ଭୁବନେଶ୍ୱର୨୭।୦୪ : ନିର୍ଧୁମ ଖରା, ଘମାଘୋଟ ପ୍ରଚାର ତାତି । ଏଭଳି ତତଲା ବାତାବରଣ ଭିତରେ ପଖାଳ... । ବାଃ...ଆତ୍ମତୃପ୍ତି । ଅସହ୍ୟ ଗ୍ରୀଷ୍ମ ତାତି ଓ ତଗଡ଼ା ପ୍ରଚାର ଭିତରେ ଆଜି ଚର୍ଚ୍ଚାକୁ ଆସିଛି ଓଡ଼ିଆଙ୍କ ପ୍ରିୟ ଖାଦ୍ୟ ପଖାଳ । ପ୍ରଚଣ୍ଡ ଗ୍ରୀଷ୍ମ ପ୍ରବାହ ଭିତରେ କଳାହାଣ୍ଡିର ଜୁନାଗଡ଼ରେ ପ୍ରଚାର ସାରିବା ପରେ ପଖାଳର ମଜା ନେଇଛନ୍ତି ବିଜେଡି ନେତା ତଥା ଦଳର ପ୍ରମୁଖ ଷ୍ଟାର ପ୍ରଚାରକ କାର୍ତ୍ତିକ ପାଣ୍ଡିଆନ । ଶ୍ରୀ ପାଣ୍ଡିଆନଙ୍କ ସାଥୀରେ ଥିଲେ ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେ ଟିଭିର ବରିଷ୍ଠ ସାମ୍ବାଦିକ ରାହୁଲ କନୱାଲ ।
ଉଭୟ ପ୍ରଚାର ବାତାବରଣ ଓ ରାଜନୀତି ଚର୍ଚ୍ଚା ଭିତରେ ଓଡ଼ିଆଙ୍କ ପ୍ରିୟ ପଖାଳ ବାବଦରେ ବେଶ୍ କିଛି ସମୟ କଥା ହୋଇଥିଲେ । ଅସହ୍ୟ ଗ୍ରୀଷ୍ମ ପ୍ରବାହ ଭିତରେ ଶ୍ରୀ ପାଣ୍ଡିଆନ ଏବେ ନିୟମିତ ବିଭିନ୍ନ ନିର୍ବାଚନମଣ୍ଡଳୀ ଗସ୍ତ କରି ବିଜେଡିର ପ୍ରଚାର ଅଭିଯାନକୁ ତେଜି ଚାଲିଛନ୍ତି । ଶନିବାର ସେ ଜୁନାଗଡ଼ରେ ବିଶାଳ ସମାବେଶ କରିଥିଲେ । ସେଠାରୁ ନିର୍ବାଚନ ପ୍ରଚାର ସାରି ଫେରିବାବେଳେ ଦାସପୁର ରାସ୍ତା କଡ଼ ଜଙ୍ଗଲରେ ମଧ୍ୟାହ୍ନଭୋଜନ କରିଥିଲେ । ନିର୍ବାଚନୀ ପ୍ରଚାର ଓ ରାଜନୈତିକ ସ୍ଥିତି ପରଖିବାକୁ ଓଡ଼ିଶା ଆସିଥିବା ଇଣ୍ଡିଆ ଟୁଡେ ଚ୍ୟାନେଲର ବରିଷ୍ଠ ସାମ୍ବାଦିକ ରାହୁଲ ବି ତାଙ୍କ ସହ ପଖାଳର ମଜା ନେଇଥିଲେ । କଂସା ପାତ୍ରରେ ଥିଲା ପଖାଳ । ଏହା ସାଙ୍ଗକୁ ମେନୁରେ ଥିଲା ଶାଗ, ବଡ଼ି ଚୁରା, ଭେଣ୍ଡି ଭଜା, ଆଳୁ ଭରତା ଓ ଦହି । ଖାଣ୍ଟି ଓଡ଼ିଆ ନିରାମିଷ ଖାଦ୍ୟକୁ ମନ ଭରି ଉଭୟ ଖାଇଥିଲେ । ଆଲୋଚନାବେଳେ ଶ୍ରୀ ପାଣ୍ଡିଆନଙ୍କୁ ପଖାଳ ସମ୍ପର୍କରେ ପଚାରିଥିଲେ ସାମ୍ବାଦିକ ରାହୁଲ । ଶ୍ରୀ ପାଣ୍ଡିଆନ ଜଣାଇଥିଲେ ଯେ ପଖାଳ ହେଉଛି ତାଙ୍କର ପ୍ରିୟ ଖାଦ୍ୟ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ଅତି ପ୍ରିୟ ହେଉଛି ପଖାଳ । ଓଡ଼ିଆଙ୍କର ଏହି ସାଧାରଣ ତଥା ହିତକାରୀ ଖାଦ୍ୟକୁ ମୁଖ୍ୟମନ୍ତ୍ରୀ କିପରି ତାଙ୍କ ଅତିଥିମାନଙ୍କୁ ପରଷନ୍ତି, ସେ ବିଷୟରେ ଶ୍ରୀ ପାଣ୍ଡିଆନ ଖାଇବାବେଳେ କହିଥିଲେ । ପଖାଳର ଉପକାରିତା ଓ ପ୍ରସ୍ତୁତି ବିଷୟରେ ମଧ୍ୟ ବୁଝାଇଥିଲେ । ପଖାଳ ଖାଇବା ପରେ ଉଭୟ ଲାଞ୍ଜିଗଡ଼ ସଭା ପାଇଁ ବାହାରିଯାଇଥିଲେ ।