ଭୁବନେଶ୍ବର ୧୭।୮: ବଲାଙ୍ଗିର ଅପହରଣ ମାମଲାରେ ଆସିଛି ଟ୍ବିଷ୍ଟ । ଅପହରଣ ମାମଲାରେ ସମ୍ପୃକ୍ତ ଅଛନ୍ତି ମହିଳା ପୋଲିସ ସବ୍ ଇନ୍ସପେକ୍ଟର । ମହିଳା ପୋଲିସ ହିଁ ଘଟଣାର ମାଷ୍ଟରମାଇଣ୍ଡ ବୋଲି ସୂଚନା ମିଳିଛି । ମହିଳା ପୋଲିସ ଅଧିକାରୀ ଜଣକ ହେଉଛନ୍ତି କମିଶନରେଟ୍ ପୋଲିସର ହେଡକ୍ବାର୍ଟରରେ କାର୍ଯ୍ୟରତ ସବ ଇନ୍ସପେକ୍ଟର ସ୍ନେହା ମଞ୍ଜରୀ ସାହୁ । ଯାହାଙ୍କୁ ପୋଲିସ ଗିରଫ କରିଛି । ତାଙ୍କ ସହ ଜଣେ ସାମ୍ବାଦିକଙ୍କୁ ମଧ୍ୟ ପୋଲିସ ଗିରଫ କରିଛି । ସାମ୍ବାଦିକଙ୍କର ଏହି ମାମଲାରେ ସମ୍ପୃକ୍ତି ରହିଛି । ସେ ନିଜକୁ ପୋଲିସ ଅଫିସର ଦର୍ଶାଇ ଅପହରଣକାରୀଙ୍କ ଠାରୁ ଦସ୍ତଖତ ନେବା ସହ ବୟାନ ରେକର୍ଡ କରିଥିଲେ । ତେବେ ଗିରଫ ପୋଲିସ ମ୍ୟାଡମ୍‌ଙ୍କ ନାମରେ ପୂର୍ବରୁ ମଧ୍ୟ ରହିଛି ଅଭିଯୋଗ ।

ବଲାଙ୍ଗିରର ବହୁଚର୍ଚ୍ଚିତ ନରେନ୍ଦ୍ର ସାହୁ ଅପହରଣ ମାମଲାରେ ଆଉ ଦୁଇ ଗିରଫ । ଗିରଫଙ୍କ ଭିତରେ ଅଛନ୍ତି ସବ୍ ଇନ୍ସପେକ୍ଟର ସ୍ନେହା ମଞ୍ଜରୀ ଓ ସାମ୍ବାଦିକ ସଞ୍ଜୟ ଜେନା । ଯାହା ସୂଚନା ମିଳିଛି ପୂର୍ବରୁ ଗିରଫ ହୋଇେଥିବା କ୍ଷୀତିଶ ସାହୁଙ୍କର ଭଉଣୀ ହେଉଛନ୍ତି ପୋଲିସ ସବ୍ ଇନ୍ସସ୍ପେକ୍ଟର ସ୍ନେହା ମଞ୍ଜରୀ । ଭାଇ-ଭଉଣୀ କିଡନାପ୍ରେ ସାମିଲ ଥିବା ନେଇ ହୋଇଛି ସ୍ପଷ୍ଟ ।

ରବିବାର ରାତିରେ ବଲାଙ୍ଗିର ପୋଲିସ ବଲାଙ୍ଗିର-ସୋନପୁର ରୋଡ୍ରୁ ସ୍ନେହା ମଞ୍ଜରୀଙ୍କୁ ଉଠାଇ ନେଇଥିଲା । ରାତି ତମାମ ତାଙ୍କୁ ଅଟକ ରଖାଯାଇ ବଲାଙ୍ଗିର ରିଜର୍ଭ ପୋଲିସ ବାରାକରେ ଜେରା କରାଯାଇଥିଲା । ଜେରା ପରେ ପୋଲିସ ସ୍ପଷ୍ଟ କରିଛି ଯେ, ସ୍ନେହା ମଞ୍ଜରୀଙ୍କର ଏହି ଅପହରଣ ମାମଲାରେ ସମ୍ପୃକ୍ତି ରହିଛି । ଅନ୍ୟତମ ଅଭିଯୁକ୍ତ ସାମ୍ବାଦିକ ସଞ୍ଜୟ ଜେନାଙ୍କର ସମ୍ପୃକ୍ତ ଥିବା ନେଇ ସ୍ପଷ୍ଟ ହୋଇଛି ।

