ଭୁବନେଶ୍ବର ୧୭।୭: ଭୁବନେଶ୍ୱର ଅଶୋକନଗରରେ ଥିବା ଶ୍ରୀଲେଦର୍ସ ସୋ’ରୁମ୍ରେ ଅଗ୍ନିକାଣ୍ଡ । ଭୋର ୫ଟା ବେଳେ ସୋ’ରୁମ୍ରୁ ଧୂଆଁ ବାହାରୁଥିବା ଦେଖି ଉପର ମହଲାରେ ଥିବା ଲଜ୍ କର୍ମଚାରୀ ମାଲିକଙ୍କୁ ଖବର ଦେଇଥିଲେ । ପରେ ତୁରନ୍ତ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା । ଘଟଣାସ୍ଥଳରେ ୩ଟି ଦମକଳ ଗାଡି ପହଞ୍ଚି ନିଆଁକୁ ଆୟତ୍ତ କରିଥିଲା । ନିଆଁ ଯେପରି ଉପର ମହଲାକୁ ନ ବ୍ୟାପିବ ସେନେଇ ପ୍ରୟାସ କରିଥିଲା ଅଗ୍ନିଶମ ବାହିନୀ ।

ନିଆଁ ଯୋଗୁଁ ସୋ’ରୁମ୍ ଭିତରେ ପ୍ରବଳ ଧୂଆଁ ବାହାରିଥିଲା । ଫଳରେ ଉପର ମହଲାରେ ଥିବା କାଚ ଝରକାକୁ ଭାଙ୍ଗିଥିଲା ଅଗ୍ନିଶମ ବାହିନୀ। ତେବେ ଅଗ୍ନିକାଣ୍ଡରେ ବିଶେଷ କ୍ଷୟକ୍ଷତି ହୋଇନଥିଲେ ବି ତଳ ମହଲାରେ ଥିବା ବ୍ୟାଗ୍ ସେକ୍ସନ ସମ୍ପୂର୍ଣ୍ଣ ପୋଡି ପାଉଁଶ ହୋଇଯାଇଛି । ଲକ୍ଷାଧିକ ଟଙ୍କାର ସ୍କୁଲ ବ୍ୟାଗ୍, ଟ୍ରଲି ବ୍ୟାଗ୍, ବିଭିନ୍ନ ପ୍ରକାର ହ୍ୟାଣ୍ଡ ବ୍ୟାଗ୍ ପୋଡିଯାଇଛି । ୫ଶହରୁ ଅଧିକ ବ୍ୟାଗ୍ ପଡିଥିବା ଅନୁମାନ କରାଯାଉଛି ।

Also Read:- ମୟୁରଭଞ୍ଜରେ ଚାଞ୍ଚଲ୍ୟ : ୪ ବର୍ଷର ପୁଅକୁ ହତ୍ୟା, ଅଭିଯୁକ୍ତ ବାପା ଗିରଫ

ସେପଟେ ପାଣି ମାଡ଼ରେ ଅନ୍ୟ ସାମଗ୍ରୀ ମଧ୍ୟ ଓଦା ହୋଇ ନଷ୍ଟ ହୋଇଛି । ସଟ୍ ସର୍କିଟରୁ ନିଆଁ ଲାଗିଥିବା ପ୍ରାଥମିକ ତଦନ୍ତରୁ ଜଣାପଡିଛି ।