ମୁମ୍ୱାଇ ୦୩/୦୧: ଶେଷରେ ବିସିସିଆଇ ଆଗରେ ନଇଁଲା କେକେଆର । ନିର୍ଦ୍ଦେଶନାମା ପରେ ବାଂଲା ବୋଲରଙ୍କୁ ରିଲିଜ୍ କଲା କୋଲକାତା ନାଇଟ୍ ରାଇଡର୍ସ । ବାଂଲାଦେଶୀ ଦ୍ରୁତ ବୋଲର ମୁସ୍ତାଫିଜୁର ରହମାନଙ୍କୁ ତାଙ୍କ ଦଳରୁ ମୁକ୍ତ କରିଛି ଫ୍ରାଞ୍ଚାଇଜ୍ । ପୂର୍ବରୁ ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (ବିସିସିଆଇ) ମୁସ୍ତାଫିଜୁରଙ୍କୁ ଦଳରୁ ମୁକ୍ତ କରିବାକୁ ଦଳକୁ ନିର୍ଦ୍ଦେଶ ଦେଇଥିଲା । ଯାହା ପରେ କେକେଆର ଏହି ନିଷ୍ପତ୍ତି ନେଇଛି ।

ଚେନ୍ନାଇ ସୁପର କିଙ୍ଗ୍ସ (ସିଏସକେ) ଓ ଦିଲ୍ଲୀ କ୍ୟାପିଟାଲ୍ସ (ଡିସି) ସହ ଏକ ଭୟଙ୍କର ନିଲାମ ଯୁଦ୍ଧ ପରେ, ଗତ ମାସରେ ହୋଇଥିବା ମିନି ନିଲାମ ସମୟରେ କେକେଆର ମୁସ୍ତାଫିଜୁରଙ୍କୁ ₹୯.୨୦ କୋଟିରେ କିଣିଥିଲା । ଏହା ଆଇପିଏଲ ଇତିହାସରେ ୩୦ ବର୍ଷୀୟ ଦ୍ରୁତ ବୋଲରଙ୍କ ପାଇଁ ସବୁଠାରୁ ମହଙ୍ଗା ଚୁକ୍ତି ପ୍ରମାଣିତ ହୋଇଥିଲା ।

କୋଲକାତା ନାଇଟ୍ ରାଇଡର୍ସର ଏକ ବିବୃତ୍ତିରେ କୁହାଯାଇଛି, କେକେଆର ନିଶ୍ଚିତ କରିଛି ଯେ ଆଇପିଏଲର ପରିଚାଳନା ସଂସ୍ଥା ଭାବରେ ବିସିସିଆଇ/ଆଇପିଏଲ, ଆଗାମୀ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ସିଜିନ ପୂର୍ବରୁ ମୁସ୍ତାଫିଜୁର ରହମାନଙ୍କୁ ଦଳରୁ ମୁକ୍ତ କରିବାକୁ ଫ୍ରାଞ୍ଚାଇଜ୍ କୁ ନିର୍ଦ୍ଦେଶ ଦେଇଥିଲା । ବିବୃତ୍ତିରେ ଆହୁରି କୁହାଯାଇଛି, "ବିସିସିଆଇ ନିର୍ଦ୍ଦେଶାବଳୀ ଅନୁଯାୟୀ ସମସ୍ତ ଆବଶ୍ୟକୀୟ ପ୍ରକ୍ରିୟା ଓ ପରାମର୍ଶ ଅନୁସରଣ କରିବା ପରେ ମୁସ୍ତାଫିଜୁର ରହମାନଙ୍କୁ ମୁକ୍ତ କରିବାର ନିଷ୍ପତ୍ତି ନିଆଯାଇଛି ।

ବିସିସିଆଇ ଆଇପିଏଲ ନିୟମ ଅନୁଯାୟୀ ଜଣେ ବଦଳ ଖେଳାଳିଙ୍କୁ ସାମିଲ କରିବାକୁ କୋଲକାତା ନାଇଟ୍ ରାଇଡର୍ସକୁ ଅନୁମତି ଦେଇଛି। ଉପଯୁକ୍ତ ସମୟରେ ଅଧିକ ସୂଚନା ସେୟାର କରାଯିବ । ବାଂଲାଦେଶରେ ହିନ୍ଦୁଙ୍କ ହତ୍ୟା ପରେ, ଭାରତ ସେଠାରେ ସଂଖ୍ୟାଲଘୁଙ୍କ ସୁରକ୍ଷା ନେଇ ଚିନ୍ତା ପ୍ରକାଶ କରିଥିଲା। ସେବେଠାରୁ, ଆଇପିଏଲ ୨୦୨୬ରେ ମୁସ୍ତାଫିଜୁର ରହମାନଙ୍କ ଅଂଶଗ୍ରହଣ ନେଇ ବିସିସିଆଇ ଉପରେ ଚାପ ବଢ଼ିବାରେ ଲାଗିଛି । ଏହି ପ୍ରସଙ୍ଗରେ ରାଜନୈତିକ ବୟାନବାଜି ମଧ୍ୟ ତୀବ୍ର ହୋଇଛି । କିଛି ଶାସକ ଦଳର ନେତା ବର୍ତ୍ତମାନ ପରିସ୍ଥିତିରେ ଜଣେ ବାଂଲାଦେଶୀ ଖେଳାଳିଙ୍କୁ ସାମିଲ କରିବା ଉପରେ ପ୍ରଶ୍ନ ଉଠାଇଛନ୍ତି।

 

ଏହି ସମାଲୋଚନା କେକେଆରର ସହ-ମାଲିକ ଏବଂ ବଲିଉଡ ଅଭିନେତା ଶାହରୁଖ ଖାନଙ୍କ ପାଖରେ ମଧ୍ୟ ପହଞ୍ଚିଛି।ମୁସ୍ତାଫିଜୁର ରହମାନ ୨୦୧୬ ପରଠାରୁ ଆଠଟି IPL ସିଜିନରେ ଖେଳିଛନ୍ତି। ସେ କେବଳ ୨୦୧୯ ଏବଂ ୨୦୨୦ରେ ଏହି ଟୁର୍ଣ୍ଣାମେଣ୍ଟରୁ ବଞ୍ଚିତ ହୋଇଥିଲେ। ମୁସ୍ତାଫିଜୁର ସନରାଇଜର୍ସ ହାଇଦ୍ରାବାଦ (SRH), ମୁମ୍ବାଇ ଇଣ୍ଡିଆନ୍ସ (MI), ଦିଲ୍ଲୀ କ୍ୟାପିଟାଲ୍ସ, ଚେନ୍ନାଇ ସୁପର କିଙ୍ଗସ ଏବଂ ରାଜସ୍ଥାନ ରୟାଲ୍ସ (RR) ଭଳି ଦଳକୁ ପ୍ରତିନିଧିତ୍ୱ କରିଛନ୍ତି। IPL ୨୦୨୬ ତାଙ୍କୁ ପ୍ରଥମ ଥର ପାଇଁ KKR ଜର୍ସି ପିନ୍ଧିବାର ସୁଯୋଗ ଦେବା କଥା ଥିଲା, କିନ୍ତୁ ତାହା ଆଉ ହେବ ନାହିଁ।