ଯେତେବେଳେ ଗୁଣ୍ଡା ସାହୁଙ୍କୁ ଅପହରଣ କରି ନିଆଯାଉଥିଲା ସେତେବେଳେ ତାଙ୍କ ହାତରେ ଏକ ବନ୍ଧୁକ ରଖାଯାଇ ନାଟକ କରାଯାଇଥିଲା । କ୍ଷୀତିଶଙ୍କ ଆଡକୁ ବନ୍ଧୁକ ଦେଖାଯାଇ ସେ ଯେମିତି ତାଙ୍କୁ ମାରିବାକୁ ଚେଷ୍ଟା କରୁଛନ୍ତି, ସେଭଳି ଏକ ଭିଡିଓ ପ୍ରସ୍ତୁତ କରାଯାଇଥିଲା । ଯେଉଁ ଭିଡିଓ ଏବେ ପୋଲିସ ହାତରେ । ଖାଲି ସେତିକି ନୁହେଁ, ଅଗଷ୍ଟ ୧୫ ତାରିଖରେ ଖଣ୍ଡଗିରି ଥାନାରେ ନରେନ୍ଦ୍ର ସାହୁଙ୍କ ନାମରେ ଓଲଟା ଏଫଆଇଆର ଦିଆଯାଇଥିଲା । ସେତେବେଳେ ଉପସ୍ଥିତ ଥିଲେ ସଞ୍ଜୟ ଜେନା । ସେଠି ଏଗ୍ରିମେଣ୍ଟ ହୋଇଥିଲା । ଏଗ୍ରିମେଣ୍ଟରେ ଏଭଳି ଲେଖାହୋଇଥିଲା ଯେ, ସତେ ଯେମିତି ଗୁଣ୍ଡା ସାହୁ ତାଙ୍କ ପାଖରୁ ଟଙ୍କା ନେଇଥିଲେ, ସେହି ଟଙ୍କାକୁ ଦେବାକୁ ରାଜି ହୋଇଯାଇଥିଲେ । ଯାହାକୁ ପୋଲିସ ଏବେ ଜବତ କରିଛି । ସେହି ଆଧାରରେ ବଲାଙ୍ଗିର ପୋଲିସ ତାଙ୍କୁ ଗିରଫ କରିଛି ।

Also Read:- ରକ୍ଷାବନ୍ଧନରେ ମହିଳାଙ୍କୁ ସୁଭଦ୍ରା ଭେଟି, କୋଟିଏରୁ ଅଧିକଙ୍କୁ ମିଳିବ କିସ୍ତି ଟଙ୍କା

ଏନେଇ ଏସପି ଆହୁରି କହିଛନ୍ତି ଯେ, ପୁରା ପ୍ଲାନିଂ ଅନୁସାରେ ତାଙ୍କୁ ଖଣ୍ଡଗିରି ଥାନାକୁ ନିଆଯାଇଥିଲା । ଯେଉଁଠି ସାମ୍ବାଦିକ ପୂର୍ବରୁ ଛିଡା ହୋଇଥିଲେ । ସେ ନରେନ୍ଦ୍ରକୁ ପୋଲିସ ଅଫିସରର ପରିଚୟ ଦେଇଥିଲେ । ଥାନା ଭିତରେ ତାଙ୍କ ସହ ବୁଝାମଣା ପତ୍ର ହୋଇଥିଲା । ସଞ୍ଜୟ ନିଜେ ଏକ ଜାଲ ଏଫଆଇଆର ଲେଖିଥିଲେ । ପୋଲିସର ଇମେଜକୁ ବ୍ୟବହାର କରି ସେ ନରେନ୍ଦ୍ର ନାମରେ ମିଛ ଅଭିଯୋଗ କରିବା ସହ ତାଙ୍କୁ ମିସ୍ ଗାଇଡ୍ କରିଥିଲେ । ଫୋନ୍ ଟ୍ରାକ, ଓ୍ବାଟ୍ସଆପ୍ ଚାଟ୍ ଚେକ୍ କରାଯାଇ କ୍ଷୀତିଶ, ସ୍ନେହା ମଞ୍ଜରୀ ଏବଂ ସଞ୍ଜୟଙ୍କୁ ଗିରଫ କରାଯାଇଛି ।

