ରାଞ୍ଚି: ରାଞ୍ଚିରେ ମହେନ୍ଦ୍ର ସିଂ ଧାେନୀଙ୍କ ଘରୋଇ ଷ୍ଟାଡିୟମରେ ଗର୍ଜିଲା ରୋକୋ ବ୍ୟାଟ୍। ବିରାଟ କୋହଲିଙ୍କ ଦମଦାର ଶତକ ସହ ରୋହିତ ଶର୍ମା ଓ ଅଧିନାୟକ କେଏଲ ରାହୁଲଙ୍କ ଅର୍ଦ୍ଧଶତକ ବଳରେ ଭାରତ ବଡ଼ ସ୍କୋର କରିଛି। ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତ ୮ ଓ୍ଵିକେଟ୍ ହରାଇ ୩୪୯ ରନ କରିଛି। ଦକ୍ଷିଣ ଆଫ୍ରିକା ସମ୍ମୁଖରେ ରହିଛି ୩୫୦ ରନର ବିଜୟ ଲକ୍ଷ୍ୟ। ଭାରତ ପକ୍ଷରୁ ବିରାଟ କୋହଲି ୧୨୦ ବଲରୁ ୧୩୫ ରନର ଶତକୀୟ ଇନିଂସ ଖେଳିଛନ୍ତି। ରୋହିତ ଶର୍ମା ୩୭ ରନ ଓ କେଏଲ ରାହୁଲ ୬୦ ରନ କରିଛନ୍ତି। ବୋଲିଂରେ ଦକ୍ଷିଣ ଆଫ୍ରିକା ପକ୍ଷରୁ ନାନ୍ଦ୍ରେ ବର୍ଗର, ମାର୍କୋ ଜନସେନ, କୋର୍ବିନ ବୋଶ ଓ ଅଟନିଲ ବାର୍ଟମ୍ୟାନ ପ୍ରତ୍ୟେକଙ୍କୁ ଦୁଇଟି ଲେଖାଏଁ ଓ୍ଵିକେଟ୍ ମିଳିଛି।

ଆଜିର ମ୍ୟାଚରେ ରୋହିତ ଶର୍ମାଙ୍କ ସହ ଓପନିଂ କରିଥିଲେ ଯଶସ୍ଵୀ ଜୟସ୍ଵାଲ। ୨୫ ରନ ସ୍କୋରରେ ଭାରତକୁ ପ୍ରଥମ ଝଟକା ଲାଗିଥିଲା। ଜୟସ୍ଵାଲ(୧୮ ରନ) ମିଳିଥିବା ଭଲ ଆରମ୍ଭକୁ ବଡ଼ ଇନିଂସରେ ପରିଣତ କରି ପାରି ନ ଥିଲେ। ଏହା ପରେ ପଡ଼ିଆରେ ଦେଖିବାକୁ ମିଳିଥିଲା ରୋହିତ ଓ କୋହଲିଙ୍କ ଶୋ। ଦୁଇ ବ୍ୟାଟର ନିଜର ଚିରାଚରିତ ଢଙ୍ଗରେ ବ୍ୟାଟିଂ କରି ଦକ୍ଷିଣ ଆଫ୍ରିକା ବୋଲରଙ୍କୁ ପ୍ରହାର କରିଥିଲେ। ଏହି କ୍ରମରେ କୋହଲି ଏବଂ ରୋହିତ ନିଜର ଅର୍ଦ୍ଧଶତକ ପୂରା କରିଥିଲେ। ଦୁଇ ବ୍ୟାଟର ଦ୍ଵିତୀୟ ଓ୍ଵିକେଟ୍ ଭାଗିଦାରୀରେ ଶତକୀୟ ଭାଗିଦାରୀ ଯୋଡ଼ି ଭାରତ ପାଇଁ ବିଶାଳ ସ୍କୋରର ମୂଳଦୁଆ ପକାଇଥିଲେ।

​​​​​​​

୧୬୧ ରନ ସ୍କୋରରେ ଭାରତକୁ ଲାଗିଥିଲା ଦ୍ଵିତୀୟ ଝଟକା। ରୋହିତ ଶର୍ମା ପୁଲ୍ ସଟ୍ ଖେଳିବାକୁ ଯାଇ ମାର୍କୋ ଜନସେନଙ୍କ ବଲରେ ଏଲବିଡବ୍ଲ୍ୟୁ ହୋଇଥିଲେ। ରୋହିତ ୫୧ ବଲରୁ ୫ ଚୌକା ଓ ୩ ଛକା ସହ ୫୭ ରନ କରିଥିଲେ। ଅନ୍ୟପଟେ କୋହଲି ଇନିଂସ ସମ୍ଭାଳିଥିଲେ। ଋତୁରାଜ ଗାଏକ୍ଵାଡ଼ ୮ ରନ ଓ ଓ୍ଵାଶିଂଟନ ସୁନ୍ଦର ୧୩ ରନ କରି ଆଉଟ୍ ହୋଇଥିଲେ। କୋହଲି ଦମଦାର ବ୍ୟାଟିଂ କରି ୧୦୨ ବଲରୁ ୫୨ତମ ଦିନିକିଆ ଶତକ ହାସଲ କରିଥିଲେ। କୋହଲି ଓ କେଏଲ ରାହୁଲ ଦ୍ରୁତ ବ୍ୟାଟିଂ କରି ପଞ୍ଚମ ଓ୍ଵିକେଟ୍ ପାଇଁ ୭୬ ରନ ଯୋଡ଼ିଥିଲେ। ୨୭୬ ରନ ସ୍କୋରରେ କୋହଲି ଆଉଟ୍ ହୋଇଥିଲେ। ସେ ୧୨୦ ବଲରୁ ୧୧ ଚୌକା ଓ ୭ ଛକା ସହ ୧୩୫ ରନର ମାରାଥନ ଇନିଂସ ଖେଳିଛନ୍ତି।

ଏହା ପରେ କେଏଲ ରାହୁଲ ନିଜର ଅଧିନାୟକତ୍ଵ ଇନିଂସ ଖେଳିଥିଲେ। ସେ ଶେଷ ଆଡ଼କୁ ରବୀନ୍ଦ୍ର ଜାଡ଼େଜାଙ୍କ ସହ ମିଶି ଷଷ୍ଠ ଓ୍ଵିକେଟ୍ ଭାଗିଦାରୀରେ ୬୫ ରନ ଯୋଡ଼ିଥିଲେ। ରାହୁଲ ୫୬ ବଲରୁ ୨ ଚୌକା ଓ ୩ ଛକା ସହ ୬୦ ରନ କରିଥିଲେ। ଶେଷ ଓଭରରେ ଭାରତ ୨ଟି ଓ୍ଵିକେଟ୍ ହରାଇଥିଲେ ହେଁ ୮ ଓ୍ଵିକେଟ୍ ହରାଇ ୩୪୯ ରନ କରିଛି।