ଦ ହେଗ୍, ନଭେମ୍ବର ୧୯: ରୋହିଙ୍ଗ୍ୟା ମୁସଲମାନଙ୍କ ଉପରେ ମିଆଁମାର ସେନା ନରସଂହାର କରିଥିବା ନେଇ ଏକ ଐତିହାସିକ ରାୟ ଶୁଣାଇଛନ୍ତି ଅନ୍ତର୍ଜାତୀୟ ନ୍ୟାୟାଳୟ । ୨୦୧୭ରେ ମିଆଁମାର ସେନାର ଅତ୍ୟାଚାର ଯୋଗୁଁ ହଜାର ହଜାର ଲୋକଙ୍କ ଜୀବନ ଯାଇଥିବା ବେଳେ ଲକ୍ଷାଧିକ ରୋହିଙ୍ଗ୍ୟା ନିଜ ଘର ଛାଡ଼ି ବାଂଲାଦେଶ ପଳାଇଥିଲେ। ଦୀର୍ଘ ୭ ବର୍ଷର ବିଚାର ପରେ ନଭେମ୍ବର ୧୯ରେ ଆସିଥିବା ଏହି ରାୟ ରୋହିଙ୍ଗ୍ୟାଙ୍କ ନ୍ୟାୟ ପାଇଁ ଏକ ବଡ଼ ପଦକ୍ଷେପ।

ଆଇସିଜେର ଅଧ୍ୟକ୍ଷ ୟୁଜି ଇୱାସାୱା କହିଛନ୍ତି, ମିଆଁମାରର ଉତ୍ତର ରାଖାଇନ୍ ଅଞ୍ଚଳରେ ରୋହିଙ୍ଗ୍ୟା ସମ୍ପ୍ରଦାୟ ବିରୋଧରେ ନରସଂହାର କରାଯାଇଛି। ଏହି ରାୟରେ ପ୍ରଥମ ଥର ପାଇଁ ଆଇସିଜେ କୌଣସି ରାଷ୍ଟ୍ର ନରସଂହାର କରିଥିବା ନେଇ ଏଭଳି ନିଷ୍କର୍ଷରେ ପହଞ୍ଚିଛି।

କ'ଣ ଥିଲା ପୂରା ଘଟଣା?ରୋହିଙ୍ଗ୍ୟାମାନେ ମିଆଁମାରର ରାଖାଇନ୍ ରାଜ୍ୟରେ ବସବାସ କରୁଥିବା ଏକ ସଂଖ୍ୟାଲଘୁ ମୁସଲମାନ ସମ୍ପ୍ରଦାୟ। ଦୀର୍ଘଦିନ ଧରି ସେମାନେ ସେଠାରେ ଭେଦଭାବ ଓ ନିର୍ଯାତନାର ସମ୍ମୁଖୀନ ହୋଇଆସୁଥିଲେ। ୨୦୧୭ରେ ମିଆଁମାରରେ କିଛି ସଶସ୍ତ୍ର ବିଦ୍ରୋହୀ ଗୋଷ୍ଠୀ ସୁରକ୍ଷା ବାହିନୀ ଉପରେ ଆକ୍ରମଣ କରିଥିଲେ। ଏହାପରେ ମିଆଁମାର ସେନା ରୋହିଙ୍ଗ୍ୟା ଅଧ୍ୟୁଷିତ ଗାଁଗୁଡ଼ିକରେ ବଡ଼ଧରଣର ସାମରିକ ଅଭିଯାନ ଆରମ୍ଭ କରିଥିଲା।

ଏହି ଅଭିଯାନ ସମୟରେ ସେନା ହଜାର ହଜାର ରୋହିଙ୍ଗ୍ୟାଙ୍କୁ ହତ୍ୟା କରିଥିବା, ମହିଳାଙ୍କୁ ଗଣଦୁଷ୍କର୍ମ କରିଥିବା ଏବଂ ଶିଶୁମାନଙ୍କ ଉପରେ ଅତ୍ୟାଚାର କରିଥିବା ଅଭିଯୋଗ ହୋଇଥିଲା। ଅନେକ ଗାଁକୁ ଜାଳି ଦିଆଯିବା ସହ ଘରଦ୍ୱାର ଧ୍ୱଂସ କରାଯାଇଥିଲା। ଏହି ହିଂସାରୁ ବଞ୍ଚିବା ପାଇଁ ପ୍ରାୟ ୭ ଲକ୍ଷରୁ ଅଧିକ ରୋହିଙ୍ଗ୍ୟା ବାଂଲାଦେଶକୁ ପଳାଇଥିଲେ। ବର୍ତ୍ତମାନ ସେଠାରେ ୧୦ ଲକ୍ଷରୁ ଅଧିକ ରୋହିଙ୍ଗ୍ୟା ଶରଣାର୍ଥୀ ରହୁଛନ୍ତି।

କାହିଁକି ନରସଂହାର ବୋଲି କହିଲେ ନ୍ୟାୟାଳୟ?