ଅନ୍ୟପଟେ ସ୍ନେହା ମଞ୍ଜରୀଙ୍କ ନାମରେ ପୂର୍ବରୁ ମଧ୍ୟ ବାଲିଅନ୍ତା ରହିଛି ଅଭିଯୋଗ । ନୟାପଲ୍ଲୀ ଥାନାରେ ଜନୈକ ସୁବେଦାରଙ୍କ ପତ୍ନୀ ତାଙ୍କ ନାମରେ କରିଥିଲେ ଏଫଆଇଆର । ଯେଉଁଥିରେ ଉଲ୍ଲେଖ କରିଥିଲେ ଯେ, ତାଙ୍କ ସ୍ବାମୀଙ୍କୁ ସ୍ନେହା ମଞ୍ଜରୀ ଫସାଇଛନ୍ତି । ପରବର୍ତ୍ତୀ ସମୟରେ ବାଲିଅନ୍ତା ଥାନାରେ ତାଙ୍କ ବିରୋଧରେ ମାମଲା ରୁଜୁ ହୋଇଥିଲା ।

ନଜର ପକାନ୍ତୁ ସମ୍ପୂର୍ଣ୍ଣ ଘଟଣା ଉପରେ...

ଅଗଷ୍ଟ ୧୪ ତାରିଖ ଦିନବେଳା ଫୋନ୍ ଆସିଲା ନରେନ୍ଦ୍ର ସାହୁଙ୍କୁ । ଫୋନ୍ କରି ଡାକିଥିଲେ ଗିରଫ ହୋଇଥିବା ସହଯୋଗୀ ଅଭିଯୁକ୍ତ ବଲାଙ୍ଗିର ସହର ତୁଳସୀ ନଗର ପଡାର ସଞ୍ଜିତ କୁମାର ସାହୁ । ଜାତୀୟ ରାଜପଥ ରଣ୍ଡା ଛକ ନିକଟରେ ଥିବା ଜମିକୁ ଜଣେ ଗ୍ରାହକଙ୍କୁ ଦେଖାଇବା ବୋଲି କହି ଗୁଣ୍ଡାଙ୍କୁ ଡାକିଥିଲା ସଞ୍ଜିତ । ଗୁଣ୍ଡା ନିଜ ଗାଡ଼ିରେ ଏକା ବାହାରି ଯାଇଥିଲେ । ସେଠାରେ ପହଞ୍ଚିବା ପରେ ଏକା ଦେଖି ଗୁଣ୍ଡାଙ୍କୁ ଜୋରଜବରଦସ୍ତ ୬ରୁ ଅଧିକ ଲୋକ ଘେରି ଯାଇ ଆଉ ଏକ ଗାଡି ଯାହାକି ଅଭିଯୁକ୍ତ କ୍ଷୀତିଶଙ୍କର ସେଥିରେ ଗୁଣ୍ଡା ସାହୁଙ୍କୁ ବସାଇଥିଲେ । ଭିତରେ ମାଡ଼ ମାରି ବନ୍ଧୁକ ମୁନରେ ଗାଡି ନେଇ ଫେରାର ମାରିଥିଲେ । ଏହି ସମୟରେ ଗୁଣ୍ଡାଙ୍କ ଗାଡିକୁ ଆଉ ଜଣେ ସହଯୋଗୀ ନେଇ ପଛେ ପଛେ ଯାଇଥିଲେ ।

ସେହିଦିନ ସନ୍ଧ୍ୟା ପର୍ଯ୍ୟନ୍ତ ଗୁଣ୍ଡା ସାହୁଙ୍କ ପତ୍ତା ନମିଳିବାରୁ ତାଙ୍କୁ ନିଖୋଜ ଥିବା ନେଇ ଟାଉନ ଥାନାରେ ଅଭିଯୋଗ କଲେ ପରିବାର ଲୋକ । ଅଭିଯୋଗକୁ ଅଧାର କରି ପୋଲିସ ଯାଞ୍ଚ ଆରମ୍ଭ କଲା । ଗାଡି ନମ୍ବର ଠାରୁ ସିସିଟିଭି ଯାଞ୍ଚ କଲା । ବଲାଙ୍ଗିର ସୋନପୁର ଟୋଲଗେଟ୍ ସିସିଟିଭିରୁ ସମ୍ପୂର୍ଣ୍ଣ ଚିତ୍ର ଆସିଥିଲା ସାମ୍ନାକୁ । କେହି ତାଙ୍କୁ ଅପହରଣ କରିଥିବା ନେଇ ଜଣାପଡିଲା । ଏନେଇ ଟିମ୍ ଗଠନ କରି ତୁରନ୍ତ ସେହି ଦିଗରେ ଗୋଡ଼ାଇଥିଲା ପୋଲିସ ।

