ନୂଆଦିଲ୍ଲୀ: ଏଚ-୧ବି ଭିସା ବିବାଦ ଲାଗି ରହିଥିବା ବେଳେ ବିଶ୍ୱର ସବୁଠାରୁ ଧନୀ ବ୍ୟକ୍ତି ତଥା ଆମେରିକାର ସଫଳ ଉଦ୍ୟୋଗୀ ଟେସ୍ଲା ସିଇଓ ଏଲନ ମସ୍କ ଭାରତୀୟ ପ୍ରତିଭାର ପ୍ରଶଂସା କରିଛନ୍ତି। ଭାରତୀୟ ପ୍ରତିଭାକୁ ନିଯୁକ୍ତି ଦେଇ ଆମେରିକା ବର୍ଷ ବର୍ଷ ଧରି ଲାଭବାନ ହୋଇଛି ବୋଲି ମସ୍କ କହିଛନ୍ତି।

ଭାରତୀୟ ଯୁବ ଉଦ୍ୟୋଗୀ ଜିରୋଧା ସହସଂସ୍ଥାପକ ନିଖିଲ କାମାଥଙ୍କ ପିପୁଲ ବାଏ ଡବ୍ଲୁଟିଏଫ୍ ପଡକାଷ୍ଟରେ ସାକ୍ଷାତ୍କାର ଦେଇ ଏପରି କହିଛନ୍ତି ମସ୍କ। କାମାଥଙ୍କ ପଡକାଷ୍ଟରେ ମସ୍କ ସାକ୍ଷତକାର ଦେବା ନେଇ ଦୀର୍ଘଦିନ ହେଲା ଚର୍ଚ୍ଚା ହୋଇ ଆସୁଥିଲା।ଏବେ ତାଙ୍କ ସହ ଲମ୍ବା ଆଲୋଚନା କରିଛନ୍ତି ମସ୍କ। ପୂର୍ବରୁ ଏଚ-୧ବି ଭିସାର ଦୁରୁପଯୋଗ ଓ ପୂର୍ବ ସରକାରରେ ଅତ୍ୟଧିକ କୋହଳ ମନୋଭାବ ଯୋଗୁ ଦେଶରେ ଆଣ୍ଟି-ଇମିଗ୍ରେସନ(ପ୍ରବାସୀ ବିରୋଧୀ ମନୋଭାବ) ଭାବ ପ୍ରକାଶ ପାଇଛି ବୋଲି ମସ୍କ କହିଛନ୍ତି।

ଏହି ଆଲୋଚନା ସମୟରେ କାମାଥ ଆମେରିକାରେ ଥିବା ଭାରତୀୟ ପ୍ରତିଭା ଯଥା- ମାଇକ୍ରୋସଫ୍ଟର ସିଇଓ ସତ୍ୟ ନାଡେଲା ଏବଂ ଗୁଗୁଲ୍ ଅପରେସନର ନେତୃତ୍ୱ ନେଉଥିବା ସୁନ୍ଦର ପିଚାଇଙ୍କ ଭଳି ଦକ୍ଷ ଏବଂ ଯୋଗ୍ୟ ଭାରତୀୟମାନଙ୍କ କଥା କହିଥିଲେ। ଏମାନେ ବର୍ଷ ବର୍ଷ ଧରି ଯେଉଁମାନେ ବର୍ଷ ବର୍ଷ ଧରି ଆମେରିକାର ଆର୍ଥିକ ପ୍ରଗତିରେ ଅବଦାନ ରଖିଛନ୍ତି ବୋଲି କାମାଥ କହିଥିଲେ। ଏହାପରେ ମସ୍କ କହିଥିଲେ ଯେ "ମୁଁ ଭାବୁଛି ଆମେରିକା ଆସିଥିବା ପ୍ରତିଭାଶାଳୀ ଭାରତୀୟମାନଙ୍କ ଦ୍ୱାରା ଆମେରିକା ଅତ୍ୟନ୍ତ ଲାଭବାନ ହୋଇଛି।"

ଆମେରିକାର ଇମିଗ୍ରେସନ ଆଣ୍ଡ କଷ୍ଟମ୍ସ ଏନଫୋର୍ସମେଣ୍ଟ (ICE)ଛାତ୍ର ଏବଂ ବିନିମୟ ପରିଦର୍ଶକ କାର୍ଯ୍ୟକ୍ରମ (SEVP)ର ବାର୍ଷିକ ରିପୋର୍ଟ ଅନୁଯାୟୀ୨୦୨୪ମସିହାରେ ଆମେରିକାରେ ଥିବା ସମସ୍ତ ବିଦେଶୀ ଛାତ୍ରଙ୍କ ମଧ୍ୟରୁ ଭାରତୀୟ ଛାତ୍ରଙ୍କ ସଂଖ୍ୟା୨୭%ଥିଲା,ଯାହା ପୂର୍ବ ବର୍ଷ ତୁଳନାରେ୧୧.୮%ବୃଦ୍ଧି ପାଇଛି। ଏକଥାକୁ ଉଲ୍ଲେଖ କରି କାମାଥ କହିଥିଲେ ବର୍ତ୍ତମାନ ସ୍ଥିତିରେ ସାମାନ୍ୟ ସୁଧାର ଆସୁଛିବୋଲି କାମାଥକହିଥିଲେ।

