ଚେନ୍ନାଇ, ୨୩/୦୪ : ତାମିଲନାଡୁ ବିଧାନସଭା ପାଇଁ ଚାଲିଛି ମତଦାନ । ପ୍ରବଳ ଗରମରେ ମଧ୍ୟ ମତଦାତାମାନେ ବୁଥକୁ ଆସି ମତଦାନ କରୁଛନ୍ତି । ତେବେ ରାଜ୍ୟରେ ନିର୍ବାଚନ ଲଢୁଥିବା ଅନେକ ନେତା କୋଟିପତି । ବିଭିନ୍ନ ଆସନରେ ନିର୍ବାଚନ ଲଢୁଥିବା ମୋଟ୍ ୪୦୨୩ ପ୍ରାର୍ଥୀଙ୍କ ମଧ୍ୟରୁ ୯୮୧ ଜଣ ହେଲେ କୋଟି ପତି । ଯାହା ପ୍ରାୟ ୨୫ ପ୍ରତିଶତ । ତେବେ ଆସନ୍ତୁନଜର ପକାଇବା ତାମିଲନାଡୁର ସବୁଠୁ ୧୦ ଧନୀ ପ୍ରାର୍ଥୀଙ୍କ ଉପରେ ।

ଲିମା ରୋଜ୍ ମାର୍ଟିନ୍

ଏଆଇଏଡିଏମକେ ପ୍ରାର୍ଥୀ ଲିମା ହେଲେ ଲଟେରୀ କିଙ୍ଗ୍ ଭାବେ ପରିଚିତ ସାଣ୍ଟିଆଗୋ ମାର୍ଟିନଙ୍କ ପତ୍ନୀ । ଟିଏନ୍ ବିଧାନସଭା ନିର୍ବାଚନରେ ସେ ସବୁଠୁ ଧନୀ ପ୍ରାର୍ଥୀ । ତିରୁଚିରପଲ୍ଲୀ ଏବଂ ଲାଲଗୁଡିରୁ ଲଢୁଥିବା ଲିମାଙ୍କ ସମ୍ପତ୍ତି ୫୮୬୩ କୋଟି ଟଙ୍କାରୁ ଅଧିକ ।

ଜୋସେଫ୍ ବିଜୟ

ଟିଭିକେ ପାର୍ଟି ଗଠନ କରି ନିର୍ବାଚନ ଲଢୁଥିବା ଅଭିନେତା ଟର୍ଣ୍ଣଡ୍ ପଲିଟିସିଆନ ବିଜୟଙ୍କର ମୋଟ୍ ସମ୍ପତ୍ତି ୬୪୮ କୋଟିରୁ ଅଧିକ । ସେ ତ୍ରିଚି ଏବଂ ପେରାମ୍ବୁର ଆସନରୁ ଚଳିତ ଥର ଭାଗ୍ୟ ପରୀକ୍ଷା କରୁଛନ୍ତି ।

ଆଧବ ଅର୍ଜୁନ

ଟିଭିକେ ପାର୍ଟିର ନେତା ତଥା କ୍ରୀଡାବିତ୍ ଆଧବ ଅର୍ଜୁନଙ୍କ ମୋଟ୍ ସମ୍ପତ୍ତି ୫୩୪ କୋଟିରୁ ଅଧିକ । ସେ ଚେନ୍ନାଇର ଭିଲିଭକମ ଆସନରୁ ନିର୍ବାଚନ ଲଢୁଛନ୍ତି । ଦଳର ନିର୍ବାଚନ ପ୍ରଚାର କାର୍ଯ୍ୟକ୍ରମର ସେ ସାଧାରଣ ସମ୍ପାଦକ ଅଟନ୍ତି ।

ଏସାକି ସୁବୟା

ଡାକ୍ତର ଏସାକି ସୁବୟା ଏଆଇଏଡିଏମକେ ଟିକେଟରୁ ନିର୍ବାଚନ ଲଢୁଛନ୍ତି । ସେ ତିରୁନେଭେଲିର ଆମ୍ବାସମୁଦ୍ରମ୍ ଆସନରୁ ଭାଗ୍ୟ ପରୀକ୍ଷା କରୁଥିବା ବେଳେ ତାଙ୍କର ମୋଟ୍ ସମ୍ପତ୍ତି ୪୧୯ କୋଟି ହେବ । ସେ ଦଳର ଦ୍ୱିତୀୟ ଧନୀ ପ୍ରାର୍ଥୀ ଅଟନ୍ତି ।