କୌଣସି ନିର୍ଦ୍ଦିଷ୍ଟ ଜାତି, ଧର୍ମ ବା ସମ୍ପ୍ରଦାୟକୁ ସମ୍ପୂର୍ଣ୍ଣ କିମ୍ବା ଆଂଶିକ ଭାବେ ନଷ୍ଟ କରିବା ଉଦ୍ଦେଶ୍ୟରେ ହତ୍ୟା ଓ ଅନ୍ୟାନ୍ୟ ଅମାନବୀୟ କାର୍ଯ୍ୟ କରାଗଲେ ତାହାକୁ ନରସଂହାର କୁହାଯାଏ। ଆଇସିଜେ ଏହି ମାମଲାର ବିଚାର କରିବା ସମୟରେ ଅନେକ ପ୍ରମାଣ ଯାଞ୍ଚ କରିଥିଲେ। ରୋହିଙ୍ଗ୍ୟାଙ୍କ ଗାଁଗୁଡ଼ିକୁ ଯୋଜନାବଦ୍ଧ ଭାବେ ନଷ୍ଟ କରାଯାଇଥିବା ଏବଂ ସେଠାରେ ଅନ୍ୟ ସମ୍ପ୍ରଦାୟର ଲୋକଙ୍କୁ ରଖାଯାଇଥିବା ଘଟଣାକୁ ମଧ୍ୟ ବିଚାରକୁ ନିଆଯାଇଥିଲା। ନ୍ୟାୟାଳୟଙ୍କ ମତରେ, ଏହି ସମସ୍ତ ଘଟଣାରୁ ରୋହିଙ୍ଗ୍ୟା ସମ୍ପ୍ରଦାୟକୁ ନଷ୍ଟ କରିବାର ଉଦ୍ଦେଶ୍ୟ ସ୍ପଷ୍ଟ ହେଉଛି। ତେଣୁ ଏହାକୁ ନରସଂହାର ଭାବେ ବିଚାର କରାଯାଇଛି।

ମିଆଁମାରକୁ କ'ଣ ନିର୍ଦ୍ଦେଶ ଦେଲେ ନ୍ୟାୟାଳୟ?ଏହି ରାୟରେ ଆଇସିଜେ ମିଆଁମାରକୁ କେତେକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି।- ବାଂଲାଦେଶରେ ରହୁଥିବା ରୋହିଙ୍ଗ୍ୟା ଶରଣାର୍ଥୀଙ୍କୁ ନିଜ ଦେଶକୁ ଫେରିବାରେ ସହଯୋଗ କରିବାକୁ ହେବ।- ସେମାନଙ୍କ ପ୍ରତ୍ୟାବର୍ତ୍ତନ ସୁରକ୍ଷିତ ଓ ସ୍ୱେଚ୍ଛାକୃତ ଓ ସମ୍ମାନଜନକ ହେବା ଆବଶ୍ୟକ।- ନରସଂହାରରେ ସମ୍ପୃକ୍ତ ଥିବା ସନ୍ଦିଗ୍ଧ ବ୍ୟକ୍ତିଙ୍କ ବିରୋଧରେ ତଦନ୍ତ କରି ଦୋଷୀଙ୍କୁ ଦଣ୍ଡିତ କରିବାକୁ ହେବ।

ତେବେ ଆଇସିଜେର ରାୟ ଆଇନଗତ ଭାବେ ବାଧ୍ୟତାମୂଳକ ହୋଇଥିଲେ ମଧ୍ୟ ଏହାକୁ ସିଧାସଳଖ କାର୍ଯ୍ୟକାରୀ କରାଇବା ପାଇଁ ନ୍ୟାୟାଳୟର ନିଜସ୍ୱ ବଳପ୍ରୟୋଗ କ୍ଷମତା ନାହିଁ। ତେଣୁ ମିଆଁମାର ସରକାର ଏହି ନିର୍ଦ୍ଦେଶ କିପରି ପାଳନ କରିବେ, ତାହା ଏବେ ଗୁରୁତ୍ୱପୂର୍ଣ୍ଣ।

also read- ରାଜନୈତିକ ସଂଘର୍ଷରେ ଥରୁଛି ପଡ଼ୋଶୀ ଦେଶ, ଅଶାନ୍ତ ଢାକାରୁ ଚଟ୍ଟୋଗ୍ରାମ !

