ନୂଆଦିଲ୍ଲୀ: NEET-UG ପ୍ରଶ୍ନପତ୍ର ଲିକ୍ ମାମଲାରେ ଗୋଟିଏ ପରେ ଗୋଟିଏ ଚାଞ୍ଚଲ୍ୟକର ତଥ୍ୟ ସାମନାକୁ ଆସୁଛି । ଦଶନ୍ଧି ଯାଏଁ 'ଅକ୍ସଫୋର୍ଡ ଅଫ୍ ଦି ଇଷ୍ଟ' ନାଁରେ ପରିଚିତ ଥିବା ପୁଣେ ଏବେ ଦେଶର ସବୁଠାରୁ ବଡ଼ ପରୀକ୍ଷା ବିବାଦର କେନ୍ଦ୍ରରେ ରହିଛି । ସିବିଆଇ ଦ୍ୱାରା ତଦନ୍ତ ଯେତେ ଆଗକୁ ବଢୁଛି ସେତେ ଗଭୀର ରହସ୍ୟ ପଦାକୁ ଆସୁଛି । ଏହି ମାମଲାରେ ପୁଣେ ସହର କେବଳ ଏକ ତଦନ୍ତର ସହରରେ ସୀମିତ ନାହିଁ ବରଂ ଏହା ରାକେଟର ପରିଚାଳନାର ହବ୍ ବୋଲି ଅନୁମାନ କରାଯାଉଛି । ତଦନ୍ତରରେ ବର୍ତ୍ତମାନ ସୁଦ୍ଧା ପେପର୍ ପ୍ରସ୍ତୁତ ପ୍ରକ୍ରିୟାରେ ପ୍ରଫେସରଙ୍କ ସମ୍ପୃକ୍ତି, ମଧ୍ୟସ୍ଥି, କୋଚିଂ ସେଣ୍ଟର କନେକସନ୍ ଏବଂ ଲକ୍ଷାଧିକ ଟଙ୍କା ଦେଇ ପ୍ରଶ୍ନପତ୍ର ନେଇଥିବା ଛାତ୍ରଙ୍କ ନେଟୱାର୍କ କଥା ଜଣାପଡ଼ିଛି ।

ଅବସରପ୍ରାପ୍ତ ପ୍ରଫେସର ପେପର ଲିକର ମାଷ୍ଟରମାଇଣ୍ଡ

ଏହି ମାମଲାରେ ସିବିଆଇ ପୁଣେର ଜଣେ ଅବସରପ୍ରାପ୍ତ କେମିଷ୍ଟ୍ରି ପ୍ରଫେସର ପି.ଭି. କୁଲକର୍ଣ୍ଣିଙ୍କୁ ଗିରଫ କରିଛି । ସେ ଏହି ରାକେଟର ମୁଖ୍ୟ ସୂତ୍ରଧର ବୋଲି ଜଣାପଡ଼ିଛି । ମୂଳତଃ ଲାତୁରର ବାସିନ୍ଦା କୁଲକର୍ଣ୍ଣି ଦୀର୍ଘ ବର୍ଷ ଧରି NEETର ପ୍ରଶ୍ନପତ୍ର ପ୍ରସ୍ତୁତ କରୁଥିବା NTAର ବିଶେଷଜ୍ଞ ପ୍ୟାନେଲରେ ସଦସ୍ୟ ଥିଲେ । ଏହି କାରଣରୁ ସେ ପ୍ରଶ୍ନପତ୍ରଗୁଡ଼ିକୁ ମେ ୩ରେ ପରୀକ୍ଷା ପୂର୍ବରୁ ସହଜରେ ପାଇପାରିଥିଲେ । ଲାତୁର ଦୟାନନ୍ଦ କଲେଜରେ ତିନି ଦଶନ୍ଧି ଧରି ପାଠ ପଢାଇଥିବା ପ୍ରଫେସର କୁଲକର୍ଣ୍ଣି ଅବସର ପରେ ବି ନିଟ୍ ଇକୋସିଷ୍ଟମ ସହ ଯୋଗାଯୋଗରେ ରହିଥିଲେ । ଲାତୁର ସ୍ଥିତ ନିଜ ବାସଭବନରୁ ସେ ପୁଣେ ଏବଂ ଲାତୁରର ଛାତ୍ରଛାତ୍ରୀଙ୍କୁ ଗାଇଡ୍ କରୁଥିଲେ ।

