ନୂଆଦିଲ୍ଲୀ, ୩୦/୧୧: ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ୍ ସିରିଜରେ ଶୋଚନୀୟ ପରାସ୍ତ ହୋଇଛି ଟିମ୍ ଇଣ୍ଡିଆ । ଦଳ ଇତିହାସରେ କେବେ ଏପରି ବିପର୍ଯ୍ୟୟର ସାମ୍ନା କରିନଥିଲା । ଦଳର ପ୍ରାୟ ସବୁ ବ୍ୟାଟର ଫେଲ ମାରୁଥିଲେ । ବଡ ସ୍କୋର କରିବାରେ ବିଫଳ ହୋଇଥିଲେ । ଦଳର ପରାଜୟ ପରେ ବିରାଟ କୋହଲି ପୁଣି ଟେଷ୍ଟ୍ ଦଳକୁ ଫେରିବେ ବୋଲି ଅନେକ ଚର୍ଚ୍ଚା କରୁଥିଲେ । ସେ ଖୁବ୍ ଶୀଘ୍ର ନିଜର ଟେଷ୍ଟ ଅବସର ନିଷ୍ପତ୍ତିର ପୁନଃବିଚାର କରିବେ ବୋଲି ଫ୍ୟାନ୍ସ ମତ ଦେଉଥିଲେ । ଏସବୁ ଭିତରେ ପ୍ରଥମ ଥର ବିସିସିଆଇ ମୁହଁ ଖୋଲିଛି ।

ଫ୍ୟାନ୍ସମାନେ କହୁଥିଲେ ଯେ, ବିସିସିଆଇ ଏବଂ ବିରାଟଙ୍କ ମଧ୍ୟରେ ଆଲୋଚନା ଜାରି ରହିଛି । ତାଙ୍କୁ ଟେଷ୍ଟ୍ ଦଳକୁ ଫେରିବା ପାଇଁ ବୋର୍ଡ ପକ୍ଷରୁ କୁହାଯାଉଛି । ଖୁବ୍ ଶୀଘ୍ର ଏନେଇ ଚୂଡାନ୍ତ ନିଷ୍ପତ୍ତି ବିରାଟ ନେବେ । କିନ୍ତୁ ଏସବୁ ଚର୍ଚ୍ଚାକୁ ଗୁଜବ ବୋଲି କହିଛନ୍ତି ବିସିସିଆଇର ସଚିବ ଦେବଜିତ ସୈକିୟା ।

ଦେବଜିତ୍ କହିଛନ୍ତି ଯେ, ବିରାଟଙ୍କୁ ନେଇ ବାହାରେ ବହୁତ ଖବର ଚାଲିଛି । କିନ୍ତୁ ଏସବୁ ଗୁଜବ । ବିରାଟଙ୍କ ଟେଷ୍ଟ୍ ପ୍ରତ୍ୟାବର୍ତ୍ତନ ନେଇ କୌଣସି ଆଲୋଚନା ହୋଇନାହିଁ । ଗୁଜବ ସୃଷ୍ଟି କରନ୍ତୁ ନାହିଁ । କିଛି ଆଲୋଚନା ହୋଇନଥିବା ସେ ସ୍ପଷ୍ଟ କରିଛନ୍ତି ।

ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ୍ ସିରିଜ୍ ପରେ କ୍ରିକବଜ୍ କହିଥିଲା ଯେ, ବୋର୍ଡରେ ବିରାଟଙ୍କୁ ନେଇ ଚର୍ଚ୍ଚା ହେଉଛି । ତାଙ୍କ ସହ ଅନେକ ଅଧିକାରୀ କଥା ହେଉଛନ୍ତି । ନିକଟରେ ଅବସର ନେଇଥିବା ଜଣେ ଖେଳାଳି ନିଷ୍ପତ୍ତିର ପୁନର୍ବିଚାର କରିପାରନ୍ତି । ଦଳ ବାରମ୍ବାର ଟେଷ୍ଟରେ ବିଫଳ ହେଉଥିବାରୁ ଏପରି କିଛି ହୋଇପାରେ ବୋଲି ଓ୍ୱେବସାଇଟ୍ ପକ୍ଷରୁ ରିପୋର୍ଟ ପ୍ରକାଶ ପାଇଥିଲା ।

ସୂଚନାଯୋଗ୍ୟ, ୨୦୧୧ ଜୁନ ମାସରେ ବିରାଟ ଓ୍ୱେଷ୍ଟ୍ ଇଣ୍ଡିଜ ବିପକ୍ଷରେ ଟେଷ୍ଟ ମୁକାବିଲାରେ ପଦାର୍ପଣ କରିଥିଲେ । ପ୍ରଥମ ପାଳିରେ ସେ ୪ ରନ୍ ଏବଂ ଦ୍ୱିତୀୟ ପାଳିରେ ୧୫ ରନ୍ କରିଥିଲେ । ୨୦୨୫ ଜାନୁଆରୀରେ ସେ ଶେଷ ଥର ପାଇଁ ଧଳା ଜର୍ସିରେ ନଜର ଆସିଥିଲେ ।