କାର୍ତ୍ତିକ ମୋହନ୍

ଡିଏମକେ ପ୍ରାର୍ଥୀ କାର୍ତ୍ତିକ ମୋହନ୍ ସରକାରୀ ଦଳର ସବୁଠୁ ଧନୀ ପ୍ରାର୍ଥୀ । ତାଙ୍କର ମୋଟ୍ ସମ୍ପତ୍ତି ୩୪୬ କୋଟିରୁ ଅଧିକ । ସେ ଭିଲିଭକମରୁ ନିଜର ଭାଗ୍ୟ ପରୀକ୍ଷା କରୁଛନ୍ତି ।

ଡି ମାଥିଆଝାଗନ୍

୨୦୨୬ସୁଦ୍ଧା ଡିଏମକେ ପ୍ରାର୍ଥୀ ଡି ମାଥିଆଝାଗନଙ୍କ ମୋଟ୍ ସମ୍ପତ୍ତି ୩୦୪ କୋଟି ଟଙ୍କା ବୋଲି ଆକଳନ କରାଯାଇଛି । ସେ ନିଜେ ନିର୍ବାଚନୀ ସତ୍ୟପାଠରେ ଏହା ଦର୍ଶାଇଛନ୍ତି । ବାରଗର୍ ଆସନରୁ ସେ ଏଥର ନିର୍ବାଚନ ଲଢୁଛନ୍ତି ।

ଭିଜି ରାଜେନ୍ଦ୍ରନ୍

ଭିଭି ରାଜେନ୍ଦ୍ରନ୍ ଏବେ ଥିରୁଭାଲୁର ଆସନରୁ ଡିଏମକେର ବିଧାୟକ ଅଛନ୍ତି । ପୁଣି ଥରେ ଚଳିତ ନିର୍ବାଚନରେ ସେଭାଗ୍ୟ ପରୀକ୍ଷା କରୁଛନ୍ତି । ତେବେ ତାଙ୍କର ମୋଟ୍ ସମ୍ପତ୍ତି ହେଉଛି ୨୫୯ କୋଟି ଟଙ୍କା ।

କେଆର ଜୟରାମ

ଏଆଇଏଡିଏମକେ ପ୍ରାର୍ଥୀ କେଆର ଜୟରାମ ସିଙ୍ଗାନାଲୁର ଆସନରୁ ମଇଦାନକୁ ଓହ୍ଲାଇଛନ୍ତି । ତାଙ୍କର ମୋଟ୍ ସମ୍ପତ୍ତି ୧୭୨ କୋଟି ଟଙ୍କାରୁ ଅଧିକ । ଏହାସହ ସେ ୭୭ କୋଟି ଟଙ୍କାର ଲୋନ୍ ନେଇଛନ୍ତି । ଆହୁରି ମଧ୍ୟ ଜୟରାମଙ୍କ ନାଁରେ ୧୦ଟି ଅପରାଧିକ ମାମଲା ରହିଛି ।

କେ ନିତ୍ୟାନନ୍ଦନ

କେଏମଡିକେ ନେତା କେ ନିତ୍ୟାନନ୍ଦନ ଏଥର ଡିଏମକେରୁ ନିର୍ବାଚନ ଲଢୁଛନ୍ତି । ପୋଲାଚିରୁ ପ୍ରାର୍ଥୀ ହୋଇଥିବା ନିତ୍ୟାନନ୍ଦନଙ୍କ ସମ୍ପତ୍ତିର ମୂଲ୍ୟ ୧୭୦ କୋଟିରୁ ଅଧିକ ।

ମୁରୁଘାନ୍ ଆରଏସ୍

ମୁରୁଘାନ ରାଜନୀତି କରିବା ସହ ଜଣେ ବ୍ୟବସାୟୀ ଏବଂ ଠିକାଦାର ମଧ୍ୟ । ଏଥର ସେ ଟିଭିକେରୁ ପ୍ରାର୍ଥୀ ହୋଇଛନ୍ତି । ପୂର୍ବରୁ ଏଆଇଏଡିଏମକେରେ ସେ ଛାମୁଆ ନେତା ଥିଲେ । ନିର୍ବାଚନରେ ଦାଖଲ କରିଥିବା ସତ୍ୟପାଠ ଅନୁସାରେ ତାଙ୍କର ମୋଟ୍ ସମ୍ପତ୍ତି ୧୫୮କୋଟିରୁ ଅଧିକ ।