ଅଗଷ୍ଟ ୧୫ ତାରିଖ ସକାଳୁ ତାଙ୍କ ଅପହରଣ ନେଇ ଖବର ସବୁଠି ପ୍ରଚାର ହୋଇ ଯାଇଥିଲା । ଏନେଇ ପୋଲିସ ଗୁଣ୍ଡାଙ୍କ ଫୋନ୍ ଟ୍ରାକ୍ କରିବାରୁ ତାଙ୍କ ଲୋକେଶନ ଭୁବନେଶ୍ୱର ଖଣ୍ଡଗିରି ଥାନା ନିକଟ ହୋଟେଲ ସନ ରାଇଜ ବୋଲି ଦେଖାଇଥିଲା । ସେଠି ପହଞ୍ଚିବା ବେଳକୁ କେହି ନଥିଲେ ।

ଏହାପରେ ଆରମ୍ଭ ହୋଇଥିଲା ମୁଖ୍ୟ କାହାଣୀ । ମାଷ୍ଟର ମାଇଣ୍ଡ କ୍ଷୀତିଶର ପୋଲିସ ଭଉଣୀ କରିଥିଲା ମାଷ୍ଟର ପ୍ଲାନ୍ । ତା ସହ ଥିବା ସାମ୍ବାଦିକକୁ ପୋଲିସ ସଜାଇ ଗୁଣ୍ଡାଙ୍କୁ ବନ୍ଧୁକ ଧରାଇ ଭିଡିଓ କରିଥିଲା ପୋଲିସ ଭଉଣୀ । ପ୍ରଚୁର ମାଡ଼ ମାରିଥିଲେ ଗୁଣ୍ଡା ସାହୁଙ୍କୁ । ଫଳରେ ଗୁଣ୍ଡାଙ୍କ ଦେହରେ ୨୨ଟି ସ୍ଥାନରେ ତାଙ୍କ ଦେହରେ ଆଘାତ ଲାଗିଥିବା ମେଡିକାଲ ରିପୋର୍ଟରୁ ଜଣାପଡ଼ିଛି । ଭିଡିଓ କଲାବେଳେ ଗୁଣ୍ଡାଙ୍କୁ କହିଥିଲେ ଯେ ଟଙ୍କା ଦେଇ ଦିଅ ମୁଁ ଛାଡି ଦେବି.. କାହାକୁ.. କ୍ଷୀତିଶ ସାହୁକୁ । ଓ ଗୁଣ୍ଡା ସାହୁ କ୍ଷୀତିଶକୁ ଟଙ୍କା ପାଇଁ ଅପହରଣ କରିଥିବା ଭଳି ଯୋଜନା କରିଥିଲେ ପୋଲିସ ଭଉଣୀ । ଭିଡିଓ ତିଆରି ପରେ ଖଣ୍ଡଗିରି ଥାନାକୁ ଯାଇ ସେହି ସମୟ ବାଛିଥିଲେ ଯେଉଁ ସମୟରେ ଥାନାରେ ବରିଷ୍ଠ ଅଧିକାରୀ ନଥିବେ ।