କିଏ ଦାୟର କରିଥିଲା ମାମଲା?ମିଆଁମାର ବିରୋଧରେ ଏହି ମାମଲା ଦାୟର କରିଥିଲା ଆଫ୍ରିକୀୟ ଦେଶ ଗାମ୍ବିଆ। ୧୯୪୮ ମସିହାର ଜାତିସଂଘ ନରସଂହାର ନିରୋଧୀ ଚୁକ୍ତି ଆଧାରରେ ଗାମ୍ବିଆ ଏହି ପଦକ୍ଷେପ ନେଇଥିଲା। ୫୭ଟି ସଦସ୍ୟ ରାଷ୍ଟ୍ର ଥିବା ଇସଲାମିକ୍ ସହଯୋଗ ସଂଗଠନ ମଧ୍ୟ ଗାମ୍ବିଆକୁ ସମର୍ଥନ କରିଥିଲା। ଅନ୍ୟପଟେ, ମିଆଁମାର ନିଜ ବିରୋଧରେ ଆସିଥିବା ନରସଂହାର ଅଭିଯୋଗକୁ ଖଣ୍ଡନ କରିଆସୁଥିଲା। ଏହାର ଯୁକ୍ତି ଥିଲା ଯେ, ସେନା କେବଳ ବିଦ୍ରୋହୀ ଆତଙ୍କବାଦୀଙ୍କ ବିରୋଧରେ ଅଭିଯାନ ଚଳାଇଥିଲା।

ପୀଡ଼ିତଙ୍କ ଆଖିରେ ଫେରିଲା ଆଶା

ବାଂଲାଦେଶର ଶରଣାର୍ଥୀ ଶିବିରରେ ରହୁଥିବା ରୋହିଙ୍ଗ୍ୟାମାନେ ଏହି ରାୟକୁ ନେଇ ଆଶାବାଦୀ ଅଛନ୍ତି। ଜଣେ ୨୩ ବର୍ଷୀୟା ଦୁଷ୍କର୍ମ ପୀଡ଼ିତା କହିଛନ୍ତି, ତାଙ୍କୁ ନ୍ୟାୟ ଦରକାର ଏବଂ ମହିଳାଙ୍କୁ ଦୁଷ୍କର୍ମ କରିଥିବା ଦୋଷୀଙ୍କୁ କଠୋର ଦଣ୍ଡ ମିଳିବା ଉଚିତ।ସେହିପରି ୨୦ ବର୍ଷୀୟ ମହମ୍ମଦ ଓସମାନ ନିଜ ଗାଁକୁ ଫେରିବାକୁ ଚାହୁଁଛନ୍ତି। ସେ କହିଛନ୍ତି, ମିଆଁମାର ସେନା ତାଙ୍କ ବାପାଙ୍କୁ ଗୁଳି କରି ହତ୍ୟା କରିଥିଲା। ତାଙ୍କ ମାଆଙ୍କ ସହ ଅନ୍ୟ ମହିଳାମାନଙ୍କୁ ଦୁଷ୍କର୍ମ କରାଯାଇଥିଲା ଏବଂ ତାଙ୍କ ଘରକୁ ଜାଳି ଦିଆଯାଇଥିଲା। ସେ ନିଜ ଗାଁକୁ ଫେରି ବାପା, ମାଆ ଓ ସାନଭାଇଙ୍କ ଶେଷକୃତ୍ୟ କରିବାକୁ ଚାହୁଁଛନ୍ତି।

ଏହି ରାୟର ମହତ୍ତ୍ୱ କ'ଣ?ଦୀର୍ଘ ବର୍ଷ ଧରି ନିଜ ଦେଶରୁ ବିତାଡ଼ିତ ହୋଇ ଅନ୍ୟ ଦେଶରେ ଶରଣାର୍ଥୀ ଜୀବନ ବିତାଉଥିବା ରୋହିଙ୍ଗ୍ୟାଙ୍କ ପାଇଁ ଏହି ରାୟ ଏକ ବଡ଼ ଆଶା। ତେବେ କେବଳ ରାୟ ଶୁଣାଇଦେଲେ ସେମାନଙ୍କ ସମସ୍ୟାର ସମାଧାନ ହେବ ନାହିଁ। ସେମାନେ କେବେ ନିଜ ଘରକୁ ଫେରିବେ, ଦୋଷୀଙ୍କୁ କେବେ ଦଣ୍ଡ ମିଳିବ ଏବଂ କ୍ଷତିପୂରଣ କେବେ ମିଳିବ, ତାହା ମିଆଁମାର ସରକାରଙ୍କ ପରବର୍ତ୍ତୀ ପଦକ୍ଷେପ ଉପରେ ନିର୍ଭର କରିବ।