ତେବେ ଆମେରିକାର ଦକ୍ଷ ଶ୍ରମିକଙ୍କ ଅଭାବ ହୃଦବୋଧ କରି ଡୋନାଲ୍ଡ ଟ୍ରମ୍ପ ଏଚ-୧ବିଭିସା କାର୍ଯ୍ୟକ୍ରମକୁ ସମର୍ଥନ କରିଥିଲେ। ତେବେ ଏହାର କିଛି ଦିନ ପରେ,ରିପବ୍ଲିକାନ କଂଗ୍ରେସଓମ୍ୟାନ୍ ମାର୍ଜୋରି ଟେଲର ଗ୍ରୀନ୍ କିନ୍ତୁ ଏହାକୁ ଧୀରେ ଧୀରେ ଶେଷ କରିବାକୁ ଏକ ବିଲ୍ ଆଣିବାକୁ ଘୋଷଣା କରିଥିଲେ।ସେ ଦାବି କରିଥିଲେ ଯେ ଏହି ଭିସା ନିୟମ ଆମେରିକୀୟ କର୍ମଚାରୀଙ୍କ ସ୍ଥାନରେ ବିଦେଶୀଙ୍କୁ ନିଯୁକ୍ତି ଦେବ।

ଏନେଇ ମସ୍କ କହିଥିଲେ “ବାଇଡେନ୍ ପ୍ରଶାସନ ଅଧୀନରେ, ଏହା ମୂଳତଃ ସମ୍ପୂର୍ଣ୍ଣ ମାଗଣା ଥିଲା, କୌଣସି ସୀମା ନିୟନ୍ତ୍ରଣ ନଥିଲା। ଯଦି ଆପଣଙ୍କ ପାଖରେ ସୀମା ନିୟନ୍ତ୍ରଣ ନାହିଁ, ତେବେ ଆପଣ ଏକ ଦେଶ ହୋଇପାରିବେ ନାହିଁ। ତେଣୁ, ବାଇଡେନ୍ ସମୟରେ ବିପୁଳ ପରିମାଣର ଅବୈଧ ପ୍ରବାସୀ ହୋଇଥିଲା। ଏହା ପ୍ରକୃତରେ କିଛିଟା ନକାରାତ୍ମକ ପ୍ରଭାବ ପକାଇଥିଲା।”

ପୂର୍ବରୁ ଟ୍ରମ୍ପ ପ୍ରଶାସନର ସରକାରୀ ଦକ୍ଷତା ବିଭାଗ (DOGE) ସମ୍ଭାଳୁଥିବା ମସ୍କ ଆହୁରି କହିଛନ୍ତି “ତେଣୁ ଯଦି ଅବୈଧ ଭାବରେ ଆମେରିକା ଆସିବା ଏବଂ ଏହି ସମସ୍ତ ସରକାରୀ ସୁବିଧା ପାଇବାର ଏକ ବିରାଟ ଆର୍ଥିକ ଲାଭ ପାଉଛନ୍ତି, ତେବେ ଆପଣ ଲୋକଙ୍କୁ ଆମେରିକା ଆସିବା ପାଇଁ ଏକ ପ୍ରଶସ୍ତ ବାଟ ସୃଷ୍ଟି କରୁଛନ୍ତି। ଏହା ଏକ ପ୍ରୋତ୍ସାହନମୂଳକ କାର୍ଯ୍ୟ। ଏହାର କୌଣସି ଅର୍ଥ ନଥିଲା। କାରଣ ଆପଣଙ୍କୁ ସୀମା ନିୟନ୍ତ୍ରଣ ରଖିବାକୁ ପଡିବ। ତାହା ନ କରିବା ନିହାତି ଅଜବ କଥା।”

ତେବେ ବାହାରୁ ଆସୁଥିବା ପ୍ରତିଭାମାନେ କିଭଳି ଆମେରିକାର ଲୋକଙ୍କର ଚାକିରି ନେଉଛନ୍ତି ଏ ଭାବନାକୁ ସେ ଏପର୍ଯ୍ୟନ୍ତ ଜାଣିପାରୁ ନାହାନ୍ତି ବୋଲି ମସ୍କ କହିଛନ୍ତି। ସେ କହିଛନ୍ତି “ମୋର ସିଧା କଥା ହେଲା ସବୁବେଳେ ପ୍ରତିଭାବାନ ଲୋକଙ୍କ ଅଭାବ ରହିଥାଏ। ଏହି କଷ୍ଟକର କାର୍ଯ୍ୟଗୁଡ଼ିକ କରିବା ପାଇଁ ଆପଣଙ୍କୁ ପ୍ରତିଭାବାନ ଲୋକଙ୍କର ଆବଶ୍ୟକତା ରହିଛି। କିଛି କମ୍ପାନୀ ଆମେରିକାବାସୀଙ୍କୁ ନିଯୁକ୍ତି ଦେବା ଅଧିକ ଖର୍ଚ୍ଚ ସହୁଛନ୍ତି,ସେହିଭଳି ଆଉ କିଛି ଖର୍ଚ୍ଚ ବଞ୍ଚାଇବା ପାଇଁ ବାହାର ଲୋକଙ୍କୁ ନିଯୁକ୍ତି ଦେଉଛନ୍ତି।”

