ଭୁବନେଶ୍ବର ୧୩।୮: ୧୫ ବର୍ଷ ଧରି ଫେରାର ଥିଲା ଅଭିଯୁକ୍ତ । ଶେଷରେ ପୋଲିସ ହାତରେ ଧରାପଡିଛି । ୨୦୧୧ ମସିହା ଅଟୋ ଡ୍ରାଇଭର ହତ୍ୟାକାଣ୍ଡରେ ନୟାପଲ୍ଲୀ ଥାନା ପୋଲିସକୁ ମିଳିଲା ବଡ଼ ସଫଳତା । ଅନ୍ୟତମ ଫେରାର ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି ପୋଲିସ ।

ପ୍ରାୟ ୧୫ ବର୍ଷ ତଳେ ଅର୍ଥାତ ୨୯ ମାର୍ଚ୍ଚ ୨୦୧୧ ମସିହାରେ ଭୁବନେଶ୍ବର ନୟାପଲ୍ଲୀ ଥାନା ଅଞ୍ଚଳରେ ଘଟିଥିଲା ଜଘନ୍ୟ ହତ୍ୟାକାଣ୍ଡ । ଦାଦାଗିରି, ଦବଦବା ଜାହିର ପାଇଁ ରକ୍ତରଞ୍ଜିତ ହୋଇଥିଲା ସିଆରପି ଛକ । ସିଆରପି ଛକରେ କାଳିଆ ଗ୍ରୁପ୍ ଦବଦବା ଜାହିର କରିଥିବା ବେଳେ କମଳ ସରକାର ଏବଂ ତାଙ୍କ ଭାଇ ଗୋପାଳ ସରକାର ନୂଆ ଅଟୋ କିଣି ସେଠାରେ ବ୍ୟବସାୟ ଆରମ୍ଭ କରିଥିଲେ । କାଳିଆ ଗ୍ରୁପ୍ର ଅଟୋ ଷ୍ଟାଣ୍ଡ୍ ଥିବା କାରଣରୁ ସେମାନେ ଦୁଇ ଭାଇଙ୍କୁ ବିରୋଧ କରୁଥିଲେ । ଘଟଣା ଦିନ କମଳ ପାସେଞ୍ଜର ନେଇ ବାଣୀବିହାରରୁ ସିଆରପି ଆସିଥିଲେ । ଛକରେ ଯାତ୍ରୀଙ୍କୁ ଓହ୍ଲାଇବା ପରେ କାଳିଆ ଏବଂ ତାଙ୍କ ସହଯୋଗୀ ମାନେ କମଳଙ୍କୁ ଗାଳିଗୁଲଜ କରିଥିଲେ । ସେହି ସନ୍ଧ୍ୟାରେ ସେହିକଥାକୁ ନେଇ ଅଟୋ ଷ୍ଟାଣ୍ଡରେ ପାଟିତୁଣ୍ଡ ହୋଇଥିଲା । ପରେ ଅଟୋ ଡ୍ରାଇଭର କମଲଙ୍କୁ କାଳିଆ ଗ୍ରୁପ୍ ସଦସ୍ୟ ଛୁରୀରେ ଆକ୍ରମଣ କରିଥିଲେ । ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା ।

ହତ୍ୟା ଘଟଣା ନେଇ ଅଭିଯୋଗ ପରେ ନୟାପଲ୍ଲୀ ଥାନା ପୋଲିସ ତଦନ୍ତ ଆରମ୍ଭ କରିଥିଲା । ତଦନ୍ତ କରି ୪ ଜଣ ଅଭିଯୁକ୍ତଙ୍କୁ ପୂର୍ବରୁ ଗିରଫ କରିଥିଲା ପୋଲିସ । ମାମଲାରେ ସମ୍ପୃକ୍ତ ଆଉ ଜଣେ ଅଭିଯୁକ୍ତ ପୋଲିସକୁ ଚକମା ଦେଇ ଫେରାର ହୋଇଯାଇଥିଲା । ତେବେ ୨୦୧୬ ମସିହାରେ ୪ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ କୋର୍ଟ । କିନ୍ତୁ ଯେହେତୁ ଜଣେ ଫେରାର ଥିଲା ତେଣୁ ତଦନ୍ତ ଜାରି ରହିବ ବୋଲି କୋର୍ଟ ଦର୍ଶାଇଥିଲେ ।

ଦୀର୍ଘ ଦିନ ଧରି ପଡ଼ିରହିଥିବା କେସ୍ ଗୁଡ଼ିକୁ ପୋଲିସ ଏବେ ଫାଇଲ୍ କ୍ଲୋଜ୍ କରୁଥିବା ବେଳେ ଏହି କେସ୍ଟି ସାମ୍ନାକୁ ଆସିଥିଲା । ପୋଲିସ କେସ୍କୁ ତର୍ଜମା କରିବା ପରେ ପୂର୍ବରୁ ନେହୁର ବସ୍ତିରେ ରହୁଥିବା ଫେରାର ଅଭିଯୁକ୍ତ ବୀର ଘରକୁ ଯାଇ ପଚରାଉଚରା କରିଥିଲା । ପଚରାଉଚରା ବେଳେ ବୀରର ମାଆ ପୋଲିସକୁ କହିଥିଲେ ଯେ ମୋର ଏହି ନାମରେ କେହି ପୁଅ ନାହାନ୍ତି । ପରବର୍ତ୍ତୀ ସମୟରେ ପୋଲିସ ଯେତେବେଳେ କଠୋର ହୋଇଥିଲା ସେ କହିଥିଲେ ଯେ ମୋ ପୁଅ ବିଦେଶରେ । ତାପରେ ତାଙ୍କ ମାଆ ବୀରଙ୍କ ସହିତ ଫୋନ୍ ଯୋଗେ କଥା ହୋଇଥିଲେ । ଯଦ୍ବାରା ପୋଲିସ ତାଙକୁ ଟ୍ରାକ୍ କରି ପୁରୀ ତାଳବଣିଆରୁ ଗିରଫ କରିବାରେ ସଫଳ ହୋଇଥିଲା । ଏ ନେଇ ଜୋନ୍ ୫ ଏସ ବିଶ୍ଵ ରଞ୍ଜନ ସେନାପତି ସୂଚନା ପ୍ରଦାନ କରିଛନ୍ତି l

Watch Video: