ଭଦ୍ରକ/କେନ୍ଦୁଝର: ରାଜ୍ୟରେ ପ୍ରବଳ ବର୍ଷା ଓ ନଦୀଗୁଡ଼ିକରେ ଜଳସ୍ତର ବୃଦ୍ଧି ଯୋଗୁଁ ବିଭିନ୍ନ ଜିଲ୍ଲାରେ ବନ୍ୟା ପରିସ୍ଥିତି ଜଟିଳ ହେବାରେ ଲାଗିଛି । ବିଶେଷ କରି ଭଦ୍ରକ ଜିଲ୍ଲାରେ ବନ୍ୟା ସ୍ଥିତି ଅତ୍ୟନ୍ତ ସଙ୍ଗୀନ ରହିଥିବା ବେଳେ କେନ୍ଦୁଝର ଜିଲ୍ଲାରେ ହୋଇଥିବା କ୍ଷୟକ୍ଷତିର ପ୍ରାଥମିକ ଚିତ୍ର ସାମ୍ନାକୁ ଆସିଛି । ଜିଲ୍ଲାରେ ବୈତରଣୀ ନଦୀର ଜଳସ୍ତର କ୍ରମାଗତ ଭାବେ ହ୍ରାସ ପାଇବାରେ ଲାଗିଛି, ଯାହା ସ୍ଥାନୀୟ ଲୋକଙ୍କୁ ସାମାନ୍ୟ ଆଶ୍ୱସ୍ତି ଦେଇଛି ।

ଭଦ୍ରକରେ ବ୍ୟାପକ କ୍ଷୟକ୍ଷତି

ଭଦ୍ରକ ଜିଲ୍ଲାରେ ବନ୍ୟା ଭୟାବହ ରୂପ ଧାରଣ କରିଛି । ପ୍ରଶାସନିକ ତଥ୍ୟ ଅନୁଯାୟୀ, ଜିଲ୍ଲାର ୧୧୦ଟି ଗ୍ରାମ ପଞ୍ଚାୟତ, ୨୬ଟି ୱାର୍ଡ ଏବଂ ୪୨୩ଟି ଗ୍ରାମର ପ୍ରାୟ ୪,୬୮,୬୪୯ ଜଣ ଲୋକ ବନ୍ୟା ଦ୍ୱାରା ପ୍ରଭାବିତ ହୋଇଛନ୍ତି । ବନ୍ୟା ବିପନ୍ନଙ୍କୁ ସୁରକ୍ଷିତ ରଖିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ଉଦ୍ଧାର କାର୍ଯ୍ୟ ଜାରି ରହିଛି । ବର୍ତ୍ତମାନ ସୁଦ୍ଧା ୧,୫୮,୨୨୮ ଜଣ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ସେମାନଙ୍କ ଖାଦ୍ୟ ଓ ରହିବା ପାଇଁ ୨୮୬ଟି ରୋଷେଇ କେନ୍ଦ୍ର ଖୋଲାଯାଇଛି, ଯେଉଁଥିରେ ୨୪୮.୮ କ୍ୱିଣ୍ଟାଲ ଚୁଡ଼ା ଓ ୩୩.୮୮ କ୍ୱିଣ୍ଟାଲ ଗୁଡ଼ ବଣ୍ଟନ ଶେଷ ହୋଇଛି ।

ଧାମନଗର ବ୍ଲକରେ ସବୁଠାରୁ ଅଧିକ ୧.୮୨ ଲକ୍ଷ ଲୋକ ପ୍ରଭାବିତ ହୋଇଥିବା ବେଳେ ୧.୦୫ ଲକ୍ଷ ଲୋକଙ୍କୁ ସ୍ଥାନାନ୍ତର କରାଯାଇ ୧୪୦ଟି ରୋଷେଇ କେନ୍ଦ୍ର ଚାଲୁ କରାଯାଇଛି । ସେହିପରି ତିହିଡ଼ି ବ୍ଲକରେ ୯୮.୬ ହଜାର, ଭଦ୍ରକ ବ୍ଲକରେ ୭୩.୧ ହଜାର, ଭଣ୍ଡାରିପୋଖରୀରେ ୭୨.୨ ହଜାର, ଚାନ୍ଦବାଲିରେ ୩୫.୨ ହଜାର ଏବଂ ବାସୁଦେବପୁର ବ୍ଲକରେ ୭.୨ ହଜାର ଲୋକ ପ୍ରଭାବିତ ହୋଇଛନ୍ତି । ଉଦ୍ଧାର କାର୍ଯ୍ୟ ପାଇଁ ୩ଟି NDRF, ୭ଟି ODRAF ଟିମ୍ ସହ ପ୍ରତ୍ୟେକ ବ୍ଲକରେ ଅଗ୍ନିଶମ ବାହିନୀ ନିୟୋଜିତ ଅଛନ୍ତି ।

କେନ୍ଦୁଝରରେ ୯୪ ଗ୍ରାମପଞ୍ଚାୟତ ପ୍ରଭାବିତ

ଅନ୍ୟପଟେ କେନ୍ଦୁଝର ଜିଲ୍ଲାରେ ଗତ ଦୁଇ ଦିନ ହେବ ବର୍ଷାର ପରିମାଣ କମିବା ଯୋଗୁଁ ବୈତରଣୀ ନଦୀର ଜଳସ୍ତର ଧୀରେ ଧୀରେ ହ୍ରାସ ପାଉଛି । ଚମ୍ପୁଆ, ସ୍ୱାମପାଟଣା ଏବଂ ଆନନ୍ଦପୁରଠାରେ ନଦୀର ଜଳସ୍ତର ଚେତାବନୀ ସଙ୍କେତ ତଳକୁ ଖସିଆସିଛି । ତେବେ ଜିଲ୍ଲାର ୧୩ଟି ବ୍ଲକର ୯୪ଟି ଗ୍ରାମପଞ୍ଚାୟତ ବନ୍ୟା ଦ୍ୱାରା ପ୍ରଭାବିତ ହୋଇଥିବା ବେଳେ ଆନନ୍ଦପୁର, ହାଟଡିହି ଓ ପାଟଣା ବ୍ଲକ୍ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି । ପ୍ରାଥମିକ ଆକଳନ ଅନୁଯାୟୀ ପ୍ରାୟ ୩୦୦ ହେକ୍ଟର ଫସଲ ଜମି ଏବଂ ୫୨୫ଟି ଘର କ୍ଷତିଗ୍ରସ୍ତ ହୋଇଛି । ପ୍ରକୃତ କ୍ଷୟକ୍ଷତିର ପରିମାଣ ଜାଣିବା ପାଇଁ ରାଜସ୍ୱ ଓ କୃଷି ବିଭାଗ ପକ୍ଷରୁ ମିଳିତ ସର୍ଭେ ଆରମ୍ଭ କରାଯିବ।

ଜିଲ୍ଲା ପ୍ରଶାସନ ପକ୍ଷରୁ ସାଧାରଣ ଜନତାଙ୍କୁ ନଦୀକୁ ଗାଧୋଇବାକୁ କିମ୍ବା ବନ୍ୟା ପାଣି ଦେଖିବା ପାଇଁ ନଯିବାକୁ କଡ଼ା ପରାମର୍ଶ ଦିଆଯାଇଛି। ଏହାସହ ଗୁଜବରେ ବିଶ୍ୱାସ ନକରି କେବଳ ପାଣିପାଗ ବିଭାଗ ଓ ସରକାରୀ ସୂଚନା ଉପରେ ନଜର ରଖିବାକୁ କୁହାଯାଇଛି ।