ତେବେ ଏ ଦିଗରେ ମସ୍କଙ୍କ ଜଣେ ଶିଳ୍ପପତି ଭାବେ ତାଙ୍କ କମ୍ପାନୀ କ’ଣ କରୁଛି ବୋଲି ପ୍ରଶ୍ନ କରିବାରୁ ମସ୍କ କହିଛନ୍ତି ଯେ ତାଙ୍କ କମ୍ପାନୀ ଟେସଲା, ସ୍ପେଶ୍ ଏକ୍ସ ଓ ଏକ୍ସ ସୁବୁବେଳେ ପ୍ରତିଭାର ସନ୍ଧାନରେ ରହିଥାଏ। ଏବଂ ଏଥିପାଇଁ ସେ ଆଭେରଜ ଠାରୁ ଅଧିକ ପେମେଣ୍ଟ କରନ୍ତି। ତେଣୁ ସେ H-1B କାର୍ଯ୍ୟକ୍ରମର ଅପବ୍ୟବହାରକୁ ସମାଧାନ କରିବାର ଆବଶ୍ୟକତା ଉପରେ ଗୁରୁତ୍ୱ ଦେବା ସହିତ ଏହି କାର୍ଯ୍ୟକ୍ରମକୁ ବନ୍ଦ ନ କରି ଜାରି ରଖିବାକୁ ସମର୍ଥନ କରିଛନ୍ତି।

ମସ୍କ କହିଛନ୍ତି “ମୁଁ ଭାବୁଛି H-1B କାର୍ଯ୍ୟକ୍ରମର ଅପବ୍ୟବହାର ହୋଇଛି। ଏହା କହିବା ଠିକ୍ ହେବ ଯେ, କିଛି ଆଉଟସୋର୍ସିଂ କମ୍ପାନୀଗୁଡ଼ିକ H-1B ସହିତ ସିଷ୍ଟମକୁ ନେଇ ଗେମ ଖେଳିଛନ୍ତି। ଏବଂ ଆମକୁ ସେହି ଖେଳ ବନ୍ଦ କରିବାକୁ ପଡିବ। ତେବେ H-1B କାର୍ଯ୍ୟକ୍ରମକୁ ସମାପ୍ତ କରିବା ସପକ୍ଷରେ ମୁଁ ଆଦୌ ଏକମତ ନୁହେଁ।”

ଆମେରିକାରେ କାମ କରିବାକୁ ଆକାଂକ୍ଷୀ ଭାରତୀୟ ନାଗରିକଙ୍କ ପାଇଁ ତାଙ୍କର ବାର୍ତ୍ତା ମଧ୍ୟ ଦେଇଛନ୍ତି ମସ୍କ। ସେ କହିଛନ୍ତି, "ଯେଉଁ ବ୍ୟକ୍ତି ରୋଜଗାର ଠାରୁ ଅଧିକ ଯୋଗଦାନ ଦେଉଚନ୍ତି ତାଙ୍କ ପାଇଁ ମୋର ସମ୍ମାନ। ସମାଜରେ ଜଣେ ନିଟ୍ ଅବଦାନକାରୀ ହୁଅନ୍ତୁ। କେବଳ ଇନପୁଟ୍ ଅପେକ୍ଷା ଆଉଟପୁଟ୍ ଅଧିକ ମୂଲ୍ୟବାନ ହେବା ଉପରେ ଧ୍ୟାନ ଦିଅନ୍ତୁ"।

ଭିସା ନିୟମକୁ ନେଇ ଟ୍ରମ୍ପ ସରକାର କଡ଼ା କଟକଣା କରୁଥିବା ବେଳେ ନିକଟରେ ଟ୍ରମ୍ପଙ୍କ ସ୍ୱର ନରମୀ ଥିଲା। ସେ କହିଥିଲେ ଯେ ସେହି ଉଚ୍ଚ ଦକ୍ଷ ପ୍ରବାସୀମାନଙ୍କୁ ସ୍ୱାଗତ କରିବେ ଯେଉଁମାନେ ଆମେରିକୀୟମାନଙ୍କୁ ଚିପ୍ସ ଏବଂ କ୍ଷେପଣାସ୍ତ୍ର ଭଳି ଉନ୍ନତ ପ୍ରଯୁକ୍ତିବିଦ୍ୟା ନିର୍ମାଣ କରିବାରେ ସାହାଯ୍ୟ କରିପାରିବେ।