ବୋଟାନି ପ୍ରଫେସର ମନୀଷା ମାନ୍ଧାରେ ଗିରଫ

କେବଳ କେମେଷ୍ଟ୍ରି ନୁହେଁ, ବାୟୋଲୋଜି ପେପର ଲିକ୍ କରିବାରେ ପୁଣେର ଜଣେ ବୋଟାନି ପ୍ରଫେସର ମନୀଷା ଗୁରୁନାଥ ମାନ୍ଧାରେଙ୍କର ମଧ୍ୟ ପ୍ରମୁଖ ଭୂମିକା ଥିଲା । ସିବିଆଇ ଅନୁଯାୟୀ, ମାନ୍ଧାରେଙ୍କୁ NTA ଜଣେ ବିଶେଷଜ୍ଞ ଭାବରେ ନିଯୁକ୍ତ କରିଥିଲା । ତାଙ୍କ ପାଖରେ ଉଦ୍ଭିଦ ବିଜ୍ଞାନ ଏବଂ ପ୍ରାଣୀ ବିଜ୍ଞାନ ପ୍ରଶ୍ନପତ୍ର ପହଞ୍ଚିବା ଅଭିଯୋଗ ହୋଇଥିଲା । ତଦନ୍ତକାରୀମାନେ ଦାବି କରିଛନ୍ତି ଯେ ସେ ଏପ୍ରିଲ ମାସରେ ତାଙ୍କ ପୁଣେ ବାସଭବନରେ ସ୍ପେଶାଲ ପ୍ରାକ୍ଟିସ ସେସନ୍ କରିଥିଲେ, ଯେଉଁଠାରେ ଛାତ୍ରମାନଙ୍କୁ ପ୍ରକୃତ ପରୀକ୍ଷାରେ ପରେ ଆସିଥିବା ପ୍ରଶ୍ନ ଏବଂ ଉତ୍ତର ଲେଖିବାକୁ କୁହାଯାଇଥିଲା ।

ତଦନ୍ତ ଅନୁଯାୟୀ, ମେ ୩ ତାରିଖରେ ହେବାକୁ ଥିବା ପରୀକ୍ଷା ପୂର୍ବରୁ ଅର୍ଥାତ୍ ଏପ୍ରିଲ ଶେଷ ସପ୍ତାହରେ ପ୍ରଫେସର କୁଲକର୍ଣ୍ଣି ଓ ମାନ୍ଧାରେ ନିଜ ପୁଣେ ବାସଭବନରେ ନିର୍ଦ୍ଦିଷ୍ଟ ଛାତ୍ରଛାତ୍ରୀଙ୍କୁ ନେଇ ସିକ୍ରେଟ୍ କୋଚିଂ କ୍ଲାସ କରିଥିଲେ । ଏହି କ୍ଲାସଗୁଡ଼ିକରେ ସେମାନେ ନିଟ୍ ପରୀକ୍ଷାରେ ଆସିବାକୁ ଥିବା କେମେଷ୍ଟ୍ରି ଏବଂ ବାୟୋଲୋଜିର ପ୍ରଶ୍ନ, ତା'ର ବିକଳ୍ପ ଏବଂ ସଠିକ୍ ଉତ୍ତରଗୁଡ଼ିକୁ ଛାତ୍ରଛାତ୍ରୀଙ୍କୁ ଡାକି ଡାକି ଲେଖାଉଥିଲେ । ଛାତ୍ରଛାତ୍ରୀମାନେ ନିଜ ନୋଟବୁକରେ ଯେଉଁ ସବୁ ପ୍ରଶ୍ନ ହାତରେ ଲେଖିଥିଲେ, ତାହା ପରବର୍ତ୍ତୀ ସମୟରେ ଅସଲ ପରୀକ୍ଷା ପେପର ସହିତ ସମ୍ପୂର୍ଣ୍ଣ ରୂପେ ମେଳ ଖାଇଥିଲା ।

କ୍ଲାଏଣ୍ଟ ଯୋଗାଉଥିଲେ ବିୟୁଟିସିଆନ

ଏହି ସାରା ରାକେଟରେ ଟଙ୍କା କାରବାର ଏବଂ ଛାତ୍ରଛାତ୍ରୀଙ୍କୁ ଖୋଜିବା ପାଇଁ ୪୬ ବର୍ଷୀୟ ମନୀଷା ୱାଘମାରେ ନାମକ ଜଣେ ମହିଳାଙ୍କୁ ବ୍ୟବହାର କରାଯାଉଥିଲା । ମନୀଷା ପୁଣେରେ ଏକ ବିୟୁଟି ପାର୍ଲର ଚଲାନ୍ତି । ମନୀଷା ଏବଂ ଅହିଲ୍ୟାନଗରର ଧନଞ୍ଜୟ ଲୋଖଣ୍ଡେ ମିଶି ଅଭିଭାବକ ଓ ପରୀକ୍ଷାର୍ଥୀମାନଙ୍କ ସହ ଯୋଗାଯୋଗ କରୁଥିଲେ । ତଦନ୍ତକାରୀମାନେ ଦାବି କରିଛନ୍ତି ଯେ ୱାଘମାରେ ଅହଲ୍ୟାନଗରର ଅଭିଯୁକ୍ତ ଧନଞ୍ଜୟ ଲୋଖଣ୍ଡେଙ୍କୁ ସାମଗ୍ରୀ ଦେଇଥିଲେ, ଯିଏ ପରେ ନାସିକର ଶୁଭମ ଖୈରନାରଙ୍କ ସହ ସେୟାର କରିଥିଲେ । ସେଠାରୁ, ପ୍ରଶ୍ନଗୁଡ଼ିକ ପିଡିଏଫ୍ ଫାଇଲ୍ ଏବଂ ମେସେଜିଂ ପ୍ଲାଟଫର୍ମ ମାଧ୍ୟମରେ ପଠାଯାଇଥିବା ଅଭିଯୋଗ ହୋଇଛି ।

