ଭୁବନେଶ୍ୱର: ରାଜ୍ୟରେ ଲାଗି ରହିଛି ଲଘୁଚାପ ଜନିତ ବର୍ଷା। ଆଗାମୀ ୪ ଦିନ ପର୍ଯ୍ୟନ୍ତ ରାଜ୍ୟରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ତୁହାକୁ ତୁହା ବର୍ଷାରେ ଭିଜୁଛି ପୂରା ଓଡି଼ଶା। ସକାଳୁ ପାଗ କୋହଲିଆ ରହିଥିଲା। କିନ୍ତୁ ମଧ୍ୟାହ୍ନ ପରେ ହଠାତ ବଦଳିଯାଇଥିଲା ପାଗ। ଉପକୂଳରୁ ଆଭ୍ୟନ୍ତରୀଣ। ଦକ୍ଷିଣରୁ ପଶ୍ଚିମ ସବୁଠି କୋପ ଦେଖାଇବ ଲଘୁଚାପ। ଏନେଇ ଆଗାମୀ ୩ ଦିନ ପର୍ଯ୍ୟନ୍ତ ବିଭିନ୍ନ ଜିଲ୍ଲାକୁ ରେଡ୍‌, ଅରେଞ୍ଜ ଓ ୟେଲୋ ଓ୍ୱାର୍ଣ୍ଣିଂ ଜାରି କରାଯାଇଛି।

​​​​​​​

ଶନିବାର ସକାଳ ପର୍ଯ୍ୟନ୍ତ ଜାରି ହୋଇଥିବା ଚେତାବନୀ-

ମାଲକାନାଗିରି, କଳହାଣ୍ଡି, କୋରାପୁଟ ଓ ରାୟଗଡାକୁ ରେଡ୍‌ ଓ୍ୱାର୍ଣ୍ଣିଂ ଜାରି କରାଯାଇଛି। ଏସବୁ ଜିଲ୍ଲାକୁ  ଅତ୍ୟନ୍ତ ଭାରୀ ବର୍ଷା ହେବାର ସମ୍ଭାବନା ରହିଛି। ଏଠାରେ ୨୦ ସେମିରୁ ଅଧିକ ବର୍ଷା ହେବାର ସମ୍ଭାବନା ରହିଛି। ସେହିପରି ଦକ୍ଷିଣ ଓଡ଼ିଶାର ୯ ଜିଲ୍ଲାକୁ ଅରେଞ୍ଜ ଓ୍ୱାର୍ଣ୍ଣିଂ ଜାରି କରାଯାଇଛି। ଏସବୁ ଜିଲ୍ଲାରେ ୧୨ରୁ ୨୦ ସେମି ବର୍ଷା ହୋଇପାରେ। ଅନ୍ୟ୧୭ ଜିଲ୍ଲାକୁ ୟେଲ୍ଲୋ ଓ୍ୱାର୍ଣ୍ଣିଂ ଜାରି କରାଯାଇଛି । ଏସବୁ ଜିଲ୍ଲାରେ ପ୍ରବଳ ବର୍ଷା ଅର୍ଥାତ ୭ରୁ ୧୧ ସେମି ପର୍ଯ୍ୟନ୍ତ ବର୍ଷା ହୋଇପାରେ।

ଶନିବାର ୮.୩୦ରୁ ରବିବାର ୮.୩୦ ପର୍ଯ୍ୟନ୍ତ ଚେତାବନୀ-

ଶନିବାର ଆଭ୍ୟନ୍ତରୀଣରେ କୋପ ଦେଖାଇବ ଲଘୁଚାପ। ଶନିବାର ପାଇଁ ୫ ଜିଲ୍ଲାକୁ ରେଡ୍‌ ଓ୍ୱାର୍ଣ୍ଣିଂ ଜାରି କରାଯାଇଛି। ସେହି ଜିଲ୍ଲାଗୁଡିକ ହେଲା- କନ୍ଧମାଳ, ସୋନପୁର, ବୌଦ୍ଧ, ସମ୍ବଲପୁର ଓ ଅନୁଗୁଳ। ସେହିପରି ୮ ଜିଲ୍ଲାକୁ ଅରେଞ୍ଜ ଓ୍ୱାର୍ଣ୍ଣିଂ ଜାରି କରାଯାଇଛି। ଉପକୂଳ ଓ ଦକ୍ଷିଣ ଓଡ଼ିଶାର ଜିଲ୍ଲାଗୁଡିକୁ ପ୍ରବଳ ବର୍ଷା ନେଇ ୟେଲୋ ଓ୍ୱାର୍ଣ୍ଣିଂ ଜାରି କରାଯାଇଛି।

ସୂଚନା ଅନୁସାରେ ଭୁବନେଶ୍ୱରେ ପ୍ରବଳ ବର୍ଷା ଯୋଗୁଁ ରାସ୍ତାଘାଟରେ ପାଣି ଜମି ରହିଛି। ଯାତାୟାତରେ ସମସ୍ୟା ସୃଷ୍ଟି ହୋଇଛି। ସେହିପରି ପୁରୀରେ ପ୍ରବଳ ବର୍ଷା ଯୋଗୁଁ ରଥଖଳା କାର୍ଯ୍ୟ ବନ୍ଦ ରହିଛି।