ସ୍ୱାଧୀନତା ଦିବସ ସବୁ ଷ୍ଟାଫ୍ ବ୍ୟସ୍ତ । ସେହି ସମୟରେ ଜଣେ ଦୁଇ ଜଣ ଥାନାରେ ଥିବାବେଳେ ଗୁଣ୍ଡା ସାହୁଙ୍କୁ ଥାନାକୁ ନେଇକି ଯାଇଥିଲେ । ପ୍ରଥମେ ସାମ୍ବାଦିକ ସେଠି ତିଆରି କରିଥିବା ଭିଡିଓ ଫଟୋକୁ ଦେଖାଇଥିଲେ ପୋଲିସ ଏସଆଇ ସ୍ନେହା ମଞ୍ଜରୀଙ୍କୁ । ଯାହାକି ଥିଲା ପ୍ଲାନିଂ । ଥାନାରେ ଥିବା ସ୍ନେହା ମଞ୍ଜରୀ ଅନ୍ୟ ଷ୍ଟାଫ୍ଙ୍କ ମଧ୍ୟରେ ଥିବା ସାମ୍ୱାଦିକ ଆଲୋକ ଜେନା ସବୁ କଥା କହି କ୍ଷୀତିଶ ସହ ଗୁଣ୍ଡା ସାହୁଙ୍କ ନାମରେ ଅଭିଯୋଗ କରିବେ । ହେଲେ ମାତ୍ର ୧୦ ମିନିଟ୍ ଭିତରେ ବଲାଙ୍ଗିର ପୋଲିସ ଖଣ୍ଡଗିରି ଥାନାରେ ପହଞ୍ଚି ସବୁ ଯୋଜନାକୁ ପଣ୍ଡ କରିଦେଇଥିଲା । ଏହା ଦେଖି ସାମ୍ବାଦିକ ଓ ପୋଲିସ ଏସଆଇ ନିଜକୁ ବଞ୍ଚାଇ ଖସି ଯାଇଥିଲେ । ହେଲେ ଗୁଣ୍ଡା ସାହୁଙ୍କୁ ଉଦ୍ଧାର କରି କ୍ଷୀତିଶକୁ ଗିରଫ କରିଥିଲା ପୋଲିସ ।

ପରେ ଏନେଇ ହନୁମାନ ଟଙ୍କା ପାଇଁ ୨.୭ କୋଟି ଟଙ୍କା କ୍ଷୀତିଶ ଗୁଣ୍ଡାକୁ ଦେଇଥିବା କହିଥିଲା । ତାହାର ସମସ୍ତ କାଗଜପତ୍ର ଯାଞ୍ଚ ପରେ ତାହା ମିଛ ବୋଲି ଜାଣି ବଲାଙ୍ଗିର ସହଯୋଗୀ ଓ କ୍ଷୀତିଶକୁ ଗିରଫ କରିଥିଲା ପୋଲିସ । ହେଲେ କ୍ଷୀତିଶ ନିର୍ଦ୍ଦୋଷ ଥିବା କହି ତାଙ୍କ ଭଉଣୀ ବଲାଙ୍ଗି ଆସି ସେହିସବୁ ଭିଡିଓ ଫଟୋକୁ ବ୍ୟବହାର କରି ଏସପିଙ୍କ ନିକଟରେ ଅଭିଯୋଗ କରିବାକୁ ଆସିବା ବେଳେ କାବୁ କରିଥିଲା ବଲାଙ୍ଗିର ପୋଲିସ । ଏବେ ସବୁ ଘଟଣା ସାମ୍ନାକୁ ଆସିବା ପରେ ଏଥିରେ କ୍ଷୀତିଶ ମାଷ୍ଟର ମାଇଣ୍ଡ ହୋଇଥିବା ବେଳେ ମାଷ୍ଟର ପ୍ଲାନ କରିଥିଲା ପୋଲିସ ଭଉଣୀ ସ୍ନେହା ମଞ୍ଜରୀ । ତା ସହ ସାମିଲ ସାମ୍ବାଦିକ ସଞ୍ଜୟ ଜେନା । ଏହି ଘଟଣାରେ ବର୍ତ୍ତମାନ ୪ ଜଣଙ୍କୁ କୋର୍ଟ ଚାଲାଣ କରିଛି ପୋଲିସ । ଆହୁରି ୬ ଜଣ ଏଥିରେ ସଂପୃକ୍ତ ଥିବା କହିଛନ୍ତି ବଲାଙ୍ଗିର ଏସପି । ଯାହାର ତଦନ୍ତ ଚାଲିଥିବା ମଧ୍ୟ କହିଛନ୍ତି । ଏନେଇ ପଚରା ଉଚରା ସମୟରେ ଗୁଣ୍ଡା ସାହୁ କ୍ଷୀତିଶକୁ ଜାଣି ନଥିବା କହିଥିବା ବେଳେ ପୋଲିସ ସନ୍ଦେହ ବଢିଥିଲା ଓ ତଦନ୍ତ କରିଥିବା ଏସପି କହିଛନ୍ତି ।

Watch Video: