରେସ ମଧ୍ୟ ଶାସକ ଦଳକୁ କଡ଼ା ଟକ୍କର ଦେବା ପାଇଁ ରଣନୀତି ପ୍ରସ୍ତୁତ କରୁଛନ୍ତି।

Also Read :- ସମୁଦ୍ରରୁ ସିଧା ବେଳାଭୂମିକୁ ମାଡ଼ି ଆସିଲା ୨ ହୋଭରକ୍ରାଫ୍ଟ, ପ୍ରଥମେ ଭୟଭୀତ ହେଲେ ସ୍ଥାନୀୟ ଲୋକେ

ଉଲ୍ଲେଖଯୋଗ୍ୟ ଯେ, ୨୦୧୭ ନିର୍ବାଚନରେ ଏନଡିଏ ୩୨୫ଟି ଆସନ ଜିତିଥିବାବେଳେ ୨୦୨୨ ନିର୍ବାଚନରେ ଏହି ସଂଖ୍ୟା ହ୍ରାସ ପାଇ ୨୭୩ରେ ପହଞ୍ଚିଥିଲା। ତେବେ ମୁଖ୍ୟମନ୍ତ୍ରୀଙ୍କ ଏହି ନୂତନ ଭବିଷ୍ୟବାଣୀ ସୂଚାଉଛି ଯେ, ଶାସକ ମେଣ୍ଟ ପୁଣିଥରେ ୨୦୨୨ର କ୍ଷତିକୁ ଭରଣା କରି ରାଜ୍ୟରେ ଏକ ଦୃଢ଼ ଓ ସ୍ଥିର ସରକାର ଗଠନ କରିବାକୁ ଲକ୍ଷ୍ୟ ରଖିଛି। ଏହି ରଣନୀତିଜ୍ଞ ବୟାନ ପରେ ରାଜ୍ୟର ରାଜନୈତିକ ପାଣିପାଗ ଅଧିକ ରୋମାଞ୍ଚକର ହୋଇପଡ଼ିଛି।