ତଦନ୍ତ ଅନୁଯାୟୀ, ପରୀକ୍ଷାର ସପ୍ତାହ ପୂର୍ବରୁ କୋଚିଂ ଏବଂ ଟ୍ୟୁସନ୍ ନେଟୱାର୍କ ମାଧ୍ୟମରେ ଛାତ୍ରଛାତ୍ରୀମାନଙ୍କ ସହିତ ଯୋଗାଯୋଗ କରାଯାଇଥିଲା । ପରେ ପ୍ରାର୍ଥୀମାନଙ୍କୁ ପୁଣେ ଏବଂ ନିକଟସ୍ଥ ସ୍ଥାନଗୁଡ଼ିକରେ "ବିଶେଷ କୋଚିଂ ସେସନ୍" ଦିଆଯାଇଥିଲା । ସେଠାରେ, ପ୍ରଫେସରମାନେ ପ୍ରଶ୍ନ, ଉତ୍ତର ଏବଂ ସମ୍ଭାବ୍ୟ ବିଷୟଗୁଡ଼ିକ ଲେଖିଥିବା ବେଳେ ଛାତ୍ରମାନେ ସେଗୁଡ଼ିକୁ ନୋଟବୁକରେ କପି କରୁଥିଲେ । ଏଥିପାଇଁ କିଛି ପ୍ରାର୍ଥୀ ୧୦ ଲକ୍ଷରୁ ୨୫ ଲକ୍ଷ ଟଙ୍କା ପର୍ଯ୍ୟନ୍ତ ଦେଇଥିବା ଅଭିଯୋଗ ହୋଇଛି ।

କେମେଷ୍ଟ୍ରି ଶିକ୍ଷକଙ୍କ ମୋବାଇଲରୁ ମିଳିଲା ଲିକ୍ ପେପର

NEET-UG ପ୍ରଶ୍ନପତ୍ର ଲିକ୍ ମାମଲାର ତଦନ୍ତ କରୁଥିବା କେନ୍ଦ୍ରୀୟ ତଦନ୍ତ ବ୍ୟୁରୋ ଏକ ବଡ଼ ସଫଳତା ପାଇଛି। ମହାରାଷ୍ଟ୍ରର ଲାତୁରରେ ଜଣେ ଲୋକପ୍ରିୟ ୟୁଟ୍ୟୁବ୍ ଚ୍ୟାନେଲ୍ ଚଳାଉଥିବା ଜଣାଶୁଣା କେମିଷ୍ଟ୍ରି ଶିକ୍ଷକଙ୍କ ମୋବାଇଲ୍ ଫୋନରୁ ଲିକ୍ ହୋଇଥିବା ପ୍ରଶ୍ନପତ୍ର ମିଳିଛି । ଏଜେନ୍ସି ଦ୍ୱାରା ଦାଖଲ କରାଯାଇଥିବା କୋର୍ଟ ଡକ୍ୟୁମେଣ୍ଟ ଅନୁଯାୟୀ, ଅଭିଯୁକ୍ତ ଶିବରାଜ ରଘୁନାଥ ମୋଟେଗାଓଁକର ଲାତୁରରେ ରେଣୁକାଇ କେମିଷ୍ଟ୍ରି କ୍ଲାସେସ୍ ଚଲାନ୍ତି । ୧.୬୮ ଲକ୍ଷ ସବସ୍କ୍ରାଇବର୍ ସହିତ ଏକ ୟୁଟ୍ୟୁବ୍ ଚ୍ୟାନେଲ୍, ମୋଟେଗାଓଁକର ସାର୍'ସ ଆରସିସି ଚଲାନ୍ତି । ପରୀକ୍ଷା ମେ' ୩ରେ ହେବାକୁ ଥିବା ବେଳେ ୨୩ ଏପ୍ରିଲରେ ସେ ପ୍ରଶ୍ନପତ୍ର ପାଇଥିବା ଅଭିଯୋଗ ହୋଇଛି ।