କଟକ : ଲଘୁଚାପ ଜନିତ ବର୍ଷାରେ ରାଜ୍ୟରେ ବିଭିନ୍ନ ସ୍ଥାନରେ ସୃଷ୍ଟି ହୋଇଛି ବନ୍ୟା ପରିସ୍ଥିତି। କେଉଁଠି ରାସ୍ତା ବୁଡ଼ିଲାଣି ତ ଆଉ କେଉଁଠି ଗାଁରେ ପଶିଲାଣି ପାଣି। ସେମିତି ବନ୍ୟା ଜଳରେ କୂଳ ଖାଉଛି ଚିତ୍ରୋତ୍ପଳା ନଦୀ ମୁହାଁଣ। ଖସି ଚାଲିଛି ଅତଡା। ଭୟରେ ୨୫ଟି ପଞ୍ଚାୟତର ନଦୀ କୂଳିଆ ଗ୍ରାମବାସୀ। ମହାନଦୀ ଚିତ୍ରୋତ୍ପଳା ଦ୍ୱୀପାଞ୍ଚଳ ପାଇଁ ବିପଦ ସୃଷ୍ଟି କରିଛି ମହାନଦୀର ଗୁଆଳୀନାସି ମୁହାଁଣ।

ଏଭଳି ଦୃଶ୍ୟ ଦେଖିବାକୁ ମିଳିଛି କଟକ ଜିଲ୍ଲା ସାଲେପୁର ବ୍ଳକ ତରିତୋ ପଂଚାୟତ ଗୁଆଲିନାସିରେ। ମହାନଦୀ ଚିତ୍ରୋତ୍ପଳା ଦ୍ବୀପାଞ୍ଚଳ ପାଇଁ ବିପଦ ସୃଷ୍ଟି କରିଛି ଗୁଆଳିନାସି ମୁହାଣ । ମହାନଦୀରୁ ବାହାରି ଥିବା ବନ୍ୟାଜଳ ଚିତ୍ରୋତ୍ପଳା ଗୁଆଳିନାସି ମୁହାଁଣରେ ତାର କରାଳ ରୂପ ଦେଖାଇଛି। ଦୁଇ ଦିନ ତଳେ କୂଳ ଖାଇବା ଆରମ୍ଭ କରିଥିଲା। ଆଜି ମଧ୍ୟାହ୍ନ ମଧ୍ୟରେ ପ୍ରାୟ ୫୦୦ ମିଟର ଚଉଡ଼ା ଓ ଲମ୍ବରେ ଏକ କିଲୋମିଟର କୂଳ ଖାଇ ସାରିଲାଣି। ଏଭଳି ଭାବେ ଯଦି କୂଳ ଖାଏ ତାହା ହେଲେ ଦ୍ୱୀପାଞ୍ଚଳ ସହ ଏକର ଚାଷ ଜମି ପାଣିରେ ବୁଡିବା ସହିତ ୨୫ରୁ ଉର୍ଦ୍ଧ୍ୱ ପଞ୍ଚାୟତର ହଜାର ହଜାର ଜନସାଧାରଣ ଜୀବନ ଜୀବିକା ଉଜୁଡି ଯିବାର ଆଶଙ୍କା ଦେଖାଦେଇଛି। ଏମିତି କି ବହୁ କ୍ଷୟକ୍ଷତି ହେବାର ସମ୍ଭାବନା ଦେଖାଯାଉଛି। ଏବେ ପୂରା ଭୟଭୀତ ଅବସ୍ଥାରେ ସ୍ଥାନୀୟ ଅଞ୍ଚଳବାସୀ । ତେବେ ପ୍ରଶାସନ ପକ୍ଷରୁ ଏଯାବତ କୌଣସି ପଦକ୍ଷେପ ନିଆଯାଇନାହିଁ । ପ୍ରଶାସନ ପକ୍ଷରୁ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି ଅଞ୍ଚଳବାସୀ।

ସଙ୍ଗେ ସଙ୍ଗେ ଜଳ ନିକାଶ ବିଭାଗର ଇଷ୍ଟର୍ଣ୍ଣ ଆସିଷ୍ଟାଣ୍ଟ ଚିଫ୍ ଇଂଜିନିଅର, ସୁପରିଟେଣ୍ଡିଙ୍ଗ ଇଂଜିନିଅର୍, ଆସିଷ୍ଟାଣ୍ଟ ଇଂଜିନିଅର ପୁଣ୍ଡାଳ ଓ ବହୁ ବିଭାଗୀୟ ଅଧିକାରୀ ଆସି ଘଟଣା ସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ପାଣି କମିଲେ ଯାହା କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ଉପସ୍ଥିତ ଲୋକମାନଙ୍କୁ କହିଛନ୍ତି। ଏପଟେ ଚାଷୀନଙ୍କର ଏକର ଏକର ଫସଲ ସହିତ ଜମି ପାଣି ଗର୍ଭରେ ଲୀନ ହୋଇଥିବା ବେଳେ ସହ ସହ ଏକର ଚାଷ ଜମି ନଦୀ ଗର୍ଭରେ ଲୀନ ହେବାକୁ ଏଡାଇ ଦିଆଯାଇ ନ ପାରେ।

Also Read-Aerial Survey: ହେଲିକପ୍ଟର ଯୋଗେ ବନ୍ୟା ସ୍ଥିତି ସମୀକ୍ଷା କଲେ ରାଜସ୍ୱ ମନ୍ତ୍ରୀ, ବନ୍ୟା ପ୍ରଭାବିତ ଅଞ୍ଚଳ ବୁଲିଲେ