ନୂଆଦିଲ୍ଲୀ: ତିନିମାସର ଗର୍ଭବତୀ ସାମ୍ବାଦିକାଙ୍କୁ କଂଗ୍ରେସ ନେତା ରାହୁଲ ଗାନ୍ଧୀ ଠେଲାପେଲା କରିବା ଅଭିଯୋଗ ମାମଲା ସୁପ୍ରିମକୋର୍ଟରେ ପହଞ୍ଚିଛି । ସାମ୍ବାଦିକା ଅକ୍ଟୋବର ୧୨ ତାରିଖରେ ଘଟିଥିବା ଘଟଣା ବିଷୟରେ ଅଭିଯୋଗ କରି ସୁପ୍ରିମକୋର୍ଟରେ ଏକ ଆବେଦନ ଦାଖଲ କରିଛନ୍ତି । ଶୁକ୍ରବାର ସୁପ୍ରିମକୋର୍ଟ ସାମ୍ବାଦିକାଙ୍କ ଆବେଦନର ଶୁଣାଣି କରିବାକୁ ରାଜି ହୋଇଛନ୍ତି ।

ସୁପ୍ରିମକୋର୍ଟ କହିଛନ୍ତି ଯେ ମାମଲାର ଶୁଣାଣି ୨୬ କିମ୍ବା ୨୭ ତାରିଖରେ ହେବ । ବିରୋଧୀ ନେତାଙ୍କ ଏକ ଶୋଭାଯାତ୍ରା ସମୟରେ ସୁପ୍ରିମକୋର୍ଟ ପରିସରରେ ଭିଡ଼ ମଧ୍ୟରେ ସାମ୍ବାଦିକାଙ୍କୁ ଠେଲାପେଲା କରାଯାଇଥିଲା ବୋଲି ଅଭିଯୋଗ ହୋଇଛି । ସିଜେଆଇ ସୂର୍ଯ୍ୟକାନ୍ତ ଏବଂ ଜଷ୍ଟିସ ବାଗଚିଙ୍କୁ ନେଇ ଗଠିତ ଖଣ୍ଡପୀଠ ସମ୍ମୁଖରେ ବରିଷ୍ଠ ଓକିଲ ଗୌରବ ଭାଟିଆ ଏହି ଆବେଦନ ଉଲ୍ଲେଖ କରିଥିଲେ । ଲାଇଭ୍ ଲ’ ଅନୁଯାୟୀ, କୋର୍ଟ ପରିସରରେ ରାଜନୈତିକ ପ୍ରଦର୍ଶନ ବିରୋଧରେ ନିର୍ଦ୍ଦେଶନାମା ଦାବି କରିଓକିଲ ଦିଗନ୍ତ ମିଶ୍ରଙ୍କ ଦ୍ୱାରା ଦାଖଲ ଆବେଦନରେ ଏହି ଆବେଦନ ଦାଖଲ କରାଯାଇଛି ।

 

ଉଲ୍ଲେଖନୀୟ ଯେ ଅକ୍ଟୋବର ୧୨ ତାରିଖରେ ରାହୁଲ ଗାନ୍ଧୀଙ୍କ ନେତୃତ୍ୱରେ ଅନେକ ଇଣ୍ଡି ମେଣ୍ଟ ନେତା ଭୋଟର ତାଲିକାର ସ୍ପେଶାଲ୍ ଇଣ୍ଟେନ୍ସିଭ୍ ରିଭିଜନରେ ଅନିୟମିତତା ଅଭିଯୋଗରେ ସୁପ୍ରିମକୋର୍ଟ ଯାଇଥିଲେ । ବହୁ ସଂଖ୍ୟକ ରାଜନୈତିକ କର୍ମୀ ଏବଂ ଗଣମାଧ୍ୟମ କର୍ମଚାରୀ ଉପସ୍ଥିତ ଥିଲେ । ମହିଳା ସାମ୍ବାଦିକ ରିଚା ପରାଶର ଅଭିଯୋଗ କରିଛନ୍ତି ଯେ ସେ ସୁପ୍ରିମକୋର୍ଟ ସିଡ଼ିରେ ରାହୁଲ ଗାନ୍ଧୀଙ୍କୁ ଏକ ପ୍ରଶ୍ନ ପଚାରିବାକୁ ଚେଷ୍ଟା କରୁଥିବା ସମୟରେ ସେ ତାଙ୍କୁ ଠେଲି ଦେଇଥିଲେ । ରାହୁଲଙ୍କ ସୁରକ୍ଷାକର୍ମୀ ମଧ୍ୟ ତାଙ୍କ ସହ ଧସ୍ତାଧସ୍ତି କରିଥିବା ସାମ୍ୱାଦିକା ଅଭିଯୋଗ କରିଥିଲେ ।

ସାମ୍ବାଦିକା ଦାବି କରିଛନ୍ତି ଯେ ତାଙ୍କୁ ଧକ୍କା ଦିଆଯିବା ପରେ ସେ ସିଡ଼ିରୁ ତଳକୁ ଖସି ପଡ଼ିଥିଲେ । ପ୍ରବଳ ଭିଡ଼ ଯୋଗୁଁ ଅନେକ ଲୋକ ତାଙ୍କ ଉପରେ ପଡ଼ି ଆହତ ହୋଇଥିଲେ । ସାମ୍ବାଦିକା କହିଛନ୍ତି ଯେ ଘଟଣା ସମୟରେ ସେ ତିନିମାସର ଗର୍ଭବତୀ ଥିଲେ ।

ସେପଟେ କଂଗ୍ରେସ ଦଳ ଏହି ମାମଲାରେ ରାହୁଲ ଗାନ୍ଧୀଙ୍କ ବିରୋଧରେ ଆସିଥିବା ଅଭିଯୋଗକୁ ପ୍ରତ୍ୟାଖ୍ୟାନ କରିଛି । ଦଳରୁ ଏହାକୁ ବିଜେପିର ରାଜନୈତିକ ପ୍ରଚାର ବୋଲି କହିଛି । ଶାସକ ବିଜେପି ଏହି ଘଟଣା ପାଇଁ ରାହୁଲ ଗାନ୍ଧୀଙ୍କୁ ସମାଲୋଚନା କରିଛି ।