ଭୁବନେଶ୍ୱର : କଠିନ ପରିଶ୍ରମ, ଅଧ୍ୟବସାୟ, ନିଷ୍ଠା ଥିଲେ ସବୁ ସମ୍ଭବ। ଯିଏ ଜିତିବାର ଉଦ୍ଦେଶ୍ୟ ରଖିଛି ସେ କେବେ ପରିସ୍ଥିତିର ଦ୍ୱାହି ଦିଏନି ଆଉ ଜିତିବା ଯାହାର ଜିଦ୍ ତା ସାମ୍ନାରେ ପରିସ୍ଥିତି ବି ମୁଣ୍ଡ ନୁଆଁଇ ଦିଏ। ଏହି କଥା ସବୁ ସତ ହୋଇଛି ଏହି ଦୁଇ ଝିଅଙ୍କ କ୍ଷେତ୍ରରେ। ସେମାନେ ଦୁନିଆକୁ ଦେଖାଇ ଦେଇଛନ୍ତି ନିଜ ଉପଲବ୍ଧି। ଆଉ ଗର୍ବର ସହ କହିଛନ୍ତି, ଆମେ ଚାହିଁଲେ ସବୁ ସମ୍ଭବ। ଦୁହେଁ ଏବେ ରାଜ୍ୟରେ ଟପ୍ପର, ଦେଶରେ ଟପ୍ପର। ତାଙ୍କ ପାଇଁ ଏବେ ସମସ୍ତେ ଗର୍ବିତ... ସେମାନେ ଏବେ ସବୁଠି ପ୍ରଶଂସିତ।

ଜଣେ ଟପର୍ ହେଲେ ପୁରୀର ଟିନା ରଥ। ପୁରୀ ମଦର୍ ପବ୍ଲିକ ସ୍କୁଲର ଛାତ୍ରୀ। CBSEରେ ୫୦୦ ରୁ ୫୦୦ ନମ୍ବର ରଖି ହୋଇଛନ୍ତି ରାଜ୍ୟ ଟପର୍। ଏହି ଉପଲବ୍ଧି ହାସଲ କରିବା ନଥିଲା ସହଜ। ଦୈନିକ ସେ ପଢ଼ୁଥିଲେ ୭ରୁ ୮ ଘଣ୍ଟା। ଏମିତି କି ଫାଇନାଲ ପରୀକ୍ଷା ପୂର୍ବରୁ ୩୦ ଥର ଦେଇଥିଲେ ମକ୍ ଟେଷ୍ଟ। ପ୍ରଶ୍ନ ନିଜେ କଲେକ୍ଟ କରି ନିଜେ ଉତ୍ତର ଲେଖୁଥିଲେ। ସ୍ପିଡ୍ ଆଉ ନିର୍ଭୁଲ ରାଇଟିଙ୍ଗ ଉପରେ ଫୋକସ ରଖିଥିଲେ ଟିନା। ‘ସବୁବେଳେ ୯୯% ଉପରେ ଫୋକସ୍ କରୁଥିଲେ କିନ୍ତୁ ଶତ ପ୍ରତିଶତ ରଖିବାକୁ ଚେଷ୍ଟା ଚଳାଉଥିଲେ।

ଟୀନା କହିଛନ୍ତି, ରେଜଲ୍ଟ ଶୁଣିବା ପରେ ସେ ଖୁସିରେ କାନ୍ଦି ପକାଇଥିଲି। ଏ ସବୁ ସମ୍ଭବ ହୋଇପାରିଛି  ପରିଶ୍ରମ , ବାପା ମାଆ ଓ ଶିକ୍ଷକ ଶିକ୍ଷୟତ୍ରୀଙ୍କ ସହଯୋଗ ପାଇଁ। ବାପା ମା’ ପାଠ ପାଇଁ କେବେ କୌଣସି ଚାପ ପ୍ରୟୋଗ କରି ନାହାନ୍ତି। କିନ୍ତୁ ସେ ସବୁବେଳେ ପାଠ ପଢ଼ାକୁ ଗୁରୁତ୍ବର ସହ ନେଉଥିଲେ। ପଢ଼ିବା ସହ ଲେଖିବା ଉପରେ ବି ଖୁବ୍ ଗୁରୁତ୍ବ ଦେଉଥିଲି। ପ୍ରତି ଚାପ୍ଟରକୁ ୪ରୁ ୫ ଥର ଲେଖୁଥିଲେ। ଏହାଦ୍ବାର ପାଠ ମନେ ରଖିବା ସହଜ ହୋଇଯାଇଥିଲା। ଯୁକ୍ତ ଦୁଇ ପରୀକ୍ଷା ପରେ ନିଟ୍ ପରୀକ୍ଷା ଦେବାକୁ ପ୍ରସ୍ତୁତ ହେବି। ଭୁବନେଶ୍ବର ଏମ୍ସରେ ପଢ଼ି କାର୍ଡିଓଲୋଜିଷ୍ଟ ହେବାର ଲକ୍ଷ୍ୟ ରଖିଛି। କମ୍ ଟଙ୍କାରେ ଗରୀବଙ୍କ ସେବା ପାଇଁ ମୁଁ ଖୁବ୍ ଗୁରୁତ୍ବ ଦେବି। କେବେ ସୋସିଆଲ ମିଡିଆ ବ୍ୟବହାର କରନ୍ତିନି ଟୀନା। ସବୁବେଳେ କଠିନ ପରିଶ୍ରମ ଉପରେ ଗୁରୁତ୍ବ ଦେବା ସହ ପ୍ରଭୁ ଜଗନ୍ନାଥଙ୍କ ଉପରେ ଖୁବ୍ ବିଶ୍ବାସ ରଖିଥାଏ ବୋଲି କହିଛନ୍ତି ଟିନା।

ଅନ୍ୟ ପଟେ ରାଜ୍ୟ ଟପର୍ ତାଲିକାରେ ଆଉ ଜଣେ ଗେହ୍ଲି ଝିଅ। ଭୁବନେଶ୍ୱର କେଭି-୧ର ଆଲିଶା ବିଶ୍ଵାଳ। ସେ ମଧ୍ୟ ରଖିଛନ୍ତି ୫୦୦ ରୁ ୫୦୦ ନମ୍ବର। ବଡ଼ କଥା ହେଉଛି ସେ ଦୈନିକ ପଢ଼ୁଥିଲେ ମାତ୍ର ୩ ରୁ୪ ଘଣ୍ଟା । ଫାଇନାଲ ପରୀକ୍ଷା ପୂର୍ବରୁ ଅନେକ ସାମ୍ପଲ୍ ପ୍ରଶ୍ନ ର ଉତ୍ତର ଲେଖିଥିଲେ ଆଲିସା । ସ୍ପିଡ୍ ଆଉ ନିର୍ଭୁଲ ରାଇଟିଙ୍ଗ ଓ ରିଭିଜନ ଉପରେ ଫୋକସ ରଖିଥିଲେ ଆଲିଶା । ଭବିଷ୍ୟତରେ ନ୍ୟୁରୋଲୋଜିଷ୍ଟ ହେବା ଲକ୍ଷ୍ୟ ରଖିଥିବା କହିଛନ୍ତି। ଅଲିସା ଏକଥା ବି କହିଛନ୍ତି ଯେ, ଅଧିକ ନମ୍ବରର ରଖିବାକୁ ମୋତେ କେହି ପ୍ରେସର କରୁ ନଥିଲେ ବରଂ ଉତ୍ସାହିତ କରୁଥିଲେ।

’ ବୁଧବାର ସିବିଏସଇ ଦଶମ ରେଜଲ୍ଟ ପ୍ରକାଶ ପାଇଛି। ଚଳିତ ବର୍ଷ ଦେଶର ୮ ହଜାର ୭୫ଟି ପରୀକ୍ଷା କେନ୍ଦ୍ର ପାଇଁ ୨୫ଲକ୍ଷ ୮ହଜାର ୩୧୯ଜଣ ଛାତ୍ରଛାତ୍ରୀ ଫର୍ମ ପୂରଣ କରିଥିଲେ। ତାମଧ୍ୟରୁ ୨୫ ଲକ୍ଷରୁ ଅଧିକ ପିଲା ଦେଇଥିଲେ ପରୀକ୍ଷା। ପାସ୍ ହାର ୯୩.୭ % ଯାହା ଗତ ବର୍ଷଠୁ ୦.୦୪ ପ୍ରତିଶତ ଅଧିକ। ଏଥର ମଧ୍ୟ ଝିଅମାନେ ପୁଅଙ୍କ ଆଗରେ। ୯୪.୯୯% କୃତକାର୍ଯ୍ୟ ବେଳେ ପୁଅଙ୍କ ରେଜଲ୍ଟ ୯୨. ୬୯% ହୋଇଛି। ବଡ଼ କଥା ହେଲା ୫୫ ହଜାରରୁ ଅଧିକ ପିଲା ୯୫  ପ୍ରତିଶତ ବା ତାଠୁ ଅଧିକ ନମ୍ବର ରଖିଛନ୍ତି। ଏହି ଅବସରରେ ନ୍ୟୁଜ7 ଡିଜିଟାଲ୍ ପକ୍ଷରୁ ସେମାନଙ୍କୁ ଅନେକ ଅନେକ ଶୁଭେଚ୍ଛା।

Also Read- ସିବିଏସଇ ଦଶମ ବୋର୍ଡ ପରୀକ୍ଷାରେ ଟିଏସ୍‌ଜି ଛାତ୍ରଛାତ୍ରୀଙ୍କ ବାଜିମାତ୍, ପାସ୍ ହାର ଶହେ ପ୍